O artigo 151.2 da Lei 5/1997, do 22 de xullo, de Administración local de Galicia sinala que para a disolución dun consorcio se seguirán as mesmas regras e o mesmo procedemento que o establecido nos artigos 143 e 144 da citada lei para a disolución das mancomunidades.

Así, o artigo 143 da Lei 5/1997, do 22 de xullo, sinala que, nos supostos de disolución dunha entidade local, a iniciativa corresponderá ao Pleno do Consorcio, de oficio ou por instancia dos concellos que o constitúen. Este acordo someterase a información pública polo prazo dun mes e a informe da deputación ou deputacións provinciais respectivas e da consellería competente en materia de réxime local. Rematado o prazo de exposición pública e recibidos os informes, someterase o acordo de disolución aos plenos dos entes consorciados, resolvéndose ademais as alegacións presentadas ao respecto. O dito acordo requirirá o voto favorable da maioría absoluta do número legal de membros de cada unha das corporacións das entidades que integran o Consorcio.

Aprobado o acordo de disolución, pola maioría das entidades consorciadas, o presidente do Consorcio remitirá copia certificada dos acordos á consellería competente en materia de réxime local, para a súa publicación no Diario Oficial de Galicia, e comunicarallos á Administración central do Estado para os efectos establecidos pola lexislación básica de réxime local.

Deste xeito, o pleno do Consorcio contra Incendios e Salvamento da Comarca do Salnés en sesión extraordinaria, celebrada o 22 de setembro de 2011, aprobou iniciar o procedemento de disolución do Consorcio. O citado acordo foi sometido a informe da Consellería de Presidencia, Administracións Públicas e Xustiza e da Deputación Provincial de Pontevedra e debe someterse á ratificación por parte da maioría das entidades consorciadas que, en virtude do artigo 1 do Decreto 226/2002, do 20 de xuño, polo que se aproba a constitución do Consorcio contra Incedios e Salvamento das Comarcas do Salnés, e os seus estatutos, son a Xunta de Galicia, a Deputación Provincial de Pontevedra e os concellos de Cambados, O Grove, A Illa de Arousa, Meaño, Meis, Ribadumia, Sanxenxo, Vilagarcía de Arousa e Vilanova de Arousa.

O secretario do Consorcio remitiu á Consellería de Presidencia, Administracións Públicas e Xustiza copia certificada dos acordos de disolución do consorcio para os efectos da súa íntegra publicación no Diario Oficial de Galicia.

Os devanditos acordos adoptáronse, conforme o recollido na Lei 5/1997, do 22 de xullo, de Administración local de Galicia.

O Pleno do Concello de Ribadumia aprobou, en sesión extraordinaria do 21 de decembro de 2011, por maioría absoluta dos membros presentes da corporación, a disolución do Consorcio contra Incendios e Salvamento da Comarca do Salnés e a súa posterior integración no Consorcio Provincial.

O Pleno do Concello de Meis, o 29 de novembro de 2011 adoptou, por maioría absoluta dos membros da Corporación, a disolución do Consorcio contra Incendios e Salvamento da Comarca do Salnés para a súa posterior integración no Consorcio Provincial.

O Pleno do Concello de Sanxenxo aprobou, na sesión ordinaria do pleno do día 1 de decembro de 2011, por maioría absoluta do número legal dos membros da corporación, a disolución do consorcio para o Servizo contra Incendios e Salvamento da Comarca do Salnés para a súa posterior integración no Consorcio Provincial.

O Pleno do Concello de Vilanova de Arousa adoptou, en sesión ordinaria do 28 de novembro de 2011, por maioría absoluta do número legal dos membros da corporación, o acordo de disolución do Consorcio contra Incendios e Salvamento da Comarca do Salnés e a súa posterior integración con efectos do 1 de xaneiro de 2012 no Consorcio Provincial.

O Pleno do Concello da Illa de Arousa, en sesión ordinaria do 12 de xaneiro de 2012 acordou, por maioría absoluta dos membros da corporación, o acordo de disolución do Consorcio contra Incendios e Salvamento da Comarca do Salnés e a súa posterior integración con efectos do 1 de xaneiro de 2012 no Consorcio Provincial de Pontevedra.

O Pleno do Concello do Grove, en sesión ordinaria do 26 de xaneiro de 2012 acordou, por maioría de votos, a disolución do Consorcio contra Incendios e Salvamento da Comarca do Salnés e a súa posterior integración, con efectos do 1 de xaneiro de 2012 no Consorcio Provincial de Pontevedra.

O Pleno de Concello de Meaño, en sesión ordinaria do 12 de decembro de 2011 acordou, por unanimidade, a disolución do Consorcio contra Incendios e Salvamento da Comarca do Salnés e a súa posterior integración con efectos do 1 de xaneiro de 2012 no Consorcio Provincial de Pontevedra.

O Pleno do Concello de Vilagarcía de Arousa, en sesión ordinaria do 29 de decembro de 2011, acordou, por maioría absoluta dos seus membros, a disolución do Consorcio contra Incendios e Salvamento da Comarca do Salnés e a súa posterior integración con efectos do 1 de xaneiro de 2012 no Consorcio Provincial de Pontevedra.

O Pleno do Concello de Cambados, en sesión celebrada o día 22 de decembro de 2011, acordou, por unanimidade dos membros da Corporación, a disolución do Consorcio para o Servizo contra Incendios e Salvamento para a Comarca do Salnés e a súa posterior integración no Consorcio Provincial de Pontevedra con efectos do 1 de xaneiro de 2012.

O Consello da Xunta de Galicia adoptou, na súa reunión do 18 de outubro de 2012, o acordo polo que se ratifica a disolución do Consorcio contra Incendios e Salvamento da Comarca do Salnés, así como a súa posterior integración no Consorcio Provincial de Pontevedra, con efectos do 1 de xaneiro de 2012.

Santiago de Compostela, 25 de outubro de 2012

José Norberto Uzal Tresandí
Director xeral de Administración local