O Pleno da Corporación Municipal do Concello de Cangas (Pontevedra), reunido en sesión realizada o día 27 de setembro de 2002, acordou cederlle á Comunidade Autónoma de Galicia un predio situado no termo municipal de Cangas destinado á construcción dun edificio para xulgados.
A Secretaría Xeral e do Patrimonio tramitou o correspondente expediente de aceptación de cesión, de conformidade co disposto nos artigos 16, 17 e 23 da Lei 3/1985, do 12 de abril, do patrimonio da Comunidade Autónoma de Galicia, e 33, 34 e 38 do Decreto 50/1989, do 9 de marzo, polo que se aproba o regulamento para a execución da dita lei.
Na súa virtude, por proposta do conselleiro de Economía e Facenda, feita nos termos nos que o Concello de Cangas acordou a cesión, e logo da deliberación do Consello da Xunta de Galicia na súa reunión do día tres de abril de dous mil tres,
DISPOÑO:
Artigo 1º
Acéptase a cesión a título gratuíto feita polo Concello de Cangas do predio que se describe como segue: urbano.-Parcela E-1, soar edificable na unidade de actuación 4.5 da vila de Cangas, situado con fronte á vía número 1, cunha superficie de cincocentos corenta e catro metros cadrados e un total de catrocentos trinta e cinco metros cadrados de teito, a usos equipamentais específicos na normativa do estudio de detalle polo que se rexe o proxecto de compensación. Linda: ó norte, con parcela privada situada na UA 4-1 e parcela V-1, ó sur, leste e oeste, coa parcela V-1.
Figura inscrito a nome do Concello de Cangas, ó folio 88 do tomo 1.478 libro 204 do predio 17809.
Artigo 2º
O predio cedido destinarase á construcción dun edificio para xulgados.
Artigo 3º
A Consellería de Economía e Facenda, a través da Secretaría Xeral e do Patrimonio, procederá á formalización da cesión no correspondente documento público e á inscrición do ben no Rexistro da Propiedade a nome da Comunidade Autónoma de Galicia.
Disposición derradeira
A Consellería de Economía e Facenda, a través da Secretaría Xeral e do Patrimonio, levará a cabo
tódolos trámites necesarios para a efectividade deste decreto.
Santiago de Compostela, tres de abril de dous mil tres.
Manuel Fraga Iribarne
Presidente
José Antonio Orza Fernández
Conselleiro de Economía e Facenda