Antecedentes.

1. Na Comunidade Autónoma de Galicia están a desenvolverse a día de hoxe distintos esquemas de certificación de calidade do leite cru de vaca. Os responsables destes solicitaron á Consellería do Medio Rural e do Mar o recoñecemento de cada un dos esquemas que están a implantar nas explotacións:

– Higinio Mougán Bouzón, con NIF 23243760C, en representación da unión de cooperativas Asociación Galega de Cooperativas Agrarias (Agaca), NIF F15156557, solicitou o recoñecemento do esquema de certificación de calidade Referencial de produto: leite de vaca certificado de cooperativa.

– Juan Carlos Castro Lage, con NIF 33317313L, en representación de Servizos Gandeiros Centrais de Galicia, S. Coop. Galega, NIF F27420429, solicitou o recoñecemento do esquema de certificación de calidade Certificación de produto leite e produtos lácteos de leite de vaca.

– Abel Torres Campos, en representación da Asociación de Produtores de Leite Grupo Álvarez, con NIF G27363357, solicitou o recoñecemento do esquema de certificación de calidade Certificación de produto leite de vaca e produtos lácteos de leite de vaca.

– Pedro Rivas Andión, en representación da Asociación de Gandeiros de Vacún Ribeiras do Miño, con NIF G27272673, solicitou o recoñecemento do esquema de certificación de calidade Certificación de produto leite de vaca e produtos lácteos de leite de vaca.

2. Os esquemas, en todos os casos implican uns requisitos superiores aos exixidos na normativa xeral no relativo a unha calidade hixiénico-sanitaria de leite máis aló dos requisitos legais obrigatorios, concretamente inclúen entre os seus requisitos unha exixencia de calidade hixiénica referida ao leite cru de vaca compatible cos seguintes criterios:

• Colonias de xermes a 30° C (por ml): ≤ 50.000.

• Contido de células somáticas (por ml): ≤ 350.000.

3. Todas estas entidades, titulares dos seus respectivos esquemas de calidade, teñen a súa sede social e están a desenvolver os seus respectivos esquemas na comunidade autónoma de Galicia.

4. Foron analizados os textos onde se recollen as condicións e requisitos dos esquemas de certificación de calidade citados e comprobouse que estes implican uns requisitos superiores aos exixidos na normativa xeral no relativo a unha calidade hixiénico-sanitaria de leite máis aló dos requisitos legais obrigatorios.

Consideracións legais e técnicas.

Corresponde á Dirección Xeral de Produción Agropecuaria, como autoridade competente en materia de ordenación, fomento e mellora da produción agrogandeira, o recoñecemento, de conformidade co previsto no artigo 15 do Decreto 46/2012, do 19 de xaneiro, modificado polo Decreto 131/2012, do 31 de maio, polo que se establece a estrutura orgánica da Consellería do Medio Rural e do Mar e do Fondo Galego de Garantía Agraria.

Por todo o exposto, e vista a Lei 30/1992, do 26 de novembro, de réxime xurídico das administracións públicas e do procedemento administrativo común, e demais normativa aplicable,

RESOLVO:

Recoñecer, para os efectos de potenciar aquelas figuras de protección da calidade, como esquemas de certificación de calidade do leite cru para o ámbito da Comunidade Autónoma de Galicia, os seguintes sistemas de calidade ás seguintes entidades solicitantes:

– Referencial de produto: leite de vaca certificado de cooperativa de Agaca.

– Certificación de produto leite e produtos lácteos de leite de vaca de Servizos Gandeiros Centrais de Galicia, S. Coop. Galega.

– Certificación de produto leite de vaca e produtos lácteos de leite de vaca da Asociación de Produtores de Leite Grupo Álvarez.

– Certificación de produto leite de vaca e produtos lácteos de leite de vaca da Asociación de Gandeiros de Vacún Ribeiras do Miño.

As condicións e requisitos dos citados sistemas de calidade recóllense nos seguintes enderezos web onde poden ser consultados:

1. Referencial de produto: leite de vaca certificado de cooperativa de Agaca:

http://www.agaca.coop/gl/calidade-docs.asp

2. Para os esquemas:

– Certificación de produto leite e produtos lácteos de leite de vaca de Servizos Gandeiros Centrais de Galicia, S. Coop. Galega.

– Certificación de produto leite e produtos lácteos de leite de vaca da Asociación de Produtores de Leite Grupo Álvarez.

– Certificación de produto leite e produtos lácteos de leite de vaca da Asociación de Gandeiros de Vacún Ribeiras do Miño.

O enlace é:

http://www.madrid.org/cs/Satellite?blobcol=urldata&blobheader=application%2Fpdf&blobheadername1=Content-Disposition&blobheadervalue1=filename%3DFICHA_RESULMEN%5B1%5D.pdf&blobkey=id&blobtable=MungoBlobs&blobwhere=1310929115591&ssbinary=true

Contra a presente resolución, que non pon fin á vía administrativa, poderá interpoñer recurso de alzada ante o secretario xeral de Medio Rural e Montes, no prazo dun mes, contado desde a súa notificación, de acordo co disposto no Decreto 131/2012, do 31 de maio, polo que se modifica o Decreto 46/2012, do 19 de xaneiro, polo que se establece a estrutura orgánica da Consellaría do Medio Rural e do Mar e do Fondo Galego de Garantía Agraria, e o artigo 26.3.c) da Lei 16/2010, do 17 de decembro, de organización e funcionamento da Administración xeral e do sector público autonómico de Galicia.

Esta resolución entrará en vigor o mesmo día da súa publicación no Diario Oficial de Galicia.

Santiago de Compostela, 19 de setembro de 2012

José Álvarez Robledo
Director xeral de Produción Agropecuaria