Con data do 31 de outubro de 2007, a entidade Ronáutica, S.A. co CIF A36652121, con domicilio social na r/ García Olloqui, 6, baixo, Vigo (Pontevedra), solicitou a inscrición no Rexistro Galego de Centros Adheridos ao sistema de xestión e auditoría ambiental, segundo o procedemento regulado no Decreto 185/1999, do 17 de xuño, referenciado no encabezamento.

Coa solicitude de inscrición xunta declaración ambiental validada así como o resto da documentación exixida no devandito Decreto 185/1999.

Con data do 15 de xaneiro de 2008, procédese á inscrición do centro sito na 2ª fase do parque empresarial de Areas, parcelas 1, 2 e 3, 36711 Tui (Pontevedra), e pertencente á dita entidade mercantil, no Rexistro Galego de Centros Adheridos ao sistema de xestión e auditoría ambiental co número ES-GA-000140.

Na citada declaración ambiental facíase constar que esta tiña validez dun ano desde o día da súa validación. Rematado este prazo dun ano para a presentación da seguinte declaración ambiental validada non se recibiu por parte de Ronáutica, S.A. ningún tipo de comunicación.

Enviouse comunicación escrita á devandita entidade mercantil, mediante notificación con xustificante de recepción, con data do 4.2.2011, na que se informaba que, de non recibir ningún tipo de documentación ou comunicación relativa ao mantemento no rexistro, procederase a dalos de baixa no Rexistro galego de centros adheridos ao Sistema Comunitario de Xestión e Auditoría Medio Ambiental (EMAS), sen obter ningún tipo de resposta ou comunicación por parte de Ronáutica, S.A.

Considerando que o artigo 14.1 do Decreto 185/1999, do 17 de xuño, polo que se establece o procedemento para a aplicación na Comunidade Autónoma galega, dun sistema voluntario de xestión e auditoría ambiental (EMAS) dispón que «1. Unha vez inscrito o centro no rexistro, se este non presentase a seguinte declaración ambiental validada no prazo fixado pola propia empresa na súa solicitude que, en ningún caso, será superior a tres anos, e non pagase a taxa de rexistro, a Dirección Xeral de Calidade e Avaliación Ambiental cancelará a inscrición do centro no rexistro e informará de tal medida a dirección do centro».

Considerando que o parágrafo 5 do mesmo precepto establece que «5. A Dirección Xeral de Calidade e Avaliación Ambiental, antes de ordenar a suspensión ou cancelación da inscrición dun centro do rexistro, dará trámite de audiencia ao interesado, concedéndolle un prazo de quince días para que presenten as alegacións, documentos e xustificacións que estime oportunas. A resolución que acorde a suspensión ou cancelación da inscrición dun centro do rexistro será motivada e notificarase á dirección do centro e ao Rexistro de establecementos industriais».

Este trámite de audiencia, así como a posterior resolución que se emita, correspóndelle ao secretario xeral de Calidade e Avaliación Ambiental, segundo os artigos 12 a 14 do Decreto 185/1999, do 17 de xuño, polo que se establece o procedemento para a aplicación na Comunidade Autónoma galega, dun sistema voluntario de xestión e auditoría ambiental e o artigo 13.2.2 do Decreto 316/2009, do 4 de xuño, polo que se establece a estrutura orgánica da Consellería de Medio Ambiente, Territorio e Infraestruturas.

Vistos os preceptos sinalados e demais de xeral e pertinente aplicación, esta Secretaría Xeral de Calidade e Avaliación Ambiental, en virtude da competencia que lle outorga o Decreto 185/1999, do 17 de xuño, polo que se establece o procedemento para a aplicación na Comunidade Autónoma galega, dun sistema voluntario de xestión e auditoría ambiental 13.2.2 do Decreto 316/2009, do 4 de xuño, polo que se establece a estrutura orgánica da Consellería de Medio Ambiente, Territorio e Infraestruturas,

ACORDA:

Dar un trámite de audiencia á entidade mercantil Ronáutica, S.A. co CIF A36652121, con domicilio social na r/ García Olloqui, 6, baixo, Vigo (Pontevedra), concedéndolle un prazo de quince días contado desde a notificación do presente escrito para formular alegacións e achegar os documentos e xustificacións que consideren convenientes.

Notifíquese á interesada, coa mención expresa dos requisitos exixidos polo artigo 58.2 da devandita Lei 30/1992, na súa redacción dada pola Lei 4/1999, do 13 de xaneiro.

Santiago de Compostela, 28 de agosto de 2013

Justo de Benito Basanta
Secretario xeral de Calidade e Avaliación Ambiental