En cumprimento do establecido no artigo 92.2 da Lei 9/2002, do 30 de decembro, de ordenación urbanística e protección do medio rural de Galicia, faise público que o Pleno da Corporación Municipal de Padrón, na sesión realizada o 28 de febreiro de 2013, adoptou o seguinte acordo:

«Primeiro. Aprobar definitivamente o Plan parcial do sector do solo urbanizable industrial de Estramundi de Abaixo, Padrón, coa corrección efectuada no plano 01 do estudo hidrolóxico denominado Ámbito e estado actual (páxina 171).

Segundo. Comunicar á consellería competente en materia de urbanismo e ordenación do territorio o presente acordo e achegarlle dous exemplares dilixenciados do plan parcial aprobado.

Terceiro. Ordenar a publicación do correspondente anuncio no Diario Oficial de Galicia facendo constar a data de remisión á consellería e publicar o documento que conteña a normativa e as ordenanzas no Boletín Oficial da provincia da Coruña.

Cuarto. Contra este acordo, que pon fin á vía administrativa, poderase interpoñer recurso contencioso-administrativo ante a sala correspondente do Tribunal Superior de Xustiza de Galicia, no prazo de dous meses contados desde o día de publicación do último dos anuncios citados no parágrafo anterior, segundo dispoñen os artigos 10 e 46 da Lei 29/1998, do 13 de xullo, reguladora da xurisdición contencioso-administrativa».

Faise público, ademais, que o 19 de marzo de 2013 se remitiu ao Servizo de Urbanismo da Xefatura Territorial da Coruña da Consellería de Medio Ambiente, Territorio e Infraestruturas certificación do acordo plenario de aprobación definitiva e dous exemplares dilixenciados do plan parcial aprobado definitivamente.

Padrón, 19 de marzo de 2013

Antonio Fernández Angueira
Alcalde