Por Orde do Ministerio de Comercio do 14 de febreiro de 1974 (BOE núm. 75, do 28 de marzo) creáronse, entre outros, os polígonos de viveiros denominados «A», «B», «C», «D», «E», «F», «G» e «H» do distrito marítimo do Grove, provincia marítima de Vilagarcía.

Por Orde da Consellería de Pesca, Marisqueo e Cultivos Mariños do 1 setembro de 1986 (DOG núm. 184, do 23 de setembro) foi declarado de interese marisqueiro e urxente execución o procedemento de revisión e reordenación dos polígonos «D», «E», «G» e «H» do Grove na provincia marítima de Vilagarcía, aos que posteriormente se engade o polígono «C» mediante a Orde do 19 de setembro de 1986 (DOG núm. 6, do 12 de xaneiro de 1987). Así mesmo, a revisión e reordenación dos polígonos «A», «B», «F» do Grove na provincia marítima de Vilagarcía, foi declarado de interese marisqueiro e urxente execución por Orde da Consellería de Pesca, Marisqueo e Cultivos Mariños do 23 de xaneiro de 1987 (DOG núm. 24, do 5 de febreiro).

En aplicación do sinalado na disposición reguladora, rematada a publicación do acordo de reordenación, a Dirección Xeral de Marisqueo e Acuicultura sinalou as datas e condicións en que se efectuaría o traslado á nova localización dos viveiros, aínda que debido á aparición de causas sobrevidas nas novas áreas de cultivo o fondeo dos viveiros nas cuadrículas asignadas no acordo non se puido levar a efecto.

Coa finalidade de solucionar a problemática xurdida e dentro do obxectivo de acadar un desenvolvemento eficaz e sustentable na zona marítima, o Consello da Xunta de Galicia, na súa reunión do 4 de febreiro de 2010, dispuxo entre outras medidas a de que se levase a cabo unha nova reordenación dos polígonos de viveiros do distrito marítimo do Grove.

Por todo isto, esta consellería, de acordo co regulado no artigo 20 do Decreto 406/1996, do 7 de novembro, polo que se aproba o Regulamento de viveiros de cultivos mariños nas augas de Galicia,

DISPÓN:

Artigo 1.

Declárase de urxente tramitación o procedemento de reordenación dos polígonos de viveiros do distrito marítimo do Grove, provincia marítima de Vilagarcía (Pontevedra).

Artigo 2.

O procedemento levarase a cabo conforme o establecido no capítulo II do título II do Decreto 423/1993, do 17 de decembro, polo que se refunde a normativa vixente en materia de marisqueo, extracción de algas e cultivos mariños (DOG núm. 13, do 20 de xaneiro de 1994), en aplicación do sinalado no artigo 20 do Decreto 406/1996, do 7 de novembro, polo que se aproba o Regulamento de viveiros de cultivos mariños nas augas de Galicia.

Artigo 3.

O procedemento de reordenación será obrigatorio para todos os propietarios ou titulares dos viveiros situados dentro dos límites dos polígonos sinalados no artigo 1, de conformidade co previsto no apartado 2 do artigo 30 do Decreto 423/1993, do 17 de decembro.

Disposición derradeira primeira.

Autorízase a Secretaría Xeral do Mar para ditar cantas instrucións sexan necesarias para o desenvolvemento desta orde.

Disposición derradeira segunda.

Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 4 de abril de 2012.

Rosa María Quintana Carballo
Conselleira do Medio Rural e do Mar