Antecedentes de feito.

Primeiro. Con data 13 de xullo de 1994, a Dirección Xeral de Industria resolveu autorizarlle a instalación dunha planta de coxeración de enerxía eléctrica á empresa Financiera Maderera, S.A. no municipio de Padrón (A Coruña) e concederlle a condición de autoxerador eléctrico.

Segundo. Con data 28 de marzo de 1996, a Dirección Xeral de Industria resolveu aprobar o proxecto reformado de execución da planta de coxeración citada, que ten as seguintes características técnicas básicas:

– Dous motores de combustión interna de fuel óleo de 7.240 kW de potencia c/u.

– Dous xeradores eléctricos de 7.450 kVA c/u e tensión de xeración 6 kV.

– Un transformador de potencia de 25 MVA, r/t 66/6 kV.

– Liñas subterráneas de conexión dos xeradores coa subestación eléctrica propia.

– Aparellaxe eléctrica de protección, mando, sinalización e medida.

Terceiro. Con data 31 de maio de 2010, Financiera Maderera, S.A. solicitou autorización administrativa e aprobación do proxecto de execución para unha modificación substancial da instalación de coxeración de referencia.

Cuarto. Con data 3 de novembro de 2010 publicouse no Boletín Oficial da provincia da Coruña n.º 209, e con data 9 de novembro de 2010 no Diario Oficial de Galicia n.º 215, a solicitude de autorización administrativa indicada no antecedente de feito terceiro, sen que conste que se presentase ningunha alegación. As características da instalación son as seguintes:

Solicitante: Financiera Maderera, S.A. (Finsa).

Enderezo social: estrada N-550, km 57, 15890 Santiago de Compostela (A Coruña).

Denominación: substitución de motor de coxeración Finsa-Padrón.

Situación: Padrón.

Características técnicas:

– Substitución e adaptación dun dos motores de fuel existentes por un único motor-xerador a gas natural de 9.780 kWe, cos correspondentes equipamentos de control e modificación para a adaptación ás instalación existentes.

– Instalación de tanque de aceite de lubricación e reformas en circuíto de lubricación existente e ampliación do intercambiador de placas actual.

– Modificación nas unidades de refrixeración de alta e baixa temperatura, circuíto de aire en carga, circuíto de ventilación, saída de gases de escape.

– Modificación das sección dos cables, proteccións e control de 6 kV.

Quinto. Con data 29 de novembro de 2010, Financiera Maderera, S.A. presenta acordo de compra de equipos por importe superior ao 50% do orzamento do proxecto.

Sexto. Con data 2 de febreiro de 2011, o Departamento Territorial da Consellería de Economía e Industria da Coruña emitiu informe favorable á solicitude presentada.

Fundamentos de dereito.

Primeiro. O artigo 28 da Lei 54/1997 establece que a construción, explotación, modificación substancial, a transmisión e o peche de instalacións de produción de enerxía eléctrica en réxime especial estará sometida ao réxime de autorización administrativa previa, que terá carácter regrado, e corresponderalle o seu outorgamento á Administración autonómica.

Segundo. O artigo 28 do Decreto 324/2009, do 11 de xuño, polo que se establece a estrutura orgánica da Consellería de Economía e Industria, atribúelle á Dirección Xeral de Industria, Enerxía e Minas a dirección, coordinación, planificación, execución, seguimento e control das competencias e funcións da consellería en materia de enerxía.

Terceiro. A disposición transitoria terceira do Real decreto 1565/2010, do 19 de novembro, polo que se regulan e modifican determinados aspectos relativos á actividade de produción de enerxía eléctrica en réxime especial, establece que as solicitudes de autorización dunha modificación substancial dunha instalación presentadas con anterioridade á entrada en vigor deste real decreto poderán tramitarse e resolverse conforme a normativa vixente no momento da presentación da dita solicitude, sempre que o titular da instalación dispoña dun acordo de compra asinado entre o promotor da instalación e o fabricante ou subministrador de equipos correspondente para a adquisición de equipos por un importe equivalente polo menos ao 50 por cento do valor da totalidade destes fixado no proxecto de instalación. Este é o caso desta modificación substancial, pois foi solicitada con data 31 de maio de 2010 e presentouse acordo de compra de equipos por importe superior ao 50% do orzamento do proxecto con data 29 de novembro de 2010.

Cuarto. Na tramitación tivéronse en conta as normas de procedemento contidas no Real decreto 1955/2000, do 1 de decembro, no Real decreto 661/2007, do 25 de maio, na Orde da Consellería de Economía e Industria do 14 de decembro de 2009, pola que se regulan os criterios para aplicar o concepto de modificación substancial valorada con criterio de reposición que recolle o artigo 4.3.º do Real decreto 661/2007, do 25 de maio, na Lei 30/1992, do 26 de novembro, de réxime xurídico das administracións públicas e do procedemento administrativo común, e demais normas vixentes de aplicación.

De acordo co que antecede,

RESOLVO:

Primeiro. Autorizar administrativamente a Financiera Maderera, S.A. a modificación substancial da planta de coxeración que posúe nas súas instalacións de Padrón (A Coruña).

Segundo. Aprobar o proxecto de execución da dita modificación, «Substitución motor de coxeración en Finsa-Padrón», asinado polo enxeñeiro industrial José Manuel Fernández Bouzo, colexiado número 859, e visado polo Colexio Oficial de Enxeñeiros Industriais de Galicia-A Coruña o 12 de maio de 2010 co número C0101308, e «Proxecto de desmantelamento motor substituído», asinado polo enxeñeiro industrial José Manuel Fernández Bouzo, colexiado número 859, e visado polo Colexio Oficial de Enxeñeiros Industriais de Galicia-A Coruña o 4 de xuño de 2010 co número C0101608.

Terceiro. A planta de coxeración deberá dispoñer no seu punto de conexión dun relé direccional que limite a potencia activa vertida á rede a 11.980 kW, e cun retardo de disparo de 2 segundos.

Todo isto de acordo coas seguintes condicións:

Primeira. As instalacións que se autorizan terán que realizarse de acordo coas especificacións e planos que figuran no proxecto que por esta resolución se aproba e referido no punto segundo da parte dispositiva desta.

Segunda. Para introducir modificacións nas instalacións que afecten datos básicos do proxecto será necesaria a autorización previa desta dirección xeral. Pola súa banda, o Departamento Territorial da Consellería de Economía e Industria da Coruña poderá autorizar as modificacións de detalle do proxecto que resulten procedentes, e deberá comunicarlle a este centro directivo todas as resolucións que dite en aplicación da dita facultade.

Terceira. O prazo para a posta en servizo das instalacións que se autorizan será de doce meses contados a partir da data de publicación desta resolución.

Cuarta. Unha vez construídas as instalacións autorizadas, o Departamento Territorial da Consellería de Economía e Industria da Coruña inspeccionará a totalidade das obras e montaxes efectuadas e verificará o cumprimento dos compromisos contraídos por Financiera Maderera, S.A.

Quinta. Con carácter previo á posta en servizo das instalacións, o órgano competente verificará o cumprimento dos condicionados impostos nesta resolución.

Sexta. A Administración resérvase o dereito de deixar sen efecto a presente autorización por calquera das causas establecidas no artigo 34 do Decreto 1775/1967, do 22 de xullo, sobre réxime de instalación, ampliación e traslado de industrias, ou por incumprimento das condicións impostas.

Sétima. Esta autorización outórgase sen prexuízo de terceiros e independentemente das autorizacións, licenzas ou permisos de competencia municipal, provincial ou outros necesarios para a realización das obras das instalacións autorizadas.

Oitava. Como requisito necesario para a aplicación do réxime especial á dita instalación, o titular deberá solicitar a modificación da súa inscrición no Rexistro de Instalacións de Produción de Enerxía Eléctrica en Réxime Especial da Comunidade Autónoma de Galicia, creado pola Orde da Consellería de Industria e Comercio do 5 de xullo de 1995 (DOG do 14 de xullo).

Contra esta resolución, que non é definitiva en vía administrativa, poderase interpoñer recurso de alzada ante o conselleiro de Economía e Industria da Xunta de Galicia, no prazo dun mes contado a partir do día seguinte ao da súa notificación, de conformidade cos artigos 114 e 115 da Lei 30/1992, do 26 de novembro, de réxime xurídico das administracións públicas e do procedemento administrativo común.

Santiago de Compostela, 22 de marzo de 2011.

Ángel Bernardo Tahoces
Director xeral de Industria, Enerxía e Minas