A Lei orgánica 15/1999, do 13 de decembro (BOE, nº 298, do 14 de decembro), regula o tratamento de datos de carácter persoal rexistrados en soportes físicos, así como o uso posterior destes datos polos sectores público e privado.
A finalidade desta regulación é protexe-los dereitos fundamentais das persoas físicas e especialmente o seu honor e intimidade, tanto persoal como familiar.
No seu artigo 20.1º disponse que a creación, modificación ou supresión dos ficheiros das administracións públicas só poderá facerse por medio dunha disposición xeral publicada no BOE ou diario oficial correspondente.
A conveniencia de adapta-la inscrición de determinados ficheiros creados pola Orde do 27 de xullo de 1994 (Diario Oficial de Galicia nº 146, do 30 de xullo) ó cambio lexislativo operado na materia xustifica a súa modificación, limitada no presente caso, ó cambio dalgunhas das características definidoras de determinados ficheiros existentes.
En consecuencia, en virtude das facultades que me confire o artigo 34.6º da Lei 1/1983, do 22 de febreiro, reguladora da Xunta de Galicia e do seu presidente, modificada parcialmente pola Lei 11/1988, do 20 de outubro,
DISPOÑO:
Artigo 1º.-Obxecto.
A presente orde ten por obxecto a regularización das inscricións dos ficheiros da Consellería de Asuntos Sociais, Emprego e Relacións Laborais publicados na Orde do 27 de xullo de 1994 pola que se crearon os ficheiros automatizados de datos de carácter persoal da Consellería de Sanidade e Servicios Sociais.
Artigo 2º.-Contido.
A información esixida no artigo 20.2º da Lei orgánica 15/1999, do 13 de decembro, de protección de datos de carácter persoal para as disposicións de modificación de ficheiros está contida no anexo desta orde, en cada un dos ficheiros creados.
Artigo 3º.-Finalidade e uso dos ficheiros.
Os datos de carácter persoal, rexistrados nos ficheiros automatizados da Consellería de Asuntos Sociais, Emprego e Relacións Laborais modificados pola presente orde só serán utilizados para os fins
expresamente previstos no anexo e por persoal debidamente autorizado.
Artigo 4º.-Cesión de datos.
No suposto de cesión de datos ás administracións públicas haberá que se ater ó disposto na normativa vixente.
Artigo 5º.-Medidas de seguridade.
As medidas de seguridade dos ficheiros, e en función do nivel en que estes se clasifican, están especificadas no correspondente documento de seguridade.
Disposición derradeira
A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 27 de febreiro de 2003.
María José Cimadevila Cea
Conselleira de Asuntos Sociais, Emprego
e Relacions Laborais
ANEXO
Pensións non contributivas:
a) Finalidade e usos previstos para o mesmo.
Xestión e tramitación de expedientes de pensións non contributivas, para exercer así as atribucións, competencias e funcións en materia de política establecidas para esta consellería.
b) Persoas ou colectivos sobre os que se pretenda obter datos de carácter persoal ou que resulten obrigados a subministralos.
Pensionistas e solicitantes de pensións non contributivas residentes na Comunidade Autónoma galega.
c) Procedemento de recollida de datos.
Declaración e formularios.
Rexistros públicos.
Administracións públicas.
d) Estructura básica do ficheiro.
Base de datos.
e) Tipo de datos incluídos no ficheiro.
Datos de carácter persoal: estado civil, datos da familia, data de nacemento, lugar de nacemento, sexo, nacionalidade.
Datos de carácter identificativo: DNI. NSS/MUTUALIDAD, nome e apelidos, enderezo, teléfono.
Datos de circunstancias sociais: propiedades, posesións.
Datos económicos: datos bancarios, actividades e negocios, ingresos, rendas, investimentos, bens.
Datos de transaccións: bens e servicios recibidos polo afectado.
Datos especialmente protexidos: saúde.
f) Cesións/transferencias previstas.
Ministerio de Traballo e Asuntos Sociais.
g) Órgano responsable do ficheiro.
Dirección Xeral de Servicios Comunitarios e Inclusión Social.
h) Servicios ou unidades ante os que se poderán exerce-los dereitos de acceso, rectificación, cancelación e oposición.
Dirección Xeral de Servicios Comunitarios e Inclusión Social da Consellería de Asuntos Sociais, Emprego e Relacións Laborais.
i) Nivel de seguridade.
Alto.
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA
