En data do 3 de outubro de 2002 recíbese documentación sobre o proxecto modificado do Plan Parcial de Ordenación de SUNP área 8 e SNUG de Tarrío (Culleredo, A Coruña).

O obxecto do proxecto é a ordenación dun solo clasificado como solo urbanizable non programado (SUNP) en solo urbanizable, destinado a usos industriais e compatibles, de acordo co vixente Plan Xeral de Ordenación Urbana do Concello de Culleredo e a súa normativa urbanística.

Para isto será precisa a realización de obras de movementos de terras; aplicación de aglomerado asfáltico e pavimentación para a rede viaria; construcción de redes de abastecemento, saneamento, rega, electricidade, iluminación, gas e telefonía; xardinería; mobiliario urbano e sinalización, etcétera.

O Real decreto lexislativo 1302/1986, do 28 de xuño, de avaliación de impacto ambiental, modificado pola Lei 6/2001, do 8 de maio, establece que os proxectos incluídos no seu anexo II só deberán someterse a unha avaliación de impacto ambiental cando así o decida o órgano ambiental en cada caso, axustándose ós criterios indicados no anexo III.

O proxecto modificado do Plan Parcial de Ordenación de SUNP área 8 e SNUG de Tarrío (Culleredo, A Coruña) está incluído no punto 7 do anexo II do citado real decreto lexislativo.

Unha vez avaliada a documentación presentada e recibido informe da Dirección Xeral de Patrimonio Cultural, e atendendo ós criterios indicados no citado anexo III, destacan as seguintes características do proxecto:

-A área de actuación ocupa unha extensión de 13 ha.

-Non se prevé a utilización ou explotación de recursos existentes na área de actuación e o seu contorno.

-Tanto as redes de abastecemento como as de saneamento conectaranse ás xerais do concello.

-Na zona onde se localiza o proxecto sitúanse xacementos arqueolóxicos recollidos no Inventario de Xacementos Arqueolóxicos de Galicia que poderían verse afectados polo proxecto.

Á vista do anterior, e en virtude do artigo 1.2 do Real decreto lexislativo 1302/1986, do 28 de xuño, de avaliación de impacto ambiental, modificado pola Lei 6/2001, do 8 de maio, e tendo en conta que da realización da obra non se prevén impactos adversos significativos sobre o medio ambiente, esta dirección xeral resolve que é innecesario someter ó procedemento de avaliación de impacto ambiental o documento denominado proxecto modificado do Plan Parcial de Ordenación de SUNP área 8 e SNUG de Tarrío (Culleredo, A Coruña), promovido polo Concello de Culleredo.

Sen embargo, haberá que aterse ó disposto na Lei 8/1995, do 30 de outubro, do patrimonio cultural de Galicia no que respecta ó impacto do proxecto sobre o patrimonio cultural, sendo conveniente a realización dun estudio específico do impacto do proxecto sobre o patrimonio cultural onde sexan establecidas as posibles afeccións neste patrimonio. O estudio incluirá unha prospección arqueolóxica, levada a cabo por técnicos competentes, de acordo cun proxecto presentado e autorizado pola Dirección Xeral de Patrimonio Cultural.

Santiago de Compostela, 26 de xuño de 2003.

José Luis Díez Yáñez

Director xeral de Calidade e Avaliación Ambiental