O artigo 28.2º da Constitución española recoñece como dereito fundamental da persoa o dereito á folga.
O exercicio deste dereito na Administración e nas empresas, entidades e institucións públicas ou privadas, que presten servicios públicos ou de recoñecida e inaprazable necesidade, no ámbito e competencias da Comunidade Autónoma de Galicia, está condicionado ó mantemento dos servicios esenciais fixados no artigo 2 do Decreto 155/1988, do 9 de xuño (DOG nº 116, do 20 de xuño), entre os que se atopa a sanidade.
O exercicio público da prestación da asistencia sanitaria e social non se pode ver afectado gravemente polo lexítimo dereito do exercicio de folga, xa que aquel é considerado e recoñecido prioritariamente en relación a este.
O artigo 3 do citado decreto faculta os conselleiros competentes, por razón dos servicios esenciais afectados, para que, mediante orde, e diante cada situación de folga, decidan o mínimo de actividade necesaria para asegura-lo mantemento de tales servicios, así como para determina-lo persoal necesario para a súa prestación.
Convocada a folga que afecta os traballadores da empresa La Guía, S.L. adxudicataria do servicio de limpeza do Hospital Nicolás Peña e que se iniciará o día 10 de febreiro con carácter indefinido, logo de audiencia ó comité de folga,
DISPOÑO:
Artigo 1º
A folga convocada que se iniciará o día 10 de febreiro de 2003, que afecta os traballadores da empresa La Guía, S.L. adxudicataria do servicio de limpeza do Hospital Nicolás Peña, enténdese condicionada ó mantemento dos servicios mínimos que se establecen nesta orde.
Os servicios mínimos que se fixan resultan totalmente imprescindibles para mante-lo adecuado funcionamento do servicios afectados do centro sanitario, en evitación de que se produzan graves prexuízos ós usuarios; tendo en conta, fundamentalmente, que a folga ten incidencia ó longo de toda a xornada laboral e ten carácter indefinido.
Con tal obxecto, debe garantirse a limpeza nas áreas seguintes:
1º Nas plantas 4ª e 5ª do hospital, camas de enfermos e controis de enfermería, con limpeza diaria.
2º Consultas externas, limpeza diaria.
3º Tratamento de residuos, limpeza diaria.
4º Zonas comúns e administración, limpeza semanal.
5º Transporte diario para limpeza e reposición de lencería, excepto domingos e festivos.
Para iso son necesarios os seguintes efectivos:
-4 limpadores/as en quenda de mañá, de 8.15 a 14.45 horas, presencia diaria, incluídos os domingos e os festivos.
-1 limpador/a en quenda de tarde, de 15.30 a 22 horas, presencia diaria, incluídos os domingo e os festivos.
-1 limpador/a en quenda de noite de 22 a 8 horas, presencia diaria, incluídos os domingos e os festivos.
-1 conductor en quenda de mañá, os días laborables.
Artigo 2º
A designación nominal, con carácter rotatorio, do persoal que deberá cubri-los distintos servicios faraa a dirección da empresa consignataria procedendo á súa publicación nos taboleiros de anuncios do centro de traballo afectado.
Artigo 3º
Os paros e alteracións no traballo por parte do persoal necesario para o mantemento dos servicios mínimos determinados no anexo serán considerados ilegais para os efectos do establecido no artigo 16.1º do Real decreto lei 17/1977, do 4 de marzo (BOE nº 58, do 9 de marzo).
Artigo 4º
O disposto nos artigos anteriores non significará ningún tipo de limitación dos dereitos que a normativa reguladora da folga recoñece ó persoal nesta situación, nin tampouco sobre a tramitación e efectos das peticións que a motiven.
Artigo 5º
Sen prexuízo do que establecen os artigos anteriores, deberanse observa-las normas legais e regulamentarias vixentes en materia de garantías dos usuarios dos establecementos sanitarios.
Disposición derradeira
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 5 de febreiro de 2003.
José Mª Hernández Cochón
Conselleiro de Sanidade
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA