O Concello Pleno, en sesión do 21 de decembro de 2012, acordou aprobar inicialmente o Plan xeral de ordenación municipal de Sada, redactado pola empresa Monteoliva Arquitectura, S.L.P.
Consonte o previsto no artigo 85.2 da Lei 9/2002, do 30 de decembro, de ordenación urbanística e protección do medio rural de Galicia (LOUGA), o dito documento aprobado inicialmente con todos os documentos integrantes do expediente, incluído o informe de sustentabilidade ambiental, sométese a un período de consultas e de exposición ao público polo prazo de dous meses, contados a partir do día seguinte á publicación do anuncio no Diario Oficial de Galicia, durante o cal os interesados poderán examinalo e presentar cantas alegacións consideren convenientes, para o que estará á súa disposición na oficina municipal habilitada para tal efecto no Servizo Municipal de Urbanismo do Concello de Sada, en horario de atención ao público de luns a venres, das 9.00 ás 14.30 h.
Así mesmo, nos termos previstos no artigo 77.2 da LOUGA e 118.1 e 120.1 do Regulamento de planeamento urbanístico, aprobado polo Real decreto 2159/1978, do 23 de xuño, o dito acordo comportou a suspensión de licenzas polo prazo máximo de dous anos contados desde a data da adopción do dito acordo plenario naqueles ámbitos do territorio obxecto de planeamento cuxas novas determinacións supuxeron a modificación da ordenación urbanística vixente. As áreas afectadas pola suspensión son as que se determinan no informe e plano de suspensión de licenzas elaborados polo equipo redactor con data do 10 de decembro de 2012 que consta no expediente. Segundo o dito informe abrangue as seguintes:
As licenzas obxecto de suspensión serán as relativas á parcelación de terreos, reformas, ampliacións, novas edificacións de soares vacantes ou para a demolición ou baleirado e nova edificación en parcelas ocupadas por edificios existentes, coa excepción dos seguintes ámbitos:
a) Solo de núcleo rural: poderanse outorgar licenzas para os proxectos que cumpran simultaneamente coas condicións da disposición transitoria primeira da LOUGA, da ordenación urbanística provisional en vigor e do PXOM que se aproba inicialmente.
b) Solo urbano: poderanse outorgar licenzas para os proxectos que, contando con normas zonais similares, cumpran simultaneamente coa ordenación urbanística provisional de Sada e co PXOM aprobado inicialmente, así como coa LOUGA. Aplicarase nas seguintes ordenanzas:
– Ordenanza 1: urbano residencial en cuarteirón con patio.
– Ordenanza 2: urbano residencial en cuarteirón compacto.
– Ordenanza IU-Industrial.
Suspenderanse as licenzas no resto das seguintes ordenanzas:
– Ordenanza 3: urbano residencial de transición de cuarteirón.
– Ordenanza 4: urbano residencial nos casos de Riovao, Sada de Arriba e Pazos.
– Ordenanza 5: urbano residencial do núcleo de Fontán.
– Ordenanza 6: urbano de baixa densidade.
– Ordenanza 7: urbano de edificación unifamiliar en ringleira baixo rasante da estrada Sada-Betanzos.
– Ordenanza 8: urbano especial.
No solo urbano non consolidado suspéndense as licenzas.
c) Ámbitos de planeamento susbsistentes: poderanse outorgar licenzas nos seguintes ámbitos de planeamento subsistente:
– Plan parcial de ordenación do SAUR-3 na praia de San Pedro de Veigue, aprobado definitivamente o 14 de xuño de 1996.
– Plan parcial de ordenación do SAUR-6 en Souto da Igrexa, Meirás, aprobado definitivamente o 1 de xuño de 1995.
– Plan parcial de ordenación do SAUR-8 en Meirás, aprobado definitivamente o 25 de xaneiro de 2001.
– Plan parcial de ordenación do SAUR-10 en Fortiñón, aprobado definitivamente o 20 de outubro de 1995.
– Plan parcial de ordenación do solo industrial na Ferradura, aprobado definitivamente o 22 de outubro de 1992.
– Plan parcial de ordenación da actuación industrial no Espírito Santo, nos municipios de Sada e Cambre, aprobado definitivamente o 7 de outubro de 1992.
– Proxecto sectorial ASPACE.
d) Elementos catalogados: poderanse outorgar licenzas para os proxectos que se autoricen simultaneamente pola ordenación urbanística provisional vixente e polo aprobado inicialmente, segundo o nivel de catalogación que corresponda.
e) Equipamentos: poderanse outorgar licenzas para os proxectos que cumpran simultaneamente coas condicións da ordenación provisional vixente e o PXOM que se aproba inicialmente.
f) Porto Sada-Fontán: o ámbito do porto non está afectado pola suspensión de licenzas.
Igualmente, o Concello Pleno ordenou a interrupción do procedemento de outorgamento das referidas licenzas, e a notificación deste acordo persoalmente aos que presentasen solicitudes de licenza con anterioridade á data.
Sada, 7 de xaneiro de 2013
Ernesto Anido Varela
Alcalde
