A xefa do Servizo de Inspección Urbanística III da Axencia de Protección da Legalidade Urbanística ditou, o día 12 de abril de 2012, resolución pola que se acorda a incoación do expediente sancionador 107 C 2012/11-0 a RPA, S.L, como presunto responsable dunha infracción urbanística moi grave, consistente na construción dunha edificación formada por unha estrutura de piares e vigas metálicas e sobre ela unha cuberta de chapa grecada, no monte Laxalba, no termo municipal de Lugo.

Ao non poderse realizar a notificación persoal da resolución, mediante a presente cédula, e ao abeiro do disposto no artigo 59.5 da Lei 30/1992, do 26 de novembro, de réxime xurídico das administracións públicas e do procedemento administrativo común (LRXPAC), notifícase á interesada a dita resolución.

Tendo en conta que, en atención ao previsto no artigo 61 da LRXPAC, o acto non se publica na súa integridade, comunícase á interesada que o texto íntegro do acordo que se notifica se encontra ao seu dispor nas dependencias da Axencia de Protección da Legalidade Urbanística, sita no edificio Witland, 1º andar-Salgueiriños, en Santiago de Compostela, para a súa consulta no prazo de 10 días hábiles, que se contarán desde o día seguinte ao da publicación desta cédula. Transcorrido o devandito prazo, a notificación entenderase producida.

A interesada dispón dun prazo de 15 días para presentar os documentos e xustificacións que considere pertinentes, contados desde o día seguinte a aquel en que se teña producido a notificación e, se é o caso, propor proba concretando de medios de que pretenda valerse.

Para que conste e sirva de notificación á citada interesada, en cumprimento do disposto no artigo 59.5 da citada LRXPAC, expido e asino esta cédula.

Santiago de Compostela, 29 de maio de 2012

José María Domínguez Blanco
Subdirector da Axencia da Protección da Legalidade Urbanística