Emeterio Vega Rodríguez solicitou da Consellería de Innovación, Industria e Comercio da Xunta de
Galicia, a incoación dun expediente de expropiación forzosa polo procedemento de urxencia dos terreos necesarios para prosegui-los labores de explotación da concesión mineira Mondoñedo fracción segunda 5530.2, situada no termo municipal da Pastoriza, da provincia de Lugo.
Os bens a que fai referencia a declaración de urxente ocupación están determinados no expediente, o cal foi sometido ó trámite de información pública, sendo ademais realizadas notificacións individuais ós interesados dos predios afectados.
A solicitude foi efectuada conforme o disposto no artigo 105 da Lei 22/1973, do 21 de xullo, de minas,
en relación co artigo 131 do regulamento que desenvolve a dita lei, así como o artigo 52 da Lei de expropiación forzosa do 16 de decembro de 1954 e o artigo 56 do seu regulamento, do 28 de abril de 1957.
Como consecuencia da información pública e das notificacións individuais, foron presentados escritos de alegacións, procedendo a desestimación destas, xa que non desvirtúan as razóns obxectivas polas cales neste momento é urxente a ocupación dos predios para evita-la paralización dos traballos de explotación na concesión de referencia, todo iso en función do que consta no informe da Delegación Provincial da Consellería de Innovación, Industria e Comercio de Lugo e na memoria-proposta da Subdirección Xeral de Recursos Minerais.
A expropiación está xustificada e é de todo punto necesaria e ademais polo procedemento de urxencia, xa que permitirá prosegui-lo aproveitamento racional do xacemento, entendendo como tal o poder aproveitar lousas de maior calidade e en partes máis profundas, mantendo as regulamentarias condicións de seguridade mineira. De acordo co Plan de Labores presentado e aprobado, os predios obxecto de expropiación están afectados para realiza-los labores preparatorios de desmonte na súa superficie. Os terreos obxecto de expropiación supoñen, a raíz dos últimos resultados obtidos nas sondaxes, a única alternativa posible para mante-la actividade habida nos últimos anos polo que a desestimación da petición implicaría graves trastornos ó concesionario, tanto de orde técnica e económica, como de seguridade, segundo o sinalado precedentemente, así como una influencia negativa na economía da comarca polo impacto que nela causaría a perda de postos de traballo.
Na súa virtude, por proposta do conselleiro de Innovación, Industria e Comercio e previa deliberación do Consello da Xunta de Galicia, na súa reunión do doce de xuño de dous mil tres
DISPOÑO:
Artigo único.-Declárase urxente, segundo o mencionado artigo 105 da Lei de minas e para os efectos dispostos no artigo 52 da Lei de expropiación forzosa, a ocupación dos predios anteriormente citados, situados no termo municipal da Pastoriza (Lugo), definidos nos planos presentados e dos que se publicou a súa relación nos boletíns mencionados, predios que é necesario expropiar para dar continuidade ó laboreo da concesión mineira Mondoñedo fracción segunda 5530.2, da que ostenta a titularidade Emeterio Vega Rodríguez.
Santiago de Compostela, doce de xuño de dous mil tres.
Manuel Fraga Iribarne
Presidente
Juan Rodríguez Yuste
Conselleiro de Innovación, Industria e Comercio
CONSELLERÍA DE XUSTIZA, INTERIOR E ADMINISTRACIÓN
LOCAL