Mediante o Decreto 202/2012, do 18 de outubro, creouse a Axencia Tributaria de Galicia e aprobouse o seu estatuto. A Axencia Tributaria de Galicia é unha axencia pública autonómica das previstas e reguladas na Lei 16/2010, do 17 de decembro, de organización e funcionamento da Administración xeral e do sector público autonómico de Galicia.
De acordo co disposto no artigo 19 do Estatuto, a Axencia Tributaria de Galicia estrutúrase en áreas e departamentos por razón da materia e en función dos distintos ámbitos de actuación, así como en unidades centrais e delegacións, para o efecto da desconcentración das funcións que así o requiran e de acordo co delimitado por orde da consellería competente en materia de facenda e coas instrucións e directrices emitidas pola Dirección.
Pola súa banda, o artigo 20 do Estatuto sinala que o ámbito territorial das delegacións da Axencia Tributaria de Galicia será o delimitado por orde da consellería competente en materia de facenda.
Finalmente, o artigo 30 do Estatuto establece que todos os órganos e unidades administrativas da Axencia Tributaria de Galicia que limiten o seu ámbito territorial a unha delegación dependerán da persoa titular desta.
Por isto, en virtude das atribucións que me confire a Lei 1/1983, do 22 de febreiro, de normas reguladoras da Xunta e da súa Presidencia,
DISPOÑO:
Artigo único
O ámbito territorial das delegacións da Coruña, Lugo e Ourense da Axencia Tributaria de Galicia será delimitado pola respectiva provincia. Corresponden á Delegación de Pontevedra todos os concellos da provincia coa excepción de Vigo, Baiona, Gondomar, Nigrán, Ponteareas, Arbo, Covelo, Crecente, A Cañiza, As Neves, Mondariz, Mondariz-Balneario, Salvaterra de Miño, Redondela, Fornelos de Montes, Mos, Pazos de Borbén, Soutomaior, Tui, O Rosal, A Guarda, Oia, O Porriño, Salceda de Caselas e Tomiño, os cales conforman o ámbito territorial da Delegación de Vigo.
Disposición derradeira única
A presente orde entrará en vigor o 1 de xaneiro de 2013.
Santiago de Compostela, 19 de decembro de 2012
Elena Muñoz Fonteriz
Conselleira de Facenda