O Servicio Galego de Saúde por mor de mellora-la prestación da asistencia sanitaria na Comunidade Autónoma, concedeu permisos de utilización temporal a favor de distintos concellos de varias ambulancias propiedade del. Algúns deses vehículos en virtude do tempo transcorrido non son útiles na actualidade para a realización de labores de ambulancia e de acordo co Decreto 42/1998, do 15 de xaneiro, polo que se regula o transporte sanitario, superan o tempo máximo establecido para o seu destino a fins sanitarios. Por todo iso, os concellos de Baiona (Pontevedra), Portomarín (Lugo) solicitan a cesión dos vehículos que utilizan para seren destinados a outros fins que redunden no interese xeral do municipio.

Con este fin o Servicio Galego de Saúde tramitou o expediente de cesión de ditos vehículos de conformidade co disposto no artigo 35 bis da Lei 3/1985,

do 12 de abril, do patrimonio da Comunidade Autónoma galega, e no artigo 96 bis do seu regulamento, aprobado polo Decreto 50/1989, do 9 de marzo, engadido polo Decreto 238/1998, do 24 de xullo (DOG nº 156, do 13 de agosto de 1998), e polo Decreto 180/2003, do 27 de febreiro (DOG nº 52, do 14 de marzo de 2003).

Por todo o exposto e en uso das facultades que me confire o artigo 38 da Lei 1/1983, do 22 de febreiro, reguladora da Xunta e do seu presidente, reformada pola Lei 11/1988, do 20 de outubro

DISPOÑO:

Artigo 1º

Acórdase a cesión dos seguintes vehículos a favor dos concellos de Baiona (Pontevedra) e Portomarín (Lugo).

Vehículo: Renault Tráfic 900.

Matrícula: C-4373-AV.

Concello: Baiona.

Vehículo: Nissan.

Matrícula: C-2091-BG.

Concello: Portomarín.

Artigo 2º

A cesión queda sometida ás seguintes claúsulas:

a) Os bens cedidos destinaranse a fins de utilidade pública ou interese social do concello tal e como esixe o artigo 96 bis do Decreto 50/1989 e 35 bis da Lei 3/1985, do patrimonio da Comunidade Autónoma.

b) Coa cesión outorgaráselle ó concello a propiedade do vehículo, comprometéndose este a realizar ante a Xefatura Provincial de Tráfico os trámites precisos para o cambio da titularidade do vehículo.

c) Os bens cedidos destinaranse a outros fins de utilidade pública ou interese social do concello, debendo o concello proceder a retirar do vehículo todo anagrama ou rotulación que puidese identificalo como vehículo sanitario, asi como a aboa-los gastos que puidese orixina-la transformación do dito vehículo.

Artigo 3º

A cesión formalizarase mediante acta subscrita polo secretario xeral do Sergas e o órgano competente dos distintos concellos, debendo constar nela o acordo de cesión e a aceptación do cesionario.

Disposición derradeira

O Servicio Galego de Saúde, a través do seu órgano competente, realizará os trámites necesarios para a efectividade de canto se dispón nesta orde.

Santiago de Compostela, 22 de outubro de 2003.

José María Hernández Cochón

Conselleiro de Sanidade