O Decreto 244/2003, do 24 de abril, de homologación sanitaria de receitas oficiais para a prestación farmacéutica, regula o proceso a través do cal se verifican, con carácter previo á súa dispensación, as prescricións en receita oficial de determinados medicamentos, productos sanitarios e dietoterápicos complexos, incluídos na prestación farmacéutica e complementaria do Sistema Nacional de Saúde, co obxecto de valida-lo cumprimento dos requisitos establecidos para a súa prescrición, de acordo coas indicacións terapéuticas establecidas na autorización de comercialización, coas súas fichas técnicas e cos demais requisitos de prescrición, ó abeiro da normativa vixente na materia.

No seu artigo 5, o antedito Decreto 244/2003 establece que a homologación sanitaria de receitas será levada a cabo por persoal sanitario facultativo farmacéutico, que dispoña de autorización expresa da División de Farmacia e Productos Sanitarios do Servicio Galego de Saúde, pertencente ós centros asistenciais de atención primaria e ós servicios de farmacia dos centros de atención especializada do Ser

gas e daqueles centros ou organismos con concerto específico para a prescrición da prestación farmacéutica co Sergas, que dispoñan de Servicio de Farmacia.

Así mesmo, o punto 3 deste artigo regula que, co obxecto de levar a cabo unha adecuada avaliación e seguimento do procedemento de homologación sanitaria de receitas oficiais, a División de Farmacia e Productos Sanitarios facilitaralle ó persoal autorizado un sistema de información, como ferramenta de apoio á xestión.

No artigo 7, punto 2º, do antedito decreto regúlase que a homologación sanitaria de receitas se formalizará facendo consta-los seguintes datos: a identificación do farmacéutico homologador e a súa sinatura, data de homologación, número de envases autorizados e os demais datos que, por resolución da División de Farmacia e Productos Sanitarios, se determinen.

Tendo en conta o anterior e co obxecto de determina-lo procedemento de formalización da homologación sanitaria de receitas, esta División de Farmacia e Productos Sanitarios, e de conformidade co artigo 22 do Decreto 45/2002, do 8 de febreiro, polo que se regula a estructura orgánica do Servicio Galego de Saúde,

DISPOÑO:

Primeiro.-Para a formalización da homologación sanitaria de receitas, o farmacéutico homologador,

tras comprobar que toda a documentación presentada cumpre cos requisitos esixidos para a homologación sanitaria, deberá cubri-los epígrafes recollidos na etiqueta normalizada de homologación sanitaria:

-Centro: código do centro homologador correspondente.

-Fco.: clave do farmacéutico que formaliza a homologación sanitaria.

-Env.: número de envases do medicamento ou producto prescrito.

-Data: data na que se formaliza a homologación sanitaria.

-Nº: número de homologación sanitaria emitido polo sistema de información.

Segundo.-A etiqueta, con tódolos datos cubertos, deberá adherirse á receita oficial, dentro do epígrafe de advertencias para o farmacéutico/a.

Terceiro.-O farmacéutico que formaliza a homologación sanitaria asinará a receita oficial no mesmo epígrafe de advertencias para o farmacéutico/a, sen impedi-la lectura dos datos incluídos na etiqueta nin dos correspondentes ó código de barras identificativo da receita.

Cuarto.-A División de Farmacia e Productos Sanitarios realizará a edición e distribución das etiquetas de homologación sanitaria e as direccións dos centros ou xerencias ás que pertenzan os farmacéuticos autorizados para formaliza-la homologación terán ó seu cargo a súa custodia e distribución no seu ámbito de actuación.

Quinto.-As anteditas direccións ou xerencias deberán solicitarlle, por escrito, as etiquetas á División de Farmacia e Productos Sanitarios, co obxecto de garanti-la súa dispoñibilidade en cada centro de homologación.

Sexto.-Esta resolución entrará en vigor a partir do día seguinte ó da súa publicación no Diario Oficial de Galicia.

Santiago de Compostela, 28 de maio de 2003.

Berta Cuña Estévez

Directora xeral da División de Farmacia

e Productos Sanitarios

ANEXO

Etiqueta de homologación sanitaria

CONSELLERÍA DA PRESIDENCIA, RELACIÓNS INSTITUCIONAIS

E ADMINISTRACIÓN PÚBLICA