O 22 de febreiro de 2013, a directora da Axencia Galega de Infraestruturas, por delegación do conselleiro de Medio Ambiente, Territorio e Infraestruturas (Orde do 4 de febreiro de 2013, Diario Oficial de Galicia do 20 de febreiro), visto o informe da análise das alegacións, resolveu o seguinte:
Primeiro. Aprobar o expediente de información pública e definitivamente o proxecto de trazado e impacto ambiental da obra «Variante de Aradas en Santiago de Compostela. Clave AC/10/020.00», coas seguintes prescricións e modificacións, que son consecuencia da análise efectuada das alegacións presentadas:
– Primeira. Corrixiranse as erratas e imprecisións detectadas nas valoracións dos bens afectados en certas parcelas.
– Segunda. Suprimirase a reposición do camiño nº 7 do proxecto e prolongarase a reposición do camiño nº 5.
– Terceira. Suprimirase a reordenación viaria proposta entre a Vía Nobel e a Vía da Cierva, mantendo o esquema do estado actual pero con raios de curvatura e illas melloradas.
– Cuarta. Ampliarase a sección do paso inferior da reposición do camiño nº 5 a 12 metros interiores.
– Quinta. Modificarase o número de carrís e, en consecuencia, o largo do ramal noroeste da CP-0701 desde a rotonda proxectada, reducindo ocupacións e permitindo a incorporación dunha beirarrúa de 1,80 metros nunha das marxes.
– Sexta. Diminuirase a distancia dos camiños de servizo ao tronco para minimizar a afección.
– Sétima. En fases posteriores analizarase con detalle a disposición das pantallas acústicas, a necesidade de expropiación total dalgunhas das parcelas, as necesidades de ocupación temporal, e demais aspectos alegados, pero que non teñen incidencia sobre a concepción do trazado.
Segundo. Nas fases posteriores do proxecto e durante a execución da obra, cumpriranse as prescricións da declaración de impacto ambiental formulada pola Secretaría Xeral de Calidade e Avaliación Ambiental na súa Resolución de 20 de xullo de 2012.
Terceiro. Consonte establece o artigo 15.3 da Lei 4/1994, do 14 de setembro, de estradas de Galicia, ordénase a modificación ou revisión do planeamento urbanístico do concello de Santiago de Compostela, afectado polo proxecto de trazado e impacto ambiental da obra «Variante de Aradas en Santiago de Compostela. Clave AC/10/020.00», o cal deberá acomodarse ás determinacións do proxecto de trazado no prazo dun ano desde a súa aprobación.
Cuarto. O proxecto de construción que desenvolva o proxecto de trazado deberá axustarse ás indicacións recollidas nesta resolución.
Quinto. Así mesmo, na páxina web da Consellería de Medio Ambiente, Territorio e Infraestruturas (http://www.cmati.xunta.es/tema/c/Infraestruturas_Estradas), porase á disposición dos interesados un documento coa planta do proxecto de trazado aprobado.
Sexto. Contra esta resolución, que pon fin á vía administrativa, poderase interpoñer recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses, contados desde o día seguinte ao da publicación desta resolución no Diario Oficial de Galicia, de conformidade co establecido nos artigos 10, 14 e 46.1 da Lei 29/1998, do 13 de xullo, reguladora da xurisdición contencioso-administrativa, ou ben recurso potestativo de reposición ante o conselleiro de Medio Ambiente, Territorio e Infraestruturas no prazo dun mes contado desde o día seguinte ao da publicación da presente resolución no DOG, de acordo co disposto nos artigos 116 e 117 da Lei 30/1992, do 26 de novembro, de réxime xurídico das administracións públicas e do procedemento administrativo común.
O que se fai público para xeral coñecemento.
Santiago de Compostela, 25 de febreiro de 2013
Ethel Vázquez Mourelle
Directora da Axencia Galega de Infraestruturas