De acordo co artigo 11 da Resolución do 1 de decembro de 2011 pola que se estableceron as bases reguladoras e se anunciou a convocatoria anticipada de subvencións a proxectos de enerxías renovables, con financiamento procedente do Programa operativo Feder-Galicia 2007-2013 (DOG núm. 236, do 13 de decembro), aquelas solicitudes que reuniron os requisitos e a documentación exixibles polas bases foron obxecto de valoración técnica pola comisión prevista no artigo 12.
O procedemento administrativo de concesión fixado no artigo 1 das bases é o de concorrencia competitiva, polo que unha vez valoradas todas as solicitudes estableceuse unha orde de prelación segundo a puntuación outorgada a cada unha delas, de maior a menor, nas diversas tipoloxías descritas no anexo I (Normas por tecnoloxía aplicada).
Debido á limitación do crédito dispoñible foron subvencionados os proxectos cunha maior puntuación, permanecendo as restantes solicitudes á espera de poder acceder á axuda en función das circunstancias previstas no artigo 30 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, ou de posibles renuncias das persoas físicas ou xurídicas que si resultaron beneficiarias. Algunhas destas solicitudes obtiveron posteriormente a axuda.
Rematado o prazo de xustificación dos investimentos, sobre a base do disposto no artigo 42.1 da Lei 30/1992, do 26 de novembro, de réxime xurídico das administracións públicas e do procedemento administrativo común,
RESOLVO:
Proceder ao arquivo das solicitudes que sendo viables tecnicamente non puideron acceder á axuda por insuficiencia de crédito orzamentario.
A listaxe completa de expedientes arquivados, por tipoloxía de actuación, publicarase na páxina web do Instituto Enerxético de Galicia (www.inega.es) e no taboleiro de anuncios situado na planta baixa da sede desta entidade pública, na rúa Avelino Pousa Antelo nº 5-San Lázaro, en Santiago de Compostela.
Contra a presente resolución, que pon fin á vía administrativa, poderase interpoñer recurso contencioso-administrativo ante o Xulgado do Contencioso-Administrativo de Santiago de Compostela, no prazo de dous (2) meses contado desde o día seguinte ao da súa publicación ou notificación, de acordo co previsto nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa. Potestativamente, e con carácter previo, pódese interpoñer recurso administrativo de reposición ante o mesmo órgano que ditou o acto, no prazo dun (1) mes contado do mesmo xeito, tal e como dispoñen os artigos 116 e 117 da Lei 30/1992, do 26 de novembro, de réxime xurídico das administracións públicas e do procedemento administrativo común, sen prexuízo doutros recursos que se xulguen oportunos.
Santiago de Compostela, 30 de novembro de 2012
Eliseo Diéguez García
Director do Instituto Enerxético de Galicia