O artigo 76.4º da Lei orgánica 10/2002, do 23 de decembro, de calidade da educación, establece que as cantidades correspondentes ós salarios de persoal docente dos centros privados concertados farán posible que gradualmente a remuneración destes sexa análoga á do profesorado estatal dos respectivos niveis. Así mesmo, o artigo 13.1º a) do Real decreto 2377/1985, do 18 de decembro (BOE do 27 de decembro), polo que se aproba o Regulamento de normas básicas sobre concertos educativos, incide nesta cuestión, dispoñendo: «As cantidades correspondentes a salarios do persoal docente dos centros privados concertados, incluídas as cotizacións por cota patronal á Seguridade Social correspondentes ós titulares dos centros, tenderán a facer posible gradualmente que a remuneracións sexa análoga á do profesorado estatal dos respectivos niveis de ensino obxecto do concerto».
Por Resolución do 1 de agosto de 2002 (DOG do 14 de agosto) pola que se ordena a publicación do Acordo do 30 de xullo de 2002, do Consello da Xunta de Galicia, que autoriza o asinamento do acordo sobre melloras retributivas, incremento dos equipos docentes e o aumento do concepto «outros gastos», declarouse que é vontade da Xunta de Galicia emprender unha serie de medidas tendentes a mellora-la situación dos centros privados concertados, que se concretan tanto no que ás retribucións do profesorado se refire coma no incremento progresivo dos equipos docentes. Ademais, engádese que é intención da Xunta de Galicia que a analoxía retributiva se acade no ano 2005, exceptuando o complemento específico por formación permanente dos funcionarios de carreira docentes, e co obxectivo de mellora-la calidade do ensino, considérase necesaria unha mellora dos equipos docentes, sendo intención da Xunta de Galicia aproximarse progresivamente ás propostas presentadas polas organizacións patronais e
sindicais, de tal xeito que se produciría a dita aproximación no ano 2007.
Por todo iso, a Xunta de Galicia, por proposta do conselleiro de Educación e Ordenación Universitaria, na súa reunión do día 23 de outubro de 2003,
ACORDOU:
Primeiro.-O importe global do módulo económico de sostemento de centros privados concertados/subvencionados experimentará un incremento do 2% con respecto ó establecido no exercicio de 2002, sen prexuízo dos incrementos que se recollen nos puntos seguintes deste acordo. O dito incremento terá efectos económicos desde o 1 de xaneiro de 2003.
Segundo.-Aproba-lo acordo de incremento retributivo do profesorado, ampliación dos equipos docentes e aumento do concepto «outros gastos» dos centros docentes privados concertados/subvencionados, segundo se reflicte no anexo I. A autorización para os períodos setem
bro-decembro de 2005 e xaneiro-agosto de 2006 queda supeditada á aprobación da correspondente orde de concertos educativos para os citados períodos.
Terceiro.-Aproba-lo acordo polo que se establece, para o ano 2003, o importe anual dos módulos económicos de distribución de fondos públicos para o sostemento de centros concertados/subvencionados segundo o anexo II.
Cuarto.-Autoriza-lo conselleiro de Educación e Ordenación Universitaria para o asinamento do acordo de aumento de retribucións do profesorado, incremento dos equipos docentes dos centros privados concertados e aumento «outros gastos» do módulo económico de sostemento de centros concertados.
En execución do dito acordo, esta consellería e as representacións patronais e sindicais do ensino privado concertado subscribiron os acordos correspondentes conforme os anexos que se publican a seguir.
Santiago de Compostela, 30 de outubro de 2003.
Celso Currás Fernández
Conselleiro de Educación e Ordenación
Universitaria
ANEXO I
Acordo de incremento retributivo do profesorado, ampliación dos equipos docentes e aumento do concepto «outros gastos» dos centros docentes privados concertados/subvencionados.
Co obxectivo de mellora-la situación dos centros docentes privados concertados/subvencionados, continúase o proceso de homologación salarial, ampliación dos equipos docentes e increméntase o concepto «outros gastos».
A Consellería de Educación e Ordenación Universitaria e as organizacións patronais e sindicais do ensino privado concertado da Comunidade Autónoma de Galicia adoptan o seguinte
ACORDO:
Primeiro.-Analoxía retributiva do persoal docente.
Base da analoxía retributiva: a analoxía considerarase con respecto ás contías previstas para o profesorado do ensino público de Galicia, exceptuando o complemento específico por formación permanente dos funcionarios de carreira docente.
-Desde o 1 de setembro de 2003 ata 31 de agosto de 2004:
Educación infantil, especial e primaria: 28,62 euros mensuais, en 14 mensualidades.
1º ciclo da ESO: 46,44 euros mensuais, en 14 mensualidades.
2º ciclo da ESO e formación profesional específica: 33,70 euros mensuais, en 14 mensualidades.
-Desde o 1 de setembro de 2004 ata 31 de agosto de 2005:
Educación infantil, especial e primaria: 58,22 euros mensuais, en 14 mensualidades.
1º ciclo da ESO: 92,99 euros mensuais, en 14 mensualidades.
2º ciclo da ESO e formación profesional específica: 68,46 euros mensuais, en 14 mensualidades.
-Desde o 1 de setembro de 2005 ata o 31 de agosto de 2006:
Educación infantil, especial e primaria: 46,32 euros mensuais, en 14 mensualidades.
1º ciclo da ESO: 81,60 euros mensuais, en 14 mensualidades.
2º ciclo da ESO e formación profesional específica: 53,82 euros mensuais, en 14 mensualidades.
Estes incrementos incluiranse na nómina do profesorado como complemento retributivo da Comunidade Autónoma e terán carácter consolidable.
O pagamento deste complemento será proporcional ó número de horas contratadas no caso de profesores con xornadas parciais.
Segundo.-Ampliación dos equipos docentes.
Co obxecto de garantir que a dotación de profesorado permita a impartición, en condicións de calidade, das ensinanzas obxecto dos concertos educativos, a Administración asume o financiamento e a correspondente dotación para o establecemento das seguintes relacións profesor/unidade:
-Curso 2003-2004:
Educación primaria - incremento de 1 hora/unidade. Ratio 1,28.
1º ciclo da ESO - incremento de 2 horas/unidade. Ratio 1,52.
-Curso 2004-2005:
Educación primaria- incremento de 1 hora/unidade. Ratio 1,32.
Ciclos formativos de grao superior- incremento de 3 horas/unidade. Ratio 1,52.
-Curso 2005-2006:
Educación primaria- incremento de 1 hora/unidade. Ratio 1,36.
O incremento de 1 hora semanal/unidade concertada de educación primaria darase sempre e cando o centro a utilice para a contratación dun mestre especialista en pedagoxía terapéutica e/ou audición e linguaxe de acordo co seguinte cadro:
Unidades concertadas Horas pt/al
2003-2004 2004-2005 2005-2006
6 12 18 24
12 24 25 25
18 36 50 50
24 48 50 50
30 50 50 50
No caso de centros de máis de 13 unidades concertadas de educación primaria, cando se acaden 50 horas, deberán contar no seu cadro de persoal con profesorado especialista de pedagoxía terapéutica e especialista de audición e linguaxe con 25 horas para cada especialidade.
Cando os centros acaden o máximo de horas, segundo o número de unidades que figuran no cadro, poderán contrata-los mestres especialistas ou xeneralistas que mellor se acomoden ás necesidades organizativas do propio centro, de acordo cos incrementos horarios previstos para cada curso, sempre e cando non se vexa incrementada a súa ratio profesor/unidade como con
secuencia de acordos sobre mantemento de emprego no sector que sexan anteriores ou que se poidan producir durante a vixencia deste acordo.
Os centros de 13 ou menos unidades concertadas de educación primaria deberán contar, como mínimo, con 1/3 do horario previsto no anterior cadro para a especialidade de audición e linguaxe ó inicio do curso escolar 2004-2005, sempre e cando as necesidades educativas do curso 2003/2004 estivesen suficientemente cubertas.
Terceiro.-Aumento do concepto «Outros gastos».
A Consellería de Educación e Ordenación Universitaria comprométese a realiza-las dotacións orzamentarias correspondentes para incrementar de xeito progresivo o compoñente «outros gastos» en educación infantil, primaria, secundaria obrigatoria, educación especial e programas de garantía social da seguinte maneira:
-Curso 2003-2004:
Incremento do 1%.
-Curso 2004-2005:
Incremento do 1%.
-Curso 2005-2006:
Incremento do 2%.
A variación do compoñente de «outros gastos» de formación profesional estará de acordo coa correspondente Lei de orzamentos do Estado.
Cuarto.-Orientación.
O financiamento dos servicios de orientación educativa incrementaranse, a partir do 1 de setembro de 2003, en 1 hora/unidade concertada de ESO ata un máximo de 25 horas por centro, segundo o seguinte cadro:
Unidades concertadas Curso 2003/2004 Curso 2004/2005 Curso 2005/2006
4 8 12 16
8 16 24 25
12 24 25
16 25
20 25
Cando os centros acaden o máximo de 25 horas de orientación, seranlles aboadas 12 horas correspondentes ó 1º ciclo e 13 horas para o 2º ciclo.
Quinto.-No caso de que nos módulos económicos para o sostemento de centros concertados ós que se refire o artigo 49.2º da Lei 8/1985, do 3 de xullo (BOE do 4 de xullo), reguladora do dereito á educación, que con carácter mínimo fixe o Estado, se inclúan incrementos retributivos para o profesorado, en concepto de analoxía retributiva, aumento de equipos docentes e/ou no concepto «outros gastos», estes serán absorbidos polos incrementos retributivos fixados neste acordo sen que se produzan novos incrementos adicionais, agás que aqueles fosen superiores ós aquí previstos.
Sexto.-As melloras recollidas nos puntos 1º e 3º deste acordo veranse previamente incrementadas polo IPC que se estableza nas leis de orzamentos xerais desta comunidade autónoma para os exercicios económicos dos anos 2004, 2005 e 2006, con efectos do 1 de xaneiro do ano correspondente.
Sétimo.-Este acordo rematará a súa vixencia o 31 de agosto de 2006.