A Orde do 4 de maio de 2012 pola que se regulan os criterios de repartición e a convocatoria de subvencións de forma individual e mediante o sistema de xestión compartida da liña en concorrencia non competitiva e da liña en concorrencia competitiva, destinadas a entidades locais da Comunidade Autónoma de Galicia, do Fondo de Compensación Ambiental (DOG nº 87, do 8 de maio), detalla no seu artigo 9, relativo ao financiamento destas axudas, a aplicación orzamentaria e o importe económico previsto para elas.
No artigo 28 da mesma orde, en relación co artigo 30.2.b) do Decreto 11/2009, do 8 de xaneiro, polo que se aproba o regulamento da Lei de subvencións de Galicia, establécese a posibilidade de incrementar a dotación orzamentaria destinada ao financiamento destas axudas coas cantidades que resultasen sobrantes en calquera das liñas establecidas na propia orde, para o financiamento daquelas entidades que presentaron, en prazo, solicitude de subvención ao abeiro da liña competitiva. Por outra banda, considerando a regulación contida na Lei 8/2009, do 22 de decembro, pola que se regula o aproveitamento eólico en Galicia e se crean o canon eólico e o Fondo de Compensación Ambiental, resultan elixibles tanto os gastos de investimento como os de custos de funcionamento dos servizos municipais dedicados á protección do ambiente e do espazo natural.
Para o financiamento das subvencións convocadas en virtude da Orde do 4 de maio de 2012, foi preciso situar créditos no capítulo IV e no capítulo VII, asignando as cantidades iniciais de xeito estimativo, sen que fose posible predeterminar os importes que cada entidade ía solicitar con cargo a cada capítulo. Unha vez revisadas as solicitudes presentadas dentro de ambas as liñas, en concorrencia competitiva e en concorrencia non competitiva, as actuacións que se deben executar para o cumprimento da finalidade do Fondo de Compensación Ambiental e do programa orzamentario previsto exixen a adecuación da natureza económica do gasto, e para tal fin procedeuse á distribución definitiva dos créditos iniciais entre as aplicacións orzamentarias que financian esta convocatoria de subvencións.
Finalmente, no artigo 26 da orde establécese como prazo para a realización e xustificación das actuacións subvencionadas o 30 de setembro de 2012. Porén, por causas sobrevidas, o prazo establecido resulta de difícil cumprimento, polo que para facer viable o proceso de execución dos proxectos subvencionados e posibilitar o cumprimento do procedemento de xestión, considerando que non se causa prexuízo a terceiros, é procedente ampliar o dito prazo de execución e xustificación das actuacións subvencionadas.
De acordo coa Lei 9/2007, do 13 de xuño, de subvencións de Galicia, co Decreto 11/2009, do 8 de xaneiro, polo que se aproba o regulamento da Lei de subvencións, co Decreto 7/2011, do 20 de xaneiro, polo que establece a estrutura orgánica da Consellería de Presidencia, Administracións Públicas e Xustiza, e co disposto na Orde do 4 de maio de 2012 pola que se regulan a convocatoria de subvencións e os criterios de repartición do Fondo de Compensación Ambiental,
Dispoño:
Artigo 1
1. Amplíase a dotación orzamentaria que se establece no artigo 9 da Orde do 4 de maio de 2012 pola que se regulan a convocatoria de subvencións e os criterios de repartición do Fondo de Compensación Ambiental, destinada a financiar a liña en concorrencia competitiva.
2. O incremento da dotación será de 334.056,25 euros con cargo á aplicación orzamentaria 05.03.141A.761.0 dos orzamentos xerais da Comunidade Autónoma de Galicia para o ano 2012.
3. De conformidade co previsto no artigo 30.2 do Decreto 11/2009, do 8 de xaneiro, polo que se aproba o regulamento da Lei de subvencións, esta ampliación de crédito non implica a apertura de prazo para presentar novas solicitudes nin o inicio de novo cómputo de prazo para resolver.
Artigo 2
1. A distribución entre créditos orzamentarios da cantidade total destinada a financiar a convocatoria de subvencións, nas liñas en concorrencia competitiva e non competitiva, queda establecida do seguinte xeito:
Descrición |
05.03.141A.461.0 |
05.03.141A.761.0 |
Importe |
Liña en concorrencia non competitiva (artigo 4.1.a) |
428.963,70 |
7.411.313,70 |
7.840.277,40 |
Liña en concorrencia competitiva (artigo 4.1.b) |
169.296,99 |
2.715.759,60 |
2.885.056,59 |
Totais por aplicación orzamentaria |
598.260,69 |
10.127.073,30 |
10.725.333,99 |
2. Segundo o previsto no artigo 31 do Decreto 11/2009, do 11 de xaneiro, esta redistribución de créditos orzamentarios non precisa de nova convocatoria.
Artigo 3
Modifícase o artigo 26.1 da Orde do 4 de maio de 2012, que queda redactado nos seguintes termos:
«O prazo para a realización e xustificación das actuacións subvencionadas remata o 30 de decembro de 2012 (inclusive)».
Disposición derradeira única
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 28 de agosto de 2012
Alfonso Rueda Valenzuela
Conselleiro de Presidencia, Administracións Públicas e Xustiza