Con data 22 de febreiro de 2013, a directora da Axencia Galega de Infraestruturas, por delegación do conselleiro de Medio Ambiente, Territorio e Infraestruturas (Orde do 4 de febreiro de 2013, Diario Oficial de Galicia do 20 de febreiro), visto o informe da análise das alegacións, resolveu o seguinte:
Primeiro. Aprobar o expediente de información pública e definitivamente o estudo informativo e estudo de impacto ambiental do corredor Carballo-Fisterra, treito Berdoias, LMT Cee (clave AC/06/194.00), propoñendo como alternativa seleccionada a D e téndose en conta para fases posteriores do proxecto os seguintes aspectos:
1. Tal e como se sinala no plano AN.13.03.04 Reposición de camiños, do estudo informativo, proxectarase un paso superior no p.q. 2+950 para salvar a estrada 3401, cuxa titularidade pertence á Deputación Provincial da Coruña. A sección tipo do referido paso superior será de 12 m de largo, con dous carrís de 3,50 m, beiravías de 0,5 m e beirarrúas de 2 m.
2. Estudarase a viabilidade técnica da reposición do camiño Sacramental, unha vez definida a configuración definitiva do enlace de Berdoias, con base no trazado final do tramo anterior Baio-Berdoias.
Segundo. Nas fases posteriores do proxecto e durante a execución da obra cumpriranse as prescricións da declaración de impacto ambiental formulada pola Secretaría Xeral de Calidade e Avaliación Ambiental na súa Resolución do 8 de marzo de 2012.
Terceiro. O proxecto de construción que desenvolva o proxecto de trazado deberá axustarse ás indicacións recollidas nesta resolución, tendo, por motivos construtivos, a posibilidade de flutuar dentro dunha banda de 100 metros a ambos lados do trazado aprobado, que poderá ser de 200 metros nos enlaces.
Cuarto. Consonte establece o artigo 15.3 da Lei 4/1994, do 14 de setembro, de estradas de Galicia, ordénase a modificación ou revisión do planeamento urbanístico dos concellos afectados polo estudo informativo e estudo de impacto ambiental do corredor Carballo-Fisterra, treito Berdoias, LMT Cee (clave AC/06/194.00), os cales se deberán acomodar ás determinacións do proxecto de trazado no prazo dun ano desde a súa aprobación.
Quinto. Así mesmo, na páxina web da Consellería de Medio Ambiente, Territorio e Infraestruturas (http://www.cmati.xunta.es/tema/c/Infraestruturas_Estradas) porase á disposición dos interesados un documento coa planta do proxecto de trazado aprobado.
Sexto. Contra esta resolución, que pon fin á vía administrativa, poderase interpor recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses, contados desde o día seguinte ao da publicación desta resolución no Diario Oficial de Galicia, de conformidade co establecido nos artigos 10, 14 e 46.1 da Lei 29/1998, do 13 de xullo, reguladora da xurisdición contencioso-administrativa, ou ben recurso potestativo de reposición ante o conselleiro de Medio Ambiente, Territorio e Infraestruturas no prazo dun mes contado desde o día seguinte ao da publicación da presente resolución no DOG, de acordo co disposto nos artigos 116 e 117 da Lei 30/1992, do 26 de novembro, de réxime xurídico das administracións públicas e do procedemento administrativo común.
O que se fai público para xeral coñecemento.
Santiago de Compostela, 25 de febreiro de 2013
Ethel Vázquez Mourelle
Directora da Axencia Galega de Infraestruturas