O punto 4º do artigo 29 do Decreto 51/2000, do 25 de febreiro, polo que se establece a organización recadatoria da Xunta de Galicia e o Estatuto dos recadadores de zona, indica que a Consellería de Facenda poderá revisar as retribucións dos recadadores de zona cando as circunstancias o aconsellen, en función tanto do número de documentos e o volume de débeda cargada a cada zona como dos gastos dela e as súas circunstancias obxectivas.
Ante a situación económica actual, a Comunidade Autónoma de Galicia viuse obrigada a adoptar unha serie de medidas necesarias para a contención do gasto público en prol da consecución do principio de estabilidade orzamentaria.
Por iso, producidas esas circunstancias, e en uso da autorización contida na disposición derradeira primeira do citado decreto.
DISPOÑO:
Artigo 1
As retribucións dos recadadores de zona serán as que resulten de aplicar sobre a suma dos ingresos que sexan imputables en cada exercicio a cada zona e que corresponden a providencias de constrinximento cun importe cargado que non exceda os 500.000 euros, as seguintes porcentaxes:
De 0 euros a 600.000 euros, o: 18,40 %.
De 600.000,01 euros a 1.200.000 euros, o: 13,80 %.
De 1.200.000,01 euros a 2.100.000 euros, o: 9,20 %.
De 2.100.000,01 euros a 2.400.000 euros, o: 4,60 %.
De 2.400.000,01 euros a 3.000.000 de euros, o: 3,68 %.
De 3.000.000,01 euros a 3.600.000 euros, o: 2,76 %.
De 3.600.000,01 euros a 4.200.000 euros, o: 1,84 %.
A partir de 4.200.000,01 euros, o: 0,92 %.
Artigo 2
Nas providencias de constrinximento cun importe cargado que exceda os 500.000 euros, a retribución dos recadadores establecerase por cada valor aplicando aos ingresos que obteñan a porcentaxe do 0,92 %.
Artigo 3
Fíxase no 0,92 % a porcentaxe a satisfacer sobre o total recadado en período executivo no suposto de recompensas especiais a que se refire o artigo 33.1º do Decreto 51/2000, do 25 de febreiro.
Artigo 4
As retribucións a que se refiren os artigos anteriores non inclúen o imposto sobre o valor engadido.
Disposición derrogatoria única
Queda derrogada a Orde de 15 de xuño de 2005 pola que se fixan as retribucións dos recadadores de zona.
Disposición derradeira única
A presente orde terá efectos desde o día da súa publicación no Diario Oficial de Galicia.
Santiago de Compostela, 31 de xullo de 2012
Elena Muñoz Fonteriz
Conselleira de Facenda