A Orde do 27 de decembro de 2002 establece no seu artigo 6 os períodos autorizados durante o ano 2003 para a captura de determinadas especies de crustáceos, entre as que se atopa a nécora.
Tendo en conta as observacións formuladas pola comisión sectorial de pesca de artes fixas e menores en caladoiro nacional do Consello Galego de Pesca na súa reunión do 15 de xullo do presente ano, así como o establecido no artigo 14.1º do Decreto 423/1993, do 17 de decembro, polo que se refunde a normativa vixente en materia de marisqueo, extracción de algas e cultivos mariños, resulta posible adopta-la decisión de amplia-lo período autorizado para a captura da nécora.
Na súa virtude,
DISPOÑO:
Artigo único.-Modificación da Orde do 27 de decembro de 2002.
Modifícase o artigo 6 da Orde do 27 de decembro de 2002, pola que se aproba o Plan Xeral de Explotación Marisqueira para o ano 2003, que queda redactado da seguinte forma:
«Artigo 6º.-Outros crustáceos.
De acordo co establecido no artigo 14 do Decreto 423/1993, do 17 de decembro, modificado polo
Decreto 237/2002, do 11 de xullo, os períodos autorizados no 2003 para a captura doutras especies de crustáceos establécense como segue:
Nécora (Necora Puber): do 1 ó 3 de xaneiro e do 21 de xullo ó 31 de decembro.
Lubrigante (Homarus gammarus): do 2 de xullo ó 29 de agosto.
Santiaguiño (Scyllarus arctus): do 1 de outubro ó 31 de decembro.
Lagosta (Palinurus elephas): do 1 de xullo ó 29 de agosto.
Cangrexo (Carcinus maenas): todo o ano.
Conguito (Macropipus corrugatus) e patulate (Macropipus depurador): do 1 de xaneiro ata o 31 de marzo e do 1 de xullo ó 31 de decembro.
Centola (Maia squinado) e boi (Cancer pagurus): do 1 de xaneiro ó 27 de xuño, e do 1 de decembro ata o 31 de decembro. Nas zonas sinaladas no anexo I, soamente se poderá extraer desde o 3 de febreiro ata o 27 de xuño».
Disposición derradeira
Única.-Entrada en vigor.
A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 17 de xullo de 2003.
Enrique César López Veiga
Conselleiro de Pesca e Asuntos Marítimos
