Antecedentes:
1. Por acordo do Consello da Xunta de Galicia do 2 de maio de 2002 declarouse:
-A incidencia supramunicipal do Plan sectorial da rede viaria de Santiago de Compostela, Ames, e Teo.
-Que fose a Dirección Xeral de Obras Públicas o órgano competente para a tramitación do expediente.
-Que as determinacións contidas no Plan sectorial vincularán o planeamento urbanístico dos concellos afectados.
2. Con data do 20 de maio de 2002 sométese o Plan sectorial ó trámite de audiencia dos concellos afectados.
3. No Diario Oficial de Galicia do 30 de maio de 2002 publícase a resolución da Dirección Xeral de Obras Públicas pola que se somete a información
pública durante un mes o Plan sectorial da rede viaria de Santiago de Compostela, Ames e Teo.
4. Analizadas as alegacións presentadas ó Plan, redactouse un documento complementario onde se modificaban os trazados inicialmente propostos, denominado Plan sectorial da rede viaria de Santiago de Compostela, Ames e Teo-Documento complementario.
5. Con data do 23 de maio de 2003 sométese o documento complementario ó trámite de audiencia dos concellos afectados.
6. No Diario Oficial de Galicia do 23 de maio de 2003 publícase a resolución da Dirección Xeral de Obras Públicas pola que se somete a información pública durante un mes o Documento complementario do Plan sectorial da rede viaria de Santiago de Compostela, Ames e Teo.
7. Con data do 18 de xullo de 2003, a Dirección Xeral de Urbanismo da CPTOPV, emite informe favorable desde o punto de vista da ordenación do territorio, sobre a proposta de aprobación definitiva do Plan sectorial de Santiago de Compostela, Ames e Teo.
O Consello da Xunta de Galicia, na súa reunión do día 24 de xullo de 2003, acordou:
1. A aprobación definitiva do denominado Plan sectorial da rede viaria de Santiago de Compostela, Ames e Teo modificado polo Documento complementario de acordo coas seguintes prescricións froito do proceso de información pública:
-O deseño concreto dos enlaces propostos determinarase nos correspondentes proxectos que desenvolvan o Plan sectorial.
-Os treitos que se vaian executar en viaductos poderán ser modificados nos estudios que con maior detalle desenvolva o presente Plan sectorial, buscando acada-lo menor impacto.
2. Calquera actuación urbanística que afecte as vías aprobadas no presente plan, deberá incluír entre a súa documentación a correspondente xustificación da súa compatibilidade co Plan sectorial, mediante anexo, onde non só se estableza a afección sobre a rede proposta no Plan sectorial, senón tamén que a capacidade da rede viaria é suficiente para absorbe-la planificación urbanística proposta, debendo establecerse reserva de solo para novas vías, se a capacidade fora insuficiente.
3. As determinacións contidas no Plan sectorial da rede viaria de Santiago de Compostela, Ames e Teo vincularán o planeamento urbanístico dos concellos afectados.
4. Declara-la utilidade pública dos bens afectados polo Plan sectorial para os efectos expropiatorios.
Santiago de Compostela, 4 de agosto de 2003.
Agustín Hernández Fernández de Rojas
Director xeral de Obras Públicas