Os cambios operados na estructura orgánica dos departamentos da Xunta de Galicia polo Decreto 8/2003, do 18 de xaneiro, así como o nacemento de novas entidades xestoras do sector audiovisual en Galicia aconsellan a modificación do Decreto 276/1999, do 21 de outubro, polo que se regula a composición e as funcións do Consello Asesor de Telecomunicacións e Audiovisual de Galicia, coa
finalidade de adaptalo á situación actual e darlle unha redacción que permita unha maior funcionalidade nun sector en evolución constante.
Na súa virtude, por proposta do conselleiro de Cultura, Comunicación Social e Turismo e logo da deliberación do Consello da Xunta de Galicia na súa reunión do día vintecatro de xullo de dous mil tres,
DISPOÑO:
Artigo 1º
Modifícase o artigo 3 do Decreto 276/1999, do 21 de outubro, polo que se regula a composición e as funcións do Consello Asesor de Telecomunicacións e Audiovisual de Galicia nos seguintes puntos, que quedan redactados como segue:
«-Vicepresidente II: o conselleiro de Innovación, Industria e Comercio.
-Vicepresidente III: o director xeral de Comunicación e Audiovisual.
-Vocais:
1. En representación da Administración autonómica, designados polo presidente do Consello Asesor e por proposta dos titulares dos departamentos respectivos:
-Tres vocais en representación do departamento con competencias en materia de comunicación social e audiovisual.
-Dous vocais en representación do departamento con competencias en materia de innovación.
-Dous vocais en representación do departamento con competencias en materia da rede corporativa de voz e datos.
-Dous vocais en representación do departamento con competencias en materia de protección civil.
-Un vocal en representación do departamento que exerza as competencias en materia de relación cos medios informativos.
-Un vocal en representación de cada un dos restantes departamentos que integran a Xunta de Galicia».
Artigo 2º
Engádese o punto 8 bis ó artigo 3º do Decreto 276/1999, coa seguinte redacción:
«8 bis. Un representante do Consorcio do Audiovisual de Galicia, designado polo presidente do consello asesor, por proposta do presidente do consorcio».
Disposicións derradeiras
Primeira.-Facúltase o conselleiro de Cultura, Comunicación Social e Turismo para dicta-las normas necesarias para o desenvolvemento e execución deste decreto.
Segunda.-Este decreto entrará en vigor o día seguinte ó da súa publicación no Diario Oficial de Galicia.
Santiago de Compostela, vintecatro de xullo de dous mil tres.
Manuel Fraga Iribarne
Presidente
Jesús Pérez Varela
Conselleiro de Cultura, Comunicación Social
e Turismo
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA