O Decreto 108/1996, do 29 de febreiro, polo que se aproba o Regulamento do organismo autónomo Augas de Galicia, na redacción dada polo Decreto 146/2003, do 6 de febreiro, que o modifica, establece, no seu artigo 7, que son órganos de goberno de Augas de Galicia o presidente do organismo, o director xeral e a Xunta de Goberno.

O artigo 13 do devandito decreto enumera, no seu punto 1º, as atribucións conferidas ó presidente de Augas de Galicia, determinando, no punto 2º, que as funcións e atribucións citadas, coa excepción da referida na letra h), poderán ser delegadas, parcialmente ou na súa totalidade, no director xeral de Augas de Galicia ou nun ou en varios titulares das unidades administrativas citadas, como órganos de administración de Augas de Galicia, nos artigo 9 e 39 do citado texto regulamentario. Así mesmo, o punto 3º do citado artigo 13 configura o director xeral como órgano de apoio ó presidente, establecendo que o dito órgano de goberno, ademais das funcións inherentes á condición descrita, exercerá todas aquelas que lle sexan expresamente delegadas polo presidente.

Neste orde de cousas, a concentración de funcións no presidente enmarcada no inxente volume de actividades desenvolvidas polo organismo autónomo, xunto á introducción da figura do director xeral, como órgano de goberno creado para prestar apoio técnico-administrativo ó presidente, aconsellan recorrer á delegación de funcións e atribucións naquel, co fin de consegui-la necesaria axilización administrativa que permita desenvolver axeitadamente os principios informadores da actividade administrativa, recollidos no artigo 103.1º da Constitución española.

Por tal motivo, con data do 24 de febreiro de 2003, o presidente de Augas de Galicia dictou, de conformidade coa citada previsión establecida no punto 2º do artigo 13 do Decreto 108/1996, do 29 de febreiro, resolución de delegación de funcións e atribucións no director xeral de Augas de Galicia e nos titulares das unidades administrativas de Augas de Galicia referidas no artigo 39 do Decreto 108/1996, do 29 de febreiro.

Nembargantes, no breve período de tempo transcorrido desde a publicación o 6 de marzo do ano que andamos da citada resolución puxéronse de manifesto dúbidas na interpretación de determinados aspectos contidos na resolución de delegación publicada e problemas de axilidade e eficacia na xestión ordinaria do organismo autónomo, que é preciso clarexar e corrixir mediante unha nova resolución de delegación do presidente de Augas de Galicia de determinadas funcións e atribucións.

Na súa virtude, facendo uso das facultades conferidas polo artigo 13.2º do Decreto 108/1996, do 29 de febreiro, polo que se aproba o Regulamento do organismo autónomo Augas de Galicia, e de conformidade co disposto no artigo 13 da Lei 30/1992, do 26 de novembro, de réxime xurídico das administracións públicas e do procedemento administrativo común e demais disposicións de xeral aplicación,

RESOLVO:

Primeiro.-Delegar no director xeral de Augas de Galicia, na súa totalidade, as atribucións conferidas ó presidente de Augas de Galicia no artigo 13.1º, letras c), d), e), f), g), i) e j) do Decreto 108/1996, do 29 de febreiro.

Segundo.-Declarar, na esfera de atribucións delegadas e recollidas na letra e) do artigo 13.1º do Decreto 108/1996, do 29 de febreiro, expresamente incluídas as facultades relativas á proposta e autorización dos gastos e á autorización dos pagamentos dentro dos créditos aprobados.

Terceiro.-Declarar, na esfera de atribucións delegadas, e recollidas na letra j) do artigo 13.1º do Decreto 108/1996, do 29 de febreiro, expresamente incluídas as funcións atribuídas ós órganos de contratación pola lexislación vixente na materia, así como as correspondentes á aprobación das solicitudes de colaboración técnica e/ou financeira presentadas polas entidades locais para a execución de obras de abastecemento e saneamento de augas.

Cuarto.-Delegar no titular da Secretaría Xeral de Augas de Galicia o exercicio dos seguintes cometidos:

a) Ordena-lo envío a tribunais e xulgados dos expedientes administrativos relativos a resolucións e actos dictados polo organismo autónomo no seu ámbito competencial, cando así o requira a lexislación procesual que resulte de aplicación en cada caso.

b) Autoriza-las insercións en boletíns oficiais de disposicións, resolucións e actos dictados polo organismo autónomo no seu ámbito competencial, que sexan obxecto de publicación.

Quinto.-As resolucións e actos administrativos que se adopten facendo uso das delegacións contidas nesta resolución indicarán expresamente esta circunstancia e consideraranse dictadas polo órgano delegante.

Sexto.-En calquera momento, o presidente de Augas de Galicia poderá reclama-lo exercicio das atribucións que son delegadas por esta resolución, das que quedan excluídas, en todo caso, os supostos previstos no artigo 13.2º da Lei 30/1992, do 26 de novembro, de réxime xurídico das administracións públicas e do procedemento administrativo común, e no artigo 42.2º da Lei 1/1983, do 22 de febreiro, reguladora da Xunta e do seu presidente.

Sétimo.-Derrogar integramente a Resolución do 24 de febreiro de 2003, do presidente de Augas de Galicia, de delegación de funcións e atribucións do presidente de Augas de Galicia no director xeral de Augas de Galicia e nos titulares das unidades administrativas de Augas de Galicia referidas no artigo 39 do Decreto

108/1996, polo que se aproba o Regulamento do organismo autónomo Augas de Galicia.

Santiago de Compostela, 9 de abril de 2003.

Justo de Benito Basanta

Presidente do ente público Augas de Galicia