Examinado o expediente instruído por instancia da empresa Barras Eléctricas Galaico-Asturianas S.A., con domicilio para os efectos de notificación na rúa Cidade de Viveiro, 4, Lugo, aprécianse os seguintes

Antecedentes de feito.

Primeiro. Con data do 30 de maio de 2012, a citada empresa solicita a autorización administrativa, a aprobación do proxecto de execución e a declaración de utilidade pública, en concreto, para a instalación eléctrica «Peche anel LMT Vilafrime-Moreira», no concello da Fonsagrada, presentando o preceptivo proxecto das instalacións a que fai referencia o Real decreto 1955/2000, do 1 de decembro (BOE nº 310, do 27 de decembro ), que regula as actividades de transporte, distribución, comercialización, subministración e procedementos de autorización de instalacións de enerxía eléctrica e xuntando a relación concreta e individualizada de bens e dereitos afectados pola instalación que determina o artigo 53 da Lei 54/1997, do 27 de novembro, do sector eléctrico (BOE nº 285, do 28 de novembro ) e o artigo 143 do Real decreto 1955/2000, antes citado, que a desenvolve.

Segundo. O proxecto someteuse a información pública para os efectos previstos na Lei 54/1997, do 27 de novembro, do sector eléctrico e no Real decreto 1955/2000, do 1 de decembro, mediante Resolución desta xefatura territorial do 26 de setembro de 2012. Esta resolución foi publicada no xornal El Progreso do 4 de outubro de 2012, no BOP de Lugo do 10 de outubro de 2012 e no DOG do 19 de outubro de 2012, no taboleiro de anuncios da citada xefatura territorial e no taboleiro de anuncios do Concello da Fonsagrada. Con esta resolución inseríase a relación de bens e dereitos afectados.

Así mesmo, practicouse notificación individual aos interesados incluídos na referida relación de bens e dereitos afectados.

Terceiro. Enviáronse separatas relativas ao proxecto aos diferentes organismos afectados e cumpríronse os trámites establecidos no artigo 131 do Real decreto 1955/2000, do 1 de decembro.

Cuarto. Durante o trámite de información pública presentaronse as seguintes alegacións:

1. Aurea López López, en representación dos herdeiros de Jesús López López, mediante escrito rexistrado o 29.10.2012 con nº 44129, propón que se modifique a traza proxectada para a liña sobre o predio nº 18 do parcelario no senso que o terreo expropiado desa leira sexa substituído por terreo máis cara ao norte, invoca una serie de razoamentos para xustificar o seu pedimento e fai, ademais, consideracións sobre o deprezo que sofre o predio expropiado e os conceptos que deberán indemnizarse, e rexeita a indemnización ofertada pola promotora da instalación, o que foi trasladado a empresa e contestado por ela con data 15.11.2012.

Quinto O persoal dos servizos técnicos desta xefatura territorial emite informe favorable sobre a solicitude obxecto deste expediente, de acordo co disposto na Lei 54/1997, do 27 de novembro, do sector eléctrico, e co disposto no Real decreto 1955/2000, do 1 de decembro. Igualmente, unha vez revisado sobre o terreo o trazado da liña eléctrica proxectada, os referidos servizos técnicos informan de que non se dá ningunha das limitacións para a imposición da servidume de paso de enerxía eléctrica a que se refire o artigo 161 do Real decreto 1955/2000, en relación co artigo 57 da Lei 54/1997, sobre as leiras incluídas na relación de bens e dereitos que foi obxecto de información pública e sobre as cales a empresa beneficiaria non chegou a un acordo amigable cos seus propietarios.

A este feitos son de aplicación os seguintes

Fundamentos de dereito.

Primeiro. A Xefatura Territorial de Lugo da Consellería de Economía e Industria é competente para resolver este expediente con fundamento no Estatuto de autonomía de Galicia; no Decreto 36/2001, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia, en relación co Real decreto 1955/2000, do 1 de decembro, e a Lei 54/1997, do 27 de novembro, do sector eléctrico; no Decreto 245/2009, do 30 de abril, polo que se regulan as delegacións territoriais da Xunta de Galicia, e no Decreto 8/2011, do 28 de xaneiro, polo que se fixa a estrutura orgánica das consellerías da Xunta de Galicia (que modifica o anterior).

Segundo. No expediente cumpríronse os trámites sinalados no artigo 53 da citada Lei 54/1997, e os regulamentarios ordenados nos capítulos II e V do título VII do Real decreto 1955/2000, do 1 de decembro, que regula o procedemento de autorización de instalacións de enerxía eléctrica.

Terceiro. Á vista das alegacións presentadas, da contestación que formula a empresa promotora e do resto da documentación que consta no expediente, considérase que aquelas non impiden continuar coa tramitación do expediente basicamente porque a modificación de trazado que propón Aurea López López non pode aceptarse, xa que o artigo 161 do Real decreto 1955/2000, do 1 de decembro, exixe que se cumpran conxuntamente tres condicións para evitar a servidume de paso sobre as propiedades particulares, que neste caso non son acreditadas mediante a formulación dunha proposta ou variante concreta pola interesada pois a modificación que propón en primeiro termo supón novas afeccións para outras propiedades e, aínda que, de acordo coa outra opción que suxire, a instalación quedase dentro do seu predio, non acredita que non supere, en lonxitude, o 10 % da parte da traza afectada nin que sexa posible tecnicamente e, neste senso, que o su custo non sexa superior nun 10 % ao orzamento desa parte. Ao non quedar acreditados eses aspectos para as variacións propostas, e tendo en conta os informes técnicos emitidos no expediente en relación co proxecto presentado pola empresa peticionaria, que consideran viable tal proxecto e conclúen que non existen limitacións á imposición da servidume de paso sobre os predios afectados, non pode senón entenderse como máis conveniente para acadar unha solución óptima para o conxunto de toda a instalación o trazado proposto polo autor do proxecto.

Polo que respecta ás alegacións da interesada sobre o alcance das afeccións e prexuízos causados e, neste senso, do demérito ou perda de valor dos bens e dereitos afectados, cómpre indicar que non corresponde a esta fase do procedemento nin a este órgano administrativo entrar na valoración do menosprezo derivado das ocupacións e imposicións de servidumes de paso da liña eléctrica considerada, o cal é competencia do Xurado de Expropiación de Galicia, ao cal se lle remitirá o expediente logo da elaboración das actas previas á ocupación e da incorporación da follas de taxación contraditoria que presenten as partes, tal como se recolle no capítulo II da Lei de expropiación forzosa do 16 de decembro de 1954 (BOE núm. 351, do 17 de decembro).

Cuarto. Sen prexuízo do anterior, cómpre ter en conta que consonte o artigo 151 do citado Real decreto 1955/2000, do 1 de decembro, en calquera momento a empresa beneficiaria e os titulares dos bens e dereitos necesarios poden convir un mutuo acordo, o que causará a correspondente conclusión do expediente expropiatorio.

De acordo co exposto e en virtude das competencias que ten atribuídas, esta xefatura territorial,

RESOLVE:

Primeiro. Autorizar a Barras Eléctricas Galaico-Asturianas S.A. o establecemento da instalación eléctrica denominada «Peche anel LMT Vilafrime-Moreira», no concello da Fonsagrada, coas seguintes características técnicas principais:

– LMT aérea a 20 kV, cunha lonxitude de 1.485 m, con orixe no apoio metálico proxectado, nº 1 no proxecto, en condutor LA 110 e final no apoio metálico proxectado nº 10, sobre apoios de formigón (3) e metálicos (7).

Segundo. Aprobar o proxecto de execución da instalación eléctrica «Peche anel LMT Vilafrime-Moreira», visado o día 18 de xaneiro de 2012 co número CO120091 polo ICOIIG da Coruña, e asinado polo enxeñeiro industrial Jesús Roibas Rodil, colexiado nº 456.

Terceiro. Declarar a utilidade pública, en concreto, da instalación eléctrica obxecto do presente expediente, o que implica a necesidade de ocupación dos bens ou da adquisición dos dereitos afectados e a urxente ocupación para os efectos do artigo 52 da Lei de expropiación forzosa. Por isto, en cumprimento do disposto neste artigo, acórdase que o representante da Administración dea comezo, na data e hora que a cada interesado se lle notificará individualmente, ao levantamento das actas previas á ocupación dos predios contidos na relación de bens e dereitos publicada no xornal El Progreso do 4 de outubro de 2012, no Boletín Oficial da provincia de Lugo do 10 de outubro e no Diario Oficial de Galicia do 19 de outubro, expostas no taboleiro de anuncios desta xefatura territorial e no taboleiro de anuncios do Concello da Fonsagrada. Así mesmo, faise constar que ata o momento do levantamento das actas previas se poderán formular as alegacións que se consideren oportunas, para os efectos de rectificar posibles erros na relación de bens afectados que foi obxecto de publicación nos medios e nas datas anteriormente referidos. Estas alegacións deberanse presentar por escrito perante esta Xefatura Territorial de Economía e Industria, (Edificio Administrativo da Xunta de Galicia en Lugo, rolda da Muralla, 70, código postal 27071, Lugo).

Todo isto de acordo coas condicións seguintes:

Primeira. As instalacións que se autorizan terán que realizarse de acordo coas especificacións e cos planos que figuran no proxecto «Peche anel LMT Vilafrime-Moreira» presentado pola empresa Barras Eléctricas Galaico-Asturianas, S.A.

Segunda. O peticionario asegurará o mantemento e a vixilancia correcta das instalacións durante a construción e despois da súa posta en servizo, co fin de garantir que en todo momento se manteñán as condicións regulamentarias de seguranza con carácter permanente.

Terceira. Deberase cumprir canto establece a lexislación técnica de liñas eléctricas de alta tensión e as súas instrucións técnicas complementarias, de acordo co Real decreto 223/2008, do 15 de febreiro, así como, de ser o caso, a lexislación aplicable ás instalacións de baixa tensión e as súas instrucións técnicas complementarias, de acordo co Real decreto 842/2002, do 2 de agosto, ademais do resto de normativa e directrices vixentes que sexan de aplicación.

Cuarta. Para introducir modificacións nas instalacións que afecten datos básicos do proxecto será necesaria autorización previa desta xefatura territorial.

Quinta. O prazo para a execución das instalacións que se autorizan será de doce meses, contados a partir da data de notificación/publicación desta resolución.

Sexta. A Administración reserva para si o dereito de deixar sen efecto esta autorización por calquera das causas establecidas no artigo 34 do Decreto 1775/1967, do 22 de xullo, por incumprimento das condicións impostas ou por calquera outra causa excepcional que o xustifique.

Sétima. Esta autorización outórgase sen prexuízo de terceiros e independentemente das autorizacións, licenzas ou permisos de competencia municipal, provincial o outros necesarios para a realización das obras das instalacións autorizadas.

A publicación desta resolución realízase tamén para os efectos previstos no artigo 59.4 da Lei 30/1992, do 26 de novembro, do réxime xurídico das administracións públicas e do procedemento administrativo común (modificada pola Lei 4/1999, do 13 de xaneiro) cando os titulares dos predios propostos sexan descoñecidos, non se saiba o lugar de notificación, ou ben, tentada a notificación, non se puidese realizar e, así, dirixir ao Ministerio Fiscal as dilixencias que se produzan de conformidade co establecido no artigo 5 da Lei de expropiación forzosa de 1954.

Contra esta resolución, que non é definitiva en vía administrativa, cabe interpoñer recurso de alzada ante o conselleiro de Economía e Industria no prazo dun mes contado a partir do día seguinte ao da súa notificación/publicación nos termos establecidos nos artigos 107, 110, 114 e 115 da Lei 30/1992, do 26 de novembro, de réxime xurídico das administracións públicas e do procedemento administrativo común (modificada pola Lei 4/1999, do 13 de xaneiro) sen prexuízo de que os interesados poidan interpoñer calquera outro recurso que consideren pertinente.

Lugo, 7 de xaneiro de 2013

José Manuel Vázquez Leirado
Xefe territorial de Lugo