Aprobado inicialmente o Plan Xeral de Ordenación Municipal por acordo do Pleno do 29 de marzo de 2012, de conformidade cos artigos 85.2 da Lei 9/2002, do 30 de decembro, de ordenación urbanística e protección do medio rural de Galicia, e 7 da Lei 6/2007, do 11 de maio, de medidas urxentes en materia de ordenación do territorio e litoral de Galicia, sométese a información pública polo prazo de dous meses, contados desde o día seguinte ao de publicación do presente anuncio no Diario Oficial de Galicia.

Durante o devandito prazo poderá ser examinado por calquera interesado nas dependencias municipais para que se formulen as alegacións que se consideren pertinentes.

Quedan suspendidas as licenzas para as seguintes áreas:

– Licenzas de parcelacións de terreos, edificacións e demolicións nos ámbitos do territorio en que as novas determinacións recollidas no PXOM supoñan unha modificación substancial da normativa urbanística vixente.

– Todo o solo afectado pola protección de infraestruturas do trazado das vías locais, provinciais e autonómicas.

– Solo clasificable como urbanizable (tanto residencial como industrial comercial).

– Solo clasificado como zona verde.

– Todas as zonas clasificadas como solo rústico de protección de espazos naturais.

– Todo o solo previsto como equipamento ou dotacional, agás que sexa iniciativa municipal, provincial, autonómica ou estatal.

– Todo o solo clasificado como edificable no proxecto de ordenación do medio rural vixente, que o novo planeamento pasa a clasificar como solo rústico con algún tipo de protección.

A duración da suspensión é de dous anos, contados desde a aprobación inicial, e en calquera caso, extinguirase coa aprobación definitiva do planeamento.

A Teixeira, 23 de abril de 2012.

Miguel Antonio Cid Álvarez
Alcalde