O Concello de Ferrol remite a modificación puntual referida, solicitando a súa aprobación definitiva, conforme o previsto no artigo 85.7 da Lei 9/2002, do 30 de decembro, de ordenación urbanística e protección do medio rural de Galicia.

I. Antecedentes.

1. O Concello de Ferrol conta cun Plan xeral de ordenación municipal aprobado definitivamente en data 28.12.2000.

2. Os servizos municipais emitiron informes técnicos do 28.3.2007, 11.4.2007, 16.5.2007 e 22.12.2011; e xurídicos do 22.2.2006, 16.5.2007, 28.7.2009, 21.1.2010, 10.5.2010, 31.1.2011, 27.4.2011, 26.12.2011, 27.12.2011 e 20.1.2012.

3. A modificación non se someteu ao informe previo á aprobación inicial previsto no artigo 85.1 da LOUG, ao abeiro do disposto no artigo 93.4 da LOUG.

4. A modificación proposta foi aprobada inicialmente polo Concello en Pleno en sesión do 30.3.2006; e sometida a información pública polo prazo de dous meses (Diario de Ferrol e La Voz de Galicia do 20.6.2006, e DOG do 26.6.2011). Foron presentadas catro alegacións, segundo certificación da Secretaría municipal emitida o 3.8.2006.

5. O Concello Pleno do 23.5.2007 acordou unha nova aprobación inicial, baseándose no artigo 85.8 da LOUG; que foi sometida a información pública polo prazo de dous meses (Diario de Ferrol e La Voz de Galicia do 2.6.2009, e DOG do 9.6.2009) e notificada ao concello lindeiro de Narón. Foron presentadas catro alegacións, segundo certificación da Secretaría municipal emitida o 17.7.2009.

6. No expediente constan os seguintes informes sectoriais:

a) Dirección Xeral de Patrimonio Cultural, favorable condicionado, do 14.6.2006. Esta dirección xeral emite informe desfavorable sobre o proxecto modificado con data do 22.2.2010, e favorable en datas 9.7.2010 e 2.12.2011.

b) Dirección Xeral de Desenvolvemento Sostible, de data do 19.6.2006, sobre a non produción de efectos significativos na sustentabilidade do seu contorno de afectación.

c) Secretaría Xeral de Calidade e Avaliación Ambiental, de data do 8.9.2009, sobre que non procede o sometemento ao trámite de impacto ou efectos ambientais.

7. O proxecto foi aprobado provisionalmente polo Pleno municipal do 29.12.2011.

II. Obxecto e descrición do proxecto.

A modificación, redactada polos servizos técnicos municipais, pretende a adecuación do planeamento urbanístico á Sentenza do Tribunal Superior de Xustiza de Galicia do 22.7.2004, pola que se anula o PXOM no ámbito correspondente á parcela de Hispania-antiga fábrica de lápis.

III. Análise e consideracións.

Logo de analizar a documentación remitida polo concello, e vista a proposta literal que nesta mesma data eleva a Secretaría Xeral de Ordenación do Territorio e Urbanismo, resulta:

En cumprimento do artigo 93.4 da LOUG, e en canto que a modificación do PXOM altera a forma da zona verde (dotación local) V-39, incrementando a súa superficie de 638 m2 a 746 m2, o presente documento acadou o preceptivo informe favorable previo da Comisión Superior de Urbanismo de Galicia en sesión do 20 de xuño de 2012.

A competencia para resolver sobre a aprobación definitiva do Planeamento xeral correspóndelle ao conselleiro de Medio Ambiente, Territorio e Infraestruturas, de conformidade co disposto nos artigos 89 e 93.4 da LOUG, e no artigo 1 do Decreto 316/2009, do 4 de xuño, polo que se establece a estrutura orgánica da CMATI.

IV. Resolución.

En consecuencia, e visto o que antecede,

RESÓLVESE:

1º Outorgar a aprobación definitiva á modificación do Plan xeral de ordenación municipal do Concello de Ferrol (A Coruña) na parcela de Hispania (antiga fábrica de lápis) de acordo co establecido no artigo 85.7.a) da Lei 9/2002, de ordenación urbanística e de protección do Medio Rural de Galicia.

2º Contra esta orde cabe interpoñer recurso contencioso-administrativo ante a sala correspondente do Tribunal Superior de Xustiza de Galicia, no prazo de dous meses, que se contarán desde o día seguinte ao da súa publicación, segundo dispoñen os artigos 10 e 46 da Lei 29/1998, do 13 de xullo, reguladora da xurisdición contencioso-administrativa.

3º De conformidade co disposto polos artigos 92 da Lei 9/2002, e 70 da Lei 7/1985, do 2 de abril, reguladora das bases de réxime local, o concello deberá publicar no Boletín Oficial da provincia a normativa e ordenanzas da modificación aprobada definitivamente.

4º Notifíquese esta orde ao concello e publíquese no Diario Oficial de Galicia.

Santiago de Compostela, 16 de xullo de 2012

Agustín Hernández Fernández de Rojas
Conselleiro de Medio Ambiente, Territorio e Infraestruturas