O Complexo Hospitalario de Pontevedra recibiu varias ofertas de doazón de material informático ó Servicio Galego de Saúde con destino a diversos servicios do referido complexo hospitalario, e emitiu informe favorable sobre a aceptación do equipamento.

Conforme o artigo 17.1º da Lei 3/1985, do 12 de abril, do patrimonio da Comunidade Autónoma, requírese decreto do Consello da Xunta de Galicia para a adquisición de bens a título gratuíto.

En cumprimento do disposto na Lei 3/1985, do 12 de abril, do patrimonio da Comunidade Autónoma, de conformidade coa proposta do conselleiro de Sanidade e presidente do Servicio Galego de Saúde, e logo de deliberación do Consello da Xunta de Galicia, na súa reunión do día dous de maio de dous mil tres,

DISPOÑO:

Artigo 1º

Acepta-la doazón do seguinte material:

-1 impresora, marca H.P., modelo D-145, cun valor 849 A a favor do Servicio de Cirurxía Vascular, doada por W.L. Gore y Asociados, S.L.

-1 impresora láser, marca Lexmark, modelo E320, cun valor de 403,87 A a favor do Servicio de Mantemento, doada por Tapicería Pereira.

-1 ordenador, marca Compaq, modelo EVO D300, cun valor de 1.394,35 A, a favor do Servicio de Abastecementos, doado por DPC Dipesa, S.A.

Artigo 2º

Os activos acéptanse segundo o establecido na normativa en materia patrimonial da Comunidade Autónoma e destinaranse ó Complexo Hospitalario de Pontevedra, de acordo coa vontade dos doadores.

Disposición derradeira

O Servicio Galego de Saúde, a través do seu órgano competente, levará a cabo os trámites necesarios para a efectividade de canto se dispón neste decreto.

Santiago de Compostela, dous de maio de dous mil tres.

Manuel Fraga Iribarne

Presidente

José María Hernández Cochón

Conselleiro de Sanidade