No Boletín Oficial da provincia de Lugo número 41, do día 19 de febreiro de 2008, publícanse as bases que rexen a aceptación e asunción, por delegación expresa, das competencias en materia de xestión, inspección e recadación en relación cos tributos, prezos públicos e outros ingresos de dereito público, así como o alcance e contido da delegación efectuada, entre outros, polo Concello de Castroverde, que foi tamén publicado no Diario Oficial de Galicia número 46, do día 5 de marzo de 2008.
No Boletín Oficial da provincia número 286, do día 13 de decembro de 2008, publícase a reforma das citadas bases.
O Concello de Castroverde amplía a delegación de competencias, a cal foi aprobada polo acordo adoptado pola Xunta de Goberno Local en sesión ordinaria, que tivo lugar o día 24 de setembro de 2012, que é aceptada pola Deputación Provincial (Decreto número 2999, do 6 de novembro de 2012), segundo o teor literal seguinte:
«Primeiro. Incorporar ao acordo de delegación de competencias a favor da Deputación Provincial de Lugo en materia de xestión, inspección e recadación en relación cos tributos, prezos públicos e outros ingresos de dereito público, aprobado polo Pleno do Concello con data do 31 de xaneiro de 2008 e modificado no Pleno do 27 de novembro de 2008, e coa mesma vixencia, o seguinte punto:
As competencias de xestión recadatoria en período voluntario, a partir do 1 de xaneiro de 2013, de:
– Taxa por abastecemento de auga.
– Taxa por recollida de lixo.
– Taxa por rede de sumidoiros.
– Canon da auga.
Segundo. Remitir a certificación deste acordo á Deputación Provincial de Lugo para o seu coñecemento e demais efectos.
Terceiro. Facultar o alcalde para a sinatura de canta documentación sexa necesaria para a execución deste acordo».
Lugo, 29 de novembro de 2012
José Antonio Mourelle Cillero
Secretario da Deputación Provincial de Lugo
P.D. (Decreto 2821/2011, do 15 de xullo)
Mª del Pilar García Porto
Deputada delegada de Economía, Recadación e Facenda