En Ponteareas o 2 de decembro de 2010.
Vistos por min, Miguel Seijo Espiño, xuíz titular do Xulgado de Primeira Instancia e Instrución número 2 de Ponteareas, os presentes autos número 744/2009, sobre resolución de contrato e reclamación de cantidade, seguidos polos trámites do xuízo ordinario, entre as seguintes partes:
Demandante: Gumersindo Eiras Pazo. Procuradora: Sra. López Botana. Avogada: Sra. Díaz Alonso.
Demandada: Leonor Asensi Díaz. En situación de rebeldía procesual.
Procede ditar esta sentenza sobre a base da seguinte resolución:
«Que admito a demanda interposta pola procuradora Sra. López Botana, en nome e representación de Gumersindo Eiras Pazo, e dispoño:
– Declaro resolto o contrato de préstamo realizado entre as partes realizado o día 23 de decembro de 2008.
– Condeno a Leonor Asensi Díaz a que lle restitúa a Gumersindo Eiras Pazo a cantidade de oito mil euros (8.000) que foi o obxecto do contrato, así como ao pagamento do xuro pactado nel, ao tipo do 7 %, o cal se entenderá percibido, respecto de cada prazo do préstamo, desde o vencemento e incumprimento pola demandada da obriga do seu pagamento.
– Condeno a Leonor Asensi Díaz ao pagamento das custas causadas nesta instancia.
Lévese o orixinal desta resolución ao libro de sentenzas deste xulgado e déixese no procedemento testemuño bastante».
Notifíquese esta resolución ás partes, fágaselles saber que esta non é firme, e que contra ela cabe interpor recurso de apelación, o cal deberá prepararse ante este xulgado no prazo de cinco días contado desde a súa notificación.
De conformidade coas previsións da disposición adicional 15ª da LO 6/1985, do poder xudicial, introducida pola LO 1/2009, a interposición dun eventual recurso de apelación exixirá, como presuposto previo a esta, que o recorrente consigne xudicialmente un depósito de 50 euros. Tal depósito deberá realizarse na conta do xulgado correspondente a este procedemento, con indicación no recadro «Concepto» do xustificante de ingreso bancario coa palabra «recurso».
Así, ditada esta sentenza, pronúnciao, mándao e asínao Miguel Seijo Espiño, xuíz titular deste xulgado.