O Parlamento galego, en exercicio da competencia asumida ao abeiro da Constitución española e do Estatuto de autonomía, aproba a Lei 3/1996, do 10 maio, de protección dos Camiños de Santiago, que, no seu artigo primeiro, dispón: «para os efectos da presente lei, enténdese como Camiño de Santiago todas as rutas históricas recoñecidas documentalmente». No punto terceiro dese mesmo artigo sinálase como ruta principal o denominado Camiño Francés, e no cuarto lese o seguinte: «as outras rutas que se enmarcan na denominación xeral de Camiño de Santiago correspóndense coas actualmente coñecidas como Camiño Portugués, Ruta da Prata, Camiño do Norte, Camiño de Fisterra, Camiño Inglés e Ruta do Mar de Arousa e Ulla».
O artigo 5 da devandita lei establece o procedemento para a delimitación deses Camiños, que se levará a cabo mediante expediente incoado para o efecto. En aplicación del, nos anos 2011 e 2012 o Consello da Xunta aproba as delimitacións do Camiño de Santiago Francés e a ruta interior do Camiño do Norte, e incoa o procedemento para a delimitación do Camiño Inglés, que está pendente de resolución.
Considerando a significación territorial, urbana, cultural e institucional do Concello de Santiago de Compostela e a súa condición singular por confluíren nel cinco rutas do Camiño de Santiago, así como a vertente territorial da protección deste ben de valor patrimonial excepcional, o director xeral do Patrimonio Cultural, mediante Resolución do 21 de novembro de 2011, dispón que se realice un estudo específico para analizar desde un punto de vista integral a incidencia dos Camiños de Santiago sobre o territorio deste concello e o seu planeamento urbanístico, para os efectos de determinar a conveniencia de incoar un procedemento de delimitación conxunto para todos os tramos que discorren polo termo municipal de Compostela.
Rematado o devandito estudo, é sometido á consideración do Comité Asesor do Camiño de Santiago, que, na súa reunión do 18 de decembro de 2012, acorda emitir informe favorable á proposta de delimitación dos Camiños de Santiago no termo municipal de Santiago de Compostela, agás o Camiño Francés e o Inglés.
Por todo o cal, tendo en conta o interese de iniciar un expediente conxunto para este concello e atendendo ao parecer do Comité Asesor do Camiño de Santiago, de conformidade co disposto na Lei 3/1996, do 10 maio, de protección dos camiños de Santiago, e demais normas de aplicación, en virtude das competencias que teño atribuídas no Decreto 337/2009, do 11 de xuño, modificado polo Decreto 110/2010, do 1 de xullo,
RESOLVO:
Primeiro. Incoar o procedemento de delimitación dos tramos do Camiño de Santiago do Norte, Portugués, Ruta da Prata e Camiño de Fisterra ao seu paso polo termo municipal de Santiago de Compostela, segundo a proposta que se concreta no anexo que se xunta a esta resolución.
Segundo. Acordar a apertura do trámite de información pública por un período de dous meses, contando desde o día seguinte á publicación desta resolución no DOG, durante o cal se poderá examinar o expediente nas dependencias do Servizo de Planeamento e Inventario da Dirección Xeral do Patrimonio Cultural da Consellería de Cultura, Educación e Ordenación Universitaria (Edificio Administrativo San Caetano, bloque 3-2º, Santiago de Compostela), e nas oficinas municipais que o Concello de Santiago de Compostela dispoña para estes efectos.
O expediente estará integrado pola seguinte documentación:
– Informe técnico do 21 de novembro 2011 en relación á protección singularizada dos Camiños de Santiago no termo municipal de Santiago de Compostela.
– Separata do estudo conxunto sobre os Camiños de Santiago nos tramos que discorren polo seu termo municipal, comprensiva da seguinte información para cada unha das rutas obxecto deste expediente: xustificación dos trazados e delimitación do territorio histórico proposto, descrición pormenorizada do percorrido e gráficos sobre o estado de conservación, listaxe de elementos patrimoniais incluídos no territorio histórico, anexo fotográfico e planos a escala 1:10.000.
– Certificado do correspondente acordo do Comité Asesor do Camiño de Santiago adoptado na sesión do 18 de decembro de 2012.
Terceiro. Notificar esta resolución ao concello de Santiago de Compostela e anunciala no Diario Oficial de Galicia.
Santiago de Compostela, 11 de xaneiro de 2013
José Manuel Rey Pichel
Director xeral do Patrimonio Cultural