Por Orde da Consellería de Facenda do 14 de abril de 2011 (Diario Oficial de Galicia número 77, do 19 de abril) modificada pola Orde do 30 de marzo de 2012 (Diario Oficial de Galicia núm. 64, do 2 de abril) convocouse concurso para a provisión de postos de traballo vacantes do grupo V de persoal laboral da Administración da Xunta de Galicia.
De conformidade coa disposición transitoria décimo primeira do V convenio colectivo único, a base I.4 da convocatoria prevé unha segunda fase de resultas na cal os traballadores poderán solicitar postos de categoría profesional distinta á de pertenza para as que posúan os requisitos.
A adxudicación dos postos vacantes de categoría distinta á de pertenza do concursante realizarase, consonte a base VII.4, tras a resolución das dúas primeiras fases do concurso e da adxudicación de destino definitivo aos traballadores que superaron os procesos selectivos convocados ao abeiro da oferta de emprego público do ano 2005.
Pola Orde da Consellería de Facenda do 14 de maio de 2012 (DOG número 94, do 18 de maio) resólvense as dúas primeiras fase do concurso e por Orde da Consellería de Facenda do 15 de xuño de 2012 (DOG número 120, do 25 de xuño) adxudícase destino definitivo aos traballadores que superaron os procesos selectivos convocados ao abeiro da oferta de emprego público do ano 2005.
Consonte coa previsión contida na dita base VII.4 procede agora adxudicar os postos vacantes de categoría distinta á de pertenza.
As dificultades que para a adecuada prestación dos servizos xeraría a mobilidade dos traballadores desde os postos de orixe aos postos adxudicados durante os meses en que o persoal laboral debe desfrutar preferentemente das súas vacacións anuais, aconsellan adiar os prazos de cesamento e toma de posesión.
Polo exposto, esta consellería
DISPÓN:
Primeiro. Resolver a segunda fase de resultas do concurso para a provisión de postos vacantes do grupo V de persoal laboral da Administración da Xunta de Galicia convocado pola Orde do 14 de abril de 2011, adxudicando aos/ás traballadores/as que se relacionan os postos de traballo de categoría distinta á de pertenza que se especifican no anexo desta orde.
Segundo. O prazo de toma de posesión comezará a contarse a partir do día seguinte ao do cesamento e será de tres días hábiles se o posto de traballo se atopa na mesma localidade de residencia habitual do concursante ou dun mes se radica en localidade distinta e supón un cambio de residencia debidamente xustificado.
O cesamento deberá efectualo a consellería a que figure adscrito o traballador dentro dos tres días hábiles seguintes ao da publicación no Diario Oficial de Galicia da Orde da Consellería de Facenda pola que se abra o prazo para tal efecto.
Se a adxudicación comporta o reingreso ao servizo activo, o prazo de toma de posesión será dun mes que deberá computarse desde o día seguinte ao da publicación da Orde da Consellería de Facenda pola que se abran os prazos posesorios.
Terceiro. Os destinos adxudicados serán irrenunciables, agás que con anterioridade á finalización do prazo posesorio se obteña outro destino mediante convocatoria pública, ben polo procedemento de libre designación ou polo de concurso, caso en que poderá optar por un dos dous.
Os/as adxudicatarios/as están obrigados/as a comunicar por escrito a opción realizada á Dirección Xeral da Función Pública dentro dos tres días seguintes ao da publicación da Orde da Consellería de Facenda polo que se abren os prazos posesorios.
Os traslados que deriven da resolución deste concurso terán a consideración de voluntarios, en consecuencia non xerarán dereito a indemnización.
Cuarto. Contra esta orde poderase interpor reclamación administrativa ante a Consellería de Facenda no prazo dun mes contado a partir do día seguinte ao da súa publicación no Diario Oficial de Galicia, de conformidade co establecido nos artigos 120 e seguintes da Lei 30/1992, do 26 de novembro, de réxime xurídico das administracións públicas e do procedemento administrativo común.
Santiago de Compostela, 12 de xullo de 2012
Elena Muñoz Fonteriz
Conselleira de Facenda