A Mesa do Parlamento de Galicia, na súa reunión do 15 de abril de 2003, aprobou o Regulamento de organización e funcionamento da Administración do Parlamento de Galicia.
O devandito regulamento publicouse no Boletín Oficial do Parlamento de Galicia número 362, do 27 de maio de 2003, e na súa disposición derradeira segunda establécese que a súa entrada en vigor se producirá ó día seguinte ó da súa publicación no Diario Oficial de Galicia.
Xa que logo, e para dar cumprimento a esta prescrición, ordénase a súa publicación ordinaria no Diario Oficial de Galicia.
Santiago de Compostela, 20 de xuño de 2003.
José María García Leira
Presidente del Parlamento de Galicia
Regulamento de organización e funcionamento da Administración do Parlamento de Galicia.
TÍTULO I
Disposicións xerais
Artigo 1º.-Autonomía administrativa do Parlamento.
1. O Parlamento de Galicia ten autonomía para establece-la organización administrativa ó seu servicio que lle posibilite o desenvolvemento eficaz e eficiente das funcións que estatutariamente lle corresponden.
2. A autonomía da Cámara tradúcese nas potestades para fixa-la estructura orgánico-funcional da súa administración, regula-lo réxime xurídico do seu persoal, o seu réxime económico-financeiro, patrimonial e de contratación e, en xeral, para adoptar cantas medidas requira o seu goberno interior.
TÍTULO II
Organización da Administración do Parlamento
Artigo 2º.-Estructura orgánica.
A Administración do Parlamento ten a seguinte estructura orgánica:
a) Mesa do Parlamento.
b) Presidencia.
c) Oficialía maior.
Capítulo I
Mesa do Parlamento
Artigo 3º.-Órgano e competencias.
1. A Mesa é o órgano institucional colexiado que, baixo a dirección do presidente, dirixe a Administración da Cámara.
2. Ademais das competencias que lle confiren o Regulamento do Parlamento e o Estatuto de persoal da Cámara, terá especificamente en materia organizativa e de xestión administrativa as seguintes:
a) O establecemento das directrices xerais de xestión das unidades administrativas.
b) A creación, modificación e supresión de unidades administrativas.
c) A aprobación das disposicións administrativas de carácter interno ou de relevancia xurídica externa.
d) A realización de contratos e de actos de administración e de xestión patrimonial nos termos establecidos neste regulamento.
e) A interpretación e integración das normas de aplicación en materia de persoal segundo os criterios e principios da lexislación básica do Estado e da lexislación autonómica en materia de función pública.
f) A regulación do seu réxime orzamentario e contable.
g) As demais establecidas neste regulamento e calquera outra que non estea atribuída a outro órgano.
Capítulo II
Presidencia
Sección primeira
Presidente do Parlamento
Artigo 4º.-Competencias.
Ó presidente, ademais das competencias que lle confiren o Regulamento do Parlamento, o Estatuto de persoal e este regulamento, correspóndelle a superior dirección do persoal ó servicio da Cámara, a inspección e dirección dos traballos, o desenvolvemento das directrices organizativas e de xestión acordadas pola Mesa do Parlamento e a adopción das medidas necesarias para o mantemento da orde no recinto parlamentario.
Así mesmo, compételle a realización de contratos e de actos de administración, de xestión patrimonial e de execución nos termos establecidos neste regulamento.
Sección segunda
Gabinete da Presidencia
Artigo 5º.- Estructura e competencias.
1. Para o desenvolvemento das súas funcións o presidente estará asistido polo persoal adscrito ó Gabinete da Presidencia. Así mesmo, forma parte do gabinete o persoal adscrito ó servicio dos restantes membros da Mesa.
2. A determinación da estructura orgánica do Gabinete da Presidencia é unha competencia exclusiva do presidente.
3. Correspóndenlle ó Gabinete da Presidencia as seguintes competencias:
A. Asistencia técnica e administrativa ó presidente:
a) A tramitación das iniciativas parlamentarias relacionadas no artigo 9 do Regulamento do Parlamento.
b) A preparación de documentación das sesións plenarias, sen prexuízo das competencias do Servicio de Asistencia Parlamentaria.
c) A formación do banco de datos informáticos e documentais das actividades da Presidencia.
d) A seguridade no recinto parlamentario.
e) A programación e execución dos asuntos vinculados á Conferencia de Presidentes de Parlamentos Autonómicos, á Conferencia de Asembleas Lexislativas Europeas e a órganos semellantes.
f) A correspondencia e axenda das actividades da Presidencia.
B. Protocolarias:
a) As relacións cos grupos parlamentarios e deputados da Cámara.
b) A recepción de solicitudes de salas e a súa distribución para uso dos grupos parlamentarios.
c) O arquivo fotográfico de agasallos da Presidencia.
d) A organización dos actos no Parlamento.
e) A recepción, despacho e arquivo das invitacións, solicitudes de entrevistas ou audiencias do presidente.
f) A asistencia ó presidente nos actos ós que asista.
g) A recepción e organización de solicitudes de visitas guiadas ó Parlamento.
h) Os comunicados de prensa da Presidencia.
i) O resumo e arquivo da prensa diaria do presidente.
C. De seguridade e mantemento da orde na sede do Parlamento:
a) As relacións e coordinación de actividades coa Dirección Xeral da Policía Autonómica.
b) As relacións e coordinación de actividades coa Delegación do Goberno.
c) As relacións e coordinación de actividades co Concello de Santiago.
d) A recepción, estudio e autorización das solicitudes de aparcamento permanente na sede do Parlamento.
e) A execución das medidas dispostas polo presidente co obxecto de mante-la orde dentro do Parlamento.
D. Calquera outra de natureza análoga ás anteriores que o presidente lle encomende.
Capítulo III
Oficialía Maior
Artigo 6º.-Titularidade e estructura.
1. O letrado oficial maior, baixo a dirección do presidente e da Mesa do Parlamento, é o xefe superior de todo o persoal e de tódolos servicios do Parlamento e cumpre as funcións técnicas e de asesoramento dos órganos rectores deste, asistido dos letrados do Parlamento adscritos á Oficialía Maior.
2. Na Oficialía Maior intégranse, de xeito directo, os Servicios Xurídicos, o Servicio de Tecnoloxías da Información, ó que se lle adscribe a Sección de Administración e Mantemento do Sistema Informático, e a Unidade de Comunicación.
3. A Oficialía Maior estructúrase nas seguintes áreas administrativas:
a) Dirección de Xestión Parlamentaria.
b) Dirección de Intervención Xeral, Asuntos Económicos e Infraestructuras.
c) Dirección de Persoal e Réxime Interior.
Artigo 7º.-Competencias do oficial maior.
1. Son competencias do oficial maior as seguintes:
a) A dirección superior da Administración parlamentaria.
b) A xefatura superior de todo o persoal da Administración parlamentaria, sen prexuízo da que lle corresponde ó presidente respecto do persoal do seu gabinete.
c) O asesoramento xurídico e técnico ó presidente, á Mesa do Parlamento, á Xunta de Portavoces e ós demais órganos parlamentarios da Cámara ós que asista.
d) A dirección dos letrados do Parlamento.
e) A proposta de medidas disciplinarias que afecten ó persoal.
f) A concesión de licencias, permisos e vacacións do persoal e de cambio de situación administrativa do persoal, agás do adscrito ó Gabinete da Presidencia.
g) As que lle confiran, na súa condición de letrado da Cámara e de oficial maior, as leis, o Regulamento do Parlamento, o Estatuto de persoal e demais disposicións, e calquera outra que a Mesa ou o presidente lle encomenden.
2. O oficial maior, logo da autorización concedida pola Mesa do Parlamento, poderá delegar nos letrados e directores algunha das súas funcións.
Sección primeira
Unidades administrativas integradas na Oficialía Maior
Artigo 8º.-Servicios xurídicos.
Ós servicios xurídicos correspóndenlle-las seguintes competencias:
a) O asesoramento xurídico e sobre técnica normativa e a asistencia administrativa ós órganos parlamentarios da Cámara e ós seus deputados.
b) O asesoramento xurídico, técnico e administrativo ás unidades administrativas do Parlamento.
c) A elaboración dos anteproxectos de disposicións parlamentarias e administrativas e dos acordos e das resolucións que teñan carácter xurídico e que non estean reservados por norma xurídica específica a outras unidades.
d) A elaboración das propostas de resolución dos recursos administrativos.
e) O apoio xurídico, técnico e administrativo na defensa e representación do Parlamento e da súa administración perante os órganos xurisdiccionais e o Tribunal Constitucional.
f) O apoio xurídico, técnico e administrativo á Xunta Electoral de Galicia.
g) A redacción de informes xurídicos.
h) Calquera outra análoga ás enumeradas nas alíneas anteriores deste artigo.
Artigo 9º.-Servicio de Tecnoloxías da Información.
1. Ó Servicio de Tecnoloxías da Información correspóndelle o deseño, programación, organización, proposta de adquisición, xestión, control e impulso en materia de infraestructuras, equipamento e aplicacións informáticas e de servicios de telecomunicación da Administración parlamentaria e en relación coas súas redes de datos e telecomunicacións. En particular compételle:
a) O deseño, programación, organización, proposta de adquisición, xestión, control e impulso en materia de audiovisual.
b) A organización, proposta de adquisición e control da infraestructura e do soporte dos sistemas audiovisuais do Parlamento de Galicia.
c) O tratamento, elaboración e distribución de contidos audiovisuais de acordo coas directrices da dirección do Parlamento.
d) O deseño, proposta de adquisición, elaboración, xestión e control dos sistemas de información que xestionan o arquivo documental histórico.
e) A proposta de adquisición, xestión e control sobre a implantación e o mantemento dos sistemas de acceso ós usuarios internos e externos á información parlamentaria dispoñible mediante a utilización das tecnoloxías da información e comunicación e, en particular, no referente ó acceso mediante a Internet.
f) A protección en tódolos seus aspectos de datos persoais, a seguridade informática e de telecomunicacións así como a garantía da continuidade da actividade do Parlamento, mediante a elaboración de plans para tal fin.
g) A elaboración do plan estratéxico de tecnoloxías da información, das comunicacións e do audiovisual e a súa execución.
h) A elaboración do plan anual de tecnoloxías da información, das telecomunicacións e do audiovisual e a súa execución.
i) A realización de estudios e análise nas materias da súa competencia.
2. Baixo a dirección do oficial maior ou dun letrado delegado, o xefe do servicio exerce a xefatura do persoal adscrito á súa unidade.
3. Correspóndelle ó xefe do servicio a división interna das tarefas derivadas das competencias do servicio e, en particular, a determinación das áreas funcionais e a organización funcional delas.
Artigo 10º.-Sección de Administración e Mantemento do Sistema Informático.
Á Sección de Administración e Mantemento do Sistema Informático correspóndenlle as seguintes competencias:
a) A xestión e control dos recursos relacionados cos sistemas de información no Parlamento e o seguimento e a execución das operacións do seu mantemento que lle encomende a xefatura do servicio.
b) A colaboración na identificación de necesidades de recursos e na elaboración dos plans xerais en materia de sistemas de información que lle encomende a xefatura do servicio.
c) A atención, orientación e información ós deputados e grupos parlamentarios e ó persoal da Administración parlamentaria en materia de sistemas de información.
d) A supervisión na utilización dos medios informáticos do Parlamento que lle encomende a xefatura do servicio.
Artigo 11º.-Unidade de Comunicación.
A Unidade de Comunicación ten as seguintes competencias:
a) As relacións institucionais, non protocolarias, cos medios de comunicación social: convocatorias para roldas de prensa e actos institucionais, distribución de información parlamentaria, atención a solicitudes realizadas polos medios de comunicación e redacción de notas de prensa.
b) A relación cos gabinetes de prensa da Presidencia do Parlamento, dos grupos parlamentarios e doutras institucións.
c) A proposta e control das acreditacións dos medios de comunicación.
d) A elaboración de dossieres de prensa e de temas específicos debatidos nas sesións parlamentarias e a recompilación da información publicada en diferentes medios relativa ó Parlamento.
Sección segunda
Direccións da Administración parlamentaria
Subsección primeira
Dirección de Xestión Parlamentaria
Artigo 12º.- Estructura.
1. Da Dirección de Xestión Parlamentaria dependen as seguintes unidades administrativas:
a) Servicio de Asistencia Parlamentaria.
b) Servicio de Publicacións.
c) Servicio de Documentación e Estudios.
2. Do Servicio de Asistencia Parlamentaria dependen directamente as unidades de Rexistro, de Asistencia Parlamentaria e de Xestión Parlamentaria.
3. Do Servicio de Publicacións dependen directamente as unidades de Traducción e Corrección, de Redacción e de Edición.
4. Ó Servicio de Documentación e Estudios adscríbense as seccións de Arquivo, de Biblioteca e de Documentación.
Artigo 13º.-Competencias da Dirección de Xestión Parlamentaria.
1. Á Dirección de Xestión Parlamentaria correspóndelle a planificación, coordinación e supervisión dos procesos relacionados directamente coa activi
dade parlamentaria, a elaboración dos expedientes e da documentación relativos ás reunións e ás sesións dos órganos da Cámara, a función de rexistro xeral, a elaboración e edición das publicacións do Parlamento e a xestión dos fondos bibliográficos e documentais e o arquivo parlamentario.
Correspóndelle, tamén, a subministración, actualización e responsabilidade dos contidos correspondentes á súa área funcional que se integran na aplicación de xestión parlamentaria e na páxina web do Parlamento.
2. O director exerce a xefatura de todo o persoal adscrito á dirección.
Artigo 14º.- Competencias do Servicio de Asistencia Parlamentaria.
1. Ó Servicio de Asistencia Parlamentaria correspóndelle a programación, organización, xestión, control e impulso dos procesos administrativos previos e derivados da actividade parlamentaria, a asistencia administrativa e prestación de información ós órganos parlamentarios e a elaboración, execución e control dos documentos de carácter parlamentario que resulten da dita actividade.
2. O xefe do servicio exerce a xefatura do persoal adscrito ás súas unidades e correspóndelle a división interna das tarefas derivadas das competencias do servicio e, en particular, a determinación das áreas funcionais e a organización funcional delas.
Artigo 15º.-Competencias da Unidade de Rexistro.
Á Unidade de Rexistro correspóndenlle as seguintes competencias:
a) A recepción, o rexistro e o arquivo temporal da documentación parlamentaria e administrativa e a súa distribución polas canles procedementais establecidas.
b) A centralización da saída de documentos de carácter parlamentario e administrativo, o seu envío polas canles procedementais establecidas e a súa preparación administrativa para a súa distribución.
c) A xestión e custodia do Rexistro de Intereses baixo a dependencia directa do oficial maior.
d) A ordenación administrativa dos documentos rexistrados para os efectos da súa inclusión nas ordes do día da Mesa do Parlamento e da Xunta de Portavoces.
e) O traslado dos documentos rexistrados e a subministración de información ós cidadáns.
Artigo 16º.-Competencias da Unidade de Asistencia Parlamentaria.
Á Unidade de Asistencia Parlamentaria correspóndenlle as seguintes competencias:
a) A asistencia administrativa á Mesa, Xunta de Portavoces, Pleno, Deputación Permanente, comisións, ponencias e ós demais órganos parlamentarios.
b) A elaboración das convocatorias, das ordes do día e da documentación preparatoria e derivada da actividade dos órganos parlamentarios.
c) O arquivo temporal da documentación e dos expedientes vinculados á actividade dos órganos parlamentarios.
d) A xestión da información da actividade parlamentaria e a prestación e o acceso a ela dos deputados.
e) Todas aquelas actividades administrativas análogas ás anteriores que sexan necesarias para o funcionamento dos órganos parlamentarios da Cámara.
Artigo 17º.-Competencias da Unidade de Xestión Parlamentaria.
Á Unidade de Xestión Parlamentaria correspóndenlle as seguintes competencias:
a) A xestión administrativa da Mesa, Xunta de Portavoces, Pleno, Deputación Permanente, comisións, ponencias e dos demais órganos parlamentarios.
b) A elaboración de actas e certificacións e a execución dos acordos dos órganos parlamentarios.
c) A elaboración de estatísticas da actividade parlamentaria.
d) As actividades administrativas de xestión, tramitación e colaboración preparatorias, complementarias e derivadas de funcións superiores baixo a dirección da xefatura do servicio.
e) Todas aquelas actividades administrativas análogas as anteriores que sexan necesarias para o funcionamento dos órganos parlamentarios da Cámara.
Artigo 18º.-Competencias do Servicio de Publicacións.
1. Ó Servicio de Publicacións correspóndelle a programación, organización, xestión, control e impulso da elaboración, edición e distribución das publicacións do Parlamento, a redacción, traducción e corrección de documentos e a elaboración de normas e criterios unificadores de traducción, corrección e redacción.
2. O xefe do servicio exerce a xefatura do persoal adscrito ás súas unidades e correspóndelle a división interna das tarefas derivadas das competencias do servicio e, en particular, a determinación das áreas funcionais e organización funcional delas.
Artigo 19º.-Competencias da Unidade de Traducción e Corrección.
Á Unidade de Traducción e Corrección correspóndenlle as seguintes competencias:
a) A corrección de documentos para a súa publicación, agás daqueles que pola súa natureza ou urxencia a Presidencia ou a Mesa dispoñan a publicación do texto rexistrado.
b) A traducción de documentos do galego para o castelán e do castelán para o galego.
c) O asesoramento e a emisión de informes en materia lingüística.
d) A participación na elaboración de criterios unificadores de traducción, corrección e redacción de documentos de natureza parlamentaria, así como en materia de técnica normativa e na preparación de manuais de estilo.
e) A colaboración na redacción e corrección das publicacións monográficas do Parlamento.
Artigo 20º.-Competencias da Unidade de Redacción.
Á Unidade de Redacción correspóndenlle as seguintes competencias:
a) A redacción e corrección do Diario de Sesións e, se é o caso, doutros documentos nos que figuren transcricións literais de intervencións parlamentarias, nas que se deixará constancia dos incidentes producidos, das intervencións realizadas e dos acordos adoptados.
b) A participación na elaboración de criterios unificadores de redacción e corrección de documentos de natureza parlamentaria así como na preparación de manuais de estilo.
c) A colaboración na redacción e corrección das publicacións monográficas do Parlamento.
d) O levantamento de actas das sesións secretas.
Artigo 21º.- Competencias da Unidade de Edición.
Á Unidade de Edición correspóndenlle as seguintes competencias:
a) A transcrición das sesión parlamentarias e de actos institucionais.
b) A elaboración, edición e xestión da distribución do Boletín Oficial do Parlamento e do Diario de Sesións do Parlamento.
c) A elaboración, edición e xestión da distribución de publicacións monográficas do Parlamento que se lle encomenden.
Artigo 22º.-Competencias do Servicio de Documentación e Estudios.
1. Ó Servicio de Documentación e Estudios correspóndelle a programación, organización, xestión, control e impulso en relación co arquivo histórico da Cámara, dos seus fondos bibliográficos e documentais así como a elaboración de estudios de interese para a actividade parlamentaria.
2. O xefe do servicio exerce a xefatura do persoal adscrito ás súas unidades e correspóndelle a división interna das tarefas derivadas das competencias do servicio e, en particular, a determinación das áreas funcionais e organización funcional delas.
Artigo 23º.-Competencias da Sección de Arquivo.
Á Sección de Arquivo correspóndelle a conservación, mantemento, actualización e difusión do arquivo histórico do Parlamento.
Artigo 24º.-Competencias da Sección de Biblioteca.
Á Sección de Biblioteca correspóndenlle as seguintes competencias:
a) A xestión das bibliotecas do Parlamento.
b) A proposta de adquisición, o tratamento, a conservación e a difusión de fondos bibliográficos e publicacións seriadas non oficiais calquera que sexa o seu soporte.
c) A administración e mantemento das bases de datos da sección e o seguimento e proposta de novas bases e productos bibliográficos.
d) A xestión de solicitudes de información bibliográfica e atención ó usuario.
e) O establecemento de intercambios con outros parlamentos, institucións universitarias e outras entidades e centros de estudios.
f) A elaboración de estudios e dossieres relacionados coa actividade parlamentaria a partir de fondos bibliográficos.
Artigo 25º.-Competencias da Sección de Documentación.
Á Sección de Documentación correspóndenlle as seguintes competencias:
a) A proposta de adquisición, o tratamento, a conservación e a difusión dos fondos documentais e publicacións periódicas oficiais.
b) A administración e mantemento das bases de datos da sección e o seguimento e proposta de novas bases e productos documentais.
c) A xestión das solicitudes de información documental e atención ó usuario.
d) O establecemento de intercambios con outros parlamentos, institucións universitarias e outras entidades e centros de estudios.
e) A elaboración de estudios e dossieres relacionados coa actividade parlamentaria a partir de fondos documentais.
Subsección segunda
Dirección de Intervención Xeral, Asuntos Económicos e Infraestructuras
Artigo 26º.-Estructura.
1. Da Dirección de Intervención Xeral, Asuntos Económicos e Infraestructuras dependen as seguintes unidades administrativas:
a) Sección de Xestión Contable e Control Interno.
b) Sección de Infraestructuras e Equipamentos.
2. Da Sección de Xestión Contable e Control Interno dependen directamente as unidades de Contratación e de Xestión Económica de Persoal.
Artigo 27º.-Competencias da Dirección de Intervención Xeral, Asuntos Económicos e Infraestructuras.
1. A esta dirección correspóndelle a planificación, organización, coordinación, xestión e control da actividade económica e financeira do Parlamento de Galicia e a subministración, actualización e responsabilidade dos contidos correspondentes á súa área funcional que se integran na aplicación de xestión parlamentaria e na páxina web do Parlamento. En particular compételle:
a) O control interno do Parlamento nas súas modalidades interventora e de control financeiro.
b) O asesoramento en materia económico-financeira e contable ós órganos da Cámara que o soliciten e, se é o caso, a asistencia do seu titular ás reunións dos ditos órganos para o indicado fin.
c) A dirección da xestión económica, financeira e orzamentaria do Parlamento.
d) A confección do anteproxecto de orzamento do Parlamento e a elaboración da conta xeral da institución.
e) A dirección da xestión de infraestructuras da Cámara.
f) A organización e dirección da contabilidade pública do Parlamento.
g) A xestión e control do inventario de bens do Parlamento.
h) A xestión integral dos expedientes de contratación.
i) A xestión económica dos temas de persoal.
2. O director exerce a xefatura de todo o persoal adscrito á dirección e correspóndelle a división interna das tarefas derivadas das competencias da dirección e, en particular, a determinación das áreas funcionais e a organización funcional delas.
Artigo 28º.-Competencias da Sección de Xestión Contable e Control Interno.
Á Sección de Xestión Contable e Control Interno correspóndenlle as seguintes competencias:
a) O apoio á dirección no control interno da actividade económico-financeira do Parlamento.
b) A xestión da contabilidade financeira e orzamentaria do Parlamento.
c) A xestión da tesourería.
d) A xestión, seguimento e control na confección do inventario do Parlamento.
e) O control do arquivo de documentación contable do Parlamento.
f) A dirección, xestión e supervisión das funcións desenvolvidas polas unidades adscritas á sección.
Artigo 29º.-Competencias da Unidade de Contratación.
Á Unidade de Contratación correspóndelle a xestión integral e o seguimento de tódolos expedientes de contratación e das materias relacionadas con eles relativas a garantías, xestión de facturas e calquera outra, e o apoio administrativo nas funcións propias da dirección da que depende.
Artigo 30º.-Competencias da Unidade de Xestión Económica de Persoal.
A esta unidade correspóndelle a xestión económica das nóminas do persoal e doutros pagamentos periódicos relacionadas coa nómina como pagamentos á Seguridade Social, Facenda pública e a outras institucións, así como a colaboración nas funcións competencia da dirección da que depende.
Artigo 31º.-Competencias da Sección de Infraestructuras e Equipamentos.
Á Sección de Infraestructuras e Equipamentos correspóndenlle as seguintes competencias:
a) A xestión e supervisión das infraestructuras e dos equipamentos do pazo do Parlamento, sen prexuízo das competencias doutras unidades sobre a materia.
b) O asesoramento técnico ós órganos da Cámara en instalacións e proxectos de obras e a elaboración e supervisión destes.
c) O mantemento e conservación do pazo do Parlamento, o control da execución material dos contratos de prestación de servicios de mantemento e conservación e a supervisión das tarefas de conservación, remodelación e ornamentación.
d) A coordinación das empresas prestadoras de servicios contratadas pola Administración parlamentaria.
e) A colaboración con empresas que presten asistencia técnica na realización de actos protocolarios.
f) O control do equipamento da sede do Parlamento e a elaboración de propostas de aprovisionamento de moblaxe e equipamento.
g) O control da subministración de material funxible e de mantemento, así como a xestión da súa almacenaxe.
h) A xestión e supervisión da actividade de reprografía.
i) A xestión e supervisión da central telefónica e de tódolos equipos periféricos fixos.
j) A coordinación das tarefas relativas á recepción e control de obras de arte.
k) A colaboración no deseño da política de prevención de riscos laborais.
l) A colaboración na confección e mantemento do inventario do Parlamento.
Subsección terceira
Dirección de Persoal e Réxime Interior
Artigo 32º.-Estructura.
Da Dirección de Persoal e Réxime Interior dependen directamente a Unidade de Recursos Humanos e a Sección de Réxime Interior, á que se lle adscriben as unidades de Asistencia Xeral e do Parque Móbil.
Artigo 33º-Competencias da Dirección de Persoal e Réxime Interior.
1. Á Dirección de Persoal e Réxime Interior correspóndelle a planificación, organización, coordinación, xestión e supervisión en materia de recursos humanos e réxime interior así como a subministración, actualización e responsabilidade dos contidos correspondentes á súa área funcional que se integran na aplicación de xestión parlamentaria e na páxina web do Parlamento.
2. O director exerce a xefatura de todo o persoal adscrito á dirección e correspóndelle a división interna das tarefas derivadas das competencias da dirección e, en particular, a determinación das áreas funcionais e a organización funcional delas.
Artigo 34º.-Competencias da Unidade de Recursos Humanos.
Á Unidade de Recursos Humanos correspóndenlle as seguintes competencias:
a) A realización de estudios en materia de recursos humanos.
b) A planificación de necesidades de recursos humanos.
c) A elaboración e o desenvolvemento das ofertas de emprego público, así como a xestión dos procedementos de provisión de postos de traballo e de cobertura temporal nos supostos de vacantes, baixas temporais ou suspensións.
d) A tramitación dos procedementos de modificación da relación de postos de traballo.
e) A xestión do rexistro de persoal da Administración parlamentaria.
f) A tramitación das solicitudes de licencias, permisos e vacacións, de cambio de situación administrativa e, en xeral, dos procedementos relativos ó persoal.
g) O control de asistencia e puntualidade.
h) A canalización administrativa das relacións cos representantes do persoal e dos procesos de negociación das condicións laborais.
i) A supervisión da adecuación dos postos ás retribucións asignadas a eles.
j) O apoio técnico na valoración dos postos de traballo.
k) A elaboración de plans de formación do persoal e o control da súa implantación.
l) A xestión de mecanismos de comunicación e de representación entre o persoal da Administración parlamentaria.
m) A colaboración na política de prevención de riscos laborais.
n) Aqueloutras actividades relativas a persoal que lle encomenden a Mesa do Parlamento, o presidente ou o oficial maior.
Artigo 35º.-Competencias da Sección de Réxime Interior.
Á Sección de Réxime Interior correspóndelle a xestión e supervisión dos servicios xerais de asistencia, así como a dos servicios que poidan contratarse, sen prexuízo das competencias que nesta materia ten a Sección de Infraestructuras e Equipamentos.
Intégranse nesta sección as unidades de Asistencia Xeral e do Parque Móbil.
Artigo 36º.-Competencias da Unidade de Asistencia Xeral.
A Unidade de Asistencia Xeral ten as seguintes competencias:
a) O control do acceso de persoal ó Parlamento, así como a atención e orientación do público e a recepción e o acompañamento de visitas.
b) A vixilancia e custodia no interior das dependencias parlamentarias.
c) A reproducción e distribución de documentos, correo e demais obxectos polo interior do Parlamento, así como a recollida de sinaturas e mensaxes.
d) A prestación da asistencia e do soporte material necesarios ós órganos parlamentarios nos actos oficiais e, en xeral, nas actividades da Cámara.
e) A atención da central telefónica.
Artigo 37º- Competencias da Unidade do Parque Móbil.
Á Unidade do Parque Móbil correspóndelle a conducción, conservación e mantemento dos vehículos do parque móbil ó servicio da Mesa do Parlamento e da Oficialía Maior.
TÍTULO III
Réxime xurídico-administrativo
Capítulo I
Réxime xurídico das disposicións e dos actos administrativos
Artigo 38º.-Disposicións e actos administrativos.
1. As disposicións e os actos administrativos que produzan os órganos da Administración parlamentaria en materia de persoal, administración e xestión patrimonial rexeranse polo establecido neste regulamento.
2. Os restantes que teñan natureza parlamentaria non son disposicións nin actos administrativos e rexeranse polo prescrito no Regulamento da Cámara.
Artigo 39º.-Forma xurídica.
As decisións dos órganos da Administración parlamentaria revisten as seguintes formas:
a) «Acordo da Mesa», as decisión da Mesa do Parlamento que aproben disposicións administrativas e os actos administrativos que dicte este órgano.
b) «Resolución do presidente», os actos administrativos que dicte o presidente do Parlamento.
c) «Resolución do oficial maior», os actos administrativos que dicte o oficial maior.
Artigo 40º.-Executividade.
Os actos administrativos producidos polos órganos da Administración parlamentaria serán inmediatamente executivos.
Artigo 41º.-Publicidade.
Os actos administrativos que non teñan carácter singular e as disposicións administrativas publicaranse no Boletín Oficial do Parlamento de Galicia e, se é o caso, no Diario Oficial de Galicia.
Artigo 42º.-Recursos administrativos.
1. Poñen fin á vía administrativa os actos administrativos da Mesa do Parlamento e do seu presidente.
2. Os actos administrativos do oficial maior son recorribles en alzada perante a Mesa do Parlamento.
3. O recurso extraordinario de revisión e a reclamación administrativa previa ás vías xudiciais civil e laboral interpoñeranse ante a Mesa do Parlamento.
4. Contra as disposicións administrativas e os actos administrativos que poñan fin á vía administrativa poderá interpoñerse recurso contencioso-administrativo perante a Sala do Contencioso-Administrativo do Tribunal Superior de Xustiza de Galicia.
Capítulo II
Procedemento administrativo
Artigo 43º.-Procedemento administrativo.
A Administración do Parlamento axustará a súa actuación ó procedemento administrativo común, sen prexuízo das especialialidades derivadas da organización propia da Cámara.
Capítulo III
Contratación
Artigo 44º.-Réxime xurídico.
Os contratos que realice a Administración do Parlamento rexeranse pola normativa xeral sobre contratación administrativa, sen prexuízo das especialidades derivadas da organización propia da Cámara.
Artigo 45º.-Órganos de contratación.
1. A Mesa do Parlamento e o seu presidente, dentro das súas respectivas competencias, son os órganos de contratación da Administración parlamentaria.
2. Correspóndelle á Mesa do Parlamento a iniciación dos procedementos de contratación, a aprobación dos pregos de cláusulas administrativas
xerais e particulares e dos proxectos técnicos e a adxudicación dos contratos nos seguintes casos:
a) Se o importe do orzamento excede de 12.020,24 euros.
b) Aqueloutros, calquera que sexa a súa contía, que comprometan gastos de carácter plurianual.
3. Correspóndelle ó presidente a iniciación dos procedementos de contratación, a aprobación dos pregos de cláusulas administrativas particulares e dos proxectos técnicos e a adxudicación dos contratos cando o orzamento sexa igual ou inferior a 12.020,24 euros.
Artigo 46º.-Mesa de contratación.
A mesa de contratación da Administración do Parlamento estará constituída por un presidente, que será o do Parlamento ou un membro da súa Mesa en quen delegue, catro vocais e un secretario, designados polo órgano de contratación, este último entre o persoal funcionario da Cámara. Entre os vocais figurará o interventor do Parlamento e o oficial maior ou letrado en quen delegue.
Capítulo IV
Bens
Artigo 47º.-Autonomía patrimonial.
1. O Parlamento, a través da súa administración, ten autonomía patrimonial e exerce as mesmas competencias que ten atribuídas o Consello da Xunta de Galicia e as consellerías sobre os bens de dominio público que teña adscritos e os patrimoniais.
2. Correspóndelle á Mesa do Parlamento a xestión dos bens patrimoniais da Cámara e os de dominio público que teña adscritos.
3. O réxime xurídico dos bens patrimoniais do Parlamento e dos de dominio público que teña adscritos rexerase polo establecido na normativa reguladora do patrimonio da Comunidade Autónoma de Galicia.
Disposicións adicionais
Primeira.-Interpretación.
As dúbidas sobre a interpretación deste regulamento serán resoltas mediante acordo da Mesa do Parlamento.
Segunda.-Órganos e actos administrativos.
Para os efectos deste regulamento, teñen a condición de órganos administrativos a Mesa do Parlamento, o presidente e o oficial maior. Os actos xurídicos que produzan estes órganos no exercicio das súas competencias terán a natureza de actos administrativos.
Terceira.-Modificación das contías dos contratos.
Por acordo motivado, a Mesa do Parlamento poderá modifica-las contías dos orzamentos de contratación establecidas no artigo 45 deste regulamento.
Disposición derrogatoria
Derrogación de determinadas disposicións do Estatuto de persoal do Parlamento de Galicia.
Quedan derrogados os artigos 6, 7, 8, 11, 12, 13, 16, 20, 21, 22, 23, 24, 25, 26, 27, 28, 29, 32, 33, 34, 35, 36, 37 e 38 do Estatuto de persoal do Parlamento de Galicia aprobado o 7 de febreiro de 1984 (BOPG núm. 216, do 10 de febreiro de 1984) relativos á estructura orgánico-funcional da súa administración e as demais disposicións do estatuto que se opoñan ó establecido neste regulamento. Quedan, sen embargo, en vigor as que regulan o réxime xurídico do seu persoal.
Disposicións derradeiras
Primeira.-Dereito supletorio.
En todo o non previsto neste regulamento, aplicarase supletoriamente a normativa da Comunidade Autónoma de Galicia e a do Estado, por esta orde.
Segunda.-Entrada en vigor.
Este regulamento entrará en vigor o día seguinte ó da súa publicación no Diario Oficial de Galicia.
