Vista a acta da revisión salarial para o ano 2003 do convenio colectivo do sector de limpeza de edificios e locais, con nº de código 3600895, que tivo entrada nesta delegación provincial o día 30-1-2003, subscrita en representación da parte económica pola Asociación Provincial de Empresarios de Limpeza de Edificios e Locais de Pontevedra, e da parte social, polas centrais sindicais CC.OO., UGT e CIG, en data 28-1-2003. De conformidade co disposto no artigo 22 do convenio colectivo e no artigo 90.2º e 3º, do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, Real decreto 1040/1981, do 22 de maio, sobre rexistro e depósito de convenios colectivos de traballo e Real decreto 2412/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia, en materia de traballo, esta delegación provincial

ACORDO

Primeiro.-Ordena-la súa inscrición no libro de rexistro de convenios colectivos de traballo, que consta nesta delegación provincial, e a notificación ás representacións económica e social da comisión negociadora.

Segundo.-Ordena-lo seu depósito no Servicio de Relacións Laborais, Sección de Mediación, Arbitraxe e Conciliación.

Terceiro.-Dispoñe-la súa publicación no Diario Oficial de Galicia.

Vigo, 4 de febreiro de 2003.

Joaquín Macías Sánchez

Delegado provincial de Pontevedra

Convenio colectivo do sector de limpeza de edificios e locais da provincia de Pontevedra

Asistentes:

CC.OO.: Carmen Segurana Bedrina.

UGT: Rosa Mª Acuña.

CIG: María do Tránsito Fernández

Representación empresarial:

Adolfo González González

Paulina Díaz Lamela

Manuel Falque Comesaña

Secretario de actas: Pablo Búa Burgos.

En Vigo, nos locais da Confederación de Empresarios de Pontevedra, sendo as dezasete horas do

día vinteoito de xaneiro de dous mil tres, reúnese a comisión paritaria do convenio colectivo do sector de limpeza de edificios e locais da provincia de Pontevedra co obxecto de aplica-la cláusula de revisión salarial establecida para este exercicio. Asisten as persoas sinaladas anteriormente.

A seguir procédese a aplica-lo 1,3% de incremento sobre as táboas salariais, complemento de transporte, complemento de asistencia, axudas de custo e horas extraordinarias, así como as diferencias ou atrasos salariais producidos, como consecuencia da aplicación retroactiva dos efectos económicos desde o 1 de xaneiro de 2002, serán aboados polas empresas no prazo máximo de 45 días naturais contados desde a data da resolución do delegado provincial de Traballo, acordando a súa inscrición no libro de rexistros de convenios colectivos e a súa publicación no BOP, que quedan como segue con efectos do 1-1-2002.

-Táboa salarial: ver anexo.

-Complemento de transporte: 67,43 euros mensuais. Por cada día de ausencia ó traballo descontarase a cantidade de 3,03 euros.

-Complemento de asistencia: 47,99 euros. Por cada día de ausencia ó traballo descontarase a cantidade de 2,16 euros.

-Axudas de custo:

a) Media axuda de custo: 13,10 euros/día.

b) Axuda de custo completa: 23,27 euros/día.

c) Con pernoctación: 39,10 euros/día.

-Horas extraordinarias:

a) Hora extra: 5,32 euros.

b) Hora en domingo e festivo: 6,25 euros.

Ámbalas partes acordan a súa remisión á autoridade laboral para efectos do seu rexistro e posterior publicación no BOP e Diario Oficial de Galicia.

Non habendo máis asuntos que tratar, levántase a sesión ás dezaoito horas do día arriba indicado.

Tablas de salarios 2003. Limpeza de edificios e locais.