O artigo 28.2º da Constitución española recoñece como dereito fundamental da persoa o dereito á folga.
O exercicio deste dereito na Administración e nas empresas, entidades e institucións públicas ou privadas, que presten servicios públicos ou de recoñecida e inaprazable necesidade, no ámbito e competencias da Comunidade Autónoma de Galicia, está condicionado ó mantemento dos servicios esenciais fixados no artigo 2 do Decreto 155/1988, do 9 de xuño (DOG nº 116, do 20 de xuño), entre os que se atopa a sanidade.
O exercicio público da prestación da asistencia sanitaria non se pode ver afectado gravemente polo lexítimo dereito do exercicio de folga, xa que aquel é considerado e recoñecido prioritariamente en relación a este.
O artigo 3 do citado decreto faculta os conselleiros competentes, por razón dos servicios esenciais afectados, para que, mediante orde, e diante cada situación de folga, decidan o mínimo de actividade necesaria para asegura-lo mantemento de tales servicios, así como para determina-lo persoal necesario para a súa prestación.
Convocada folga que afecta o persoal das empresas Ambulancias María Pita, S.A., que ten contratadas coa Fundación Pública Urxencias Sanitarias 061 tres ambulancias asistenciais e unha medicalizada para a cobertura da rede de transporte sanitario urxente no concello da Coruña; Gallega de Transporte Sanitario, S.A., que ten contratadas coa Fundación Pública Urxencias Sanitarias 061 tres ambulancias asistenciais para a cobertura da rede de transporte sanitario urxente nas bases de Betanzos, Oleiros e Bergondo, e na empresa Ambulancias González Cundíns, S.A., que ten contratadas coa Fundación Pública Urxencias Sanitarias 061 a rede de transporte sanitario urxente, unha ambulancia asistencial en cada unha das bases de Arteixo e Vimianzo; folga que se iniciará ás 0 horas do día 25 de xaneiro de 2003 con carácter indefinido, logo da audiencia ós comités de folga,
DISPOÑO:
Artigo 1º
A convocatoria de folga, que afecta o persoal dependente das empresas Ambulancias María Pita, S.A., Gallega de Transporte Sanitario, S.A. e Ambulancias González Cundíns, S.A., que se iniciará ás 0 horas do día 25 de xaneiro de 2003, con carácter indefinido, enténdese condicionada ó mantemento dos servicios mínimos que se establecen a seguir.
Os servicios mínimos que se fixan resultan totalmente imprescindibles para mante-la necesaria cobertura asistencial da atención urxente nos ámbitos afectados no servicio de ambulancias, para evitar que se produzan graves prexuízos ós usuarios; tendo en conta, fundamentalmente, que a folga ten incidencia ó longo de toda a xornada laboral e ten carácter indefinido. Cabe sinalar que a folga afectará a uns 400.000 habitantes que residen nesa área, que quedan privados do recurso de transporte sanitario se o precisan; que nesas áreas están situados polígonos industriais a onde se desprazan persoas que residen noutras áreas que tamén se verán afectadas; que pola actividade destes polígonos poden ocorrer accidentes e darse situacións de urxencia difícil de resolver se non están dispoñibles os recursos; ademais hai numerosas vías de comunicación nas que os accidentes de tráfico quedarían sen atención. Por outra parte o persoal da rede de transporte sanitario urxente (RTSU) é persoal formado
na asistencia urxente, coñece técnicas de soporte vital básico, de inmobilización do politraumatizado, de desfibrilación e asistencia na parada cardíaca, polo que a atención non pode ser substituída.
Por estes motivos e porque o deseño e o número de ambulancias contratadas está axustado á demanda e estas empresas son as únicas concesionarias do servicio de transporte sanitario urxente na súa zona, os servicios mínimos deberán cubri-lo 100% dos servicios solicitados pola Fundación Pública Urxencias Sanitarias 061.
Tales mínimos responden á necesidade de compatibiliza-lo respecto ineludible ó exercicio do derei-
to á folga coa adecuada atención ós usuarios do servicio de ambulancias que, baixo ningún concepto, poden quedar desasistidos polas características do servicio dispensado.
Artigo 2º
A determinación dos efectivos necesarios e a designación nominal, con carácter rotatorio, do persoal que deberá cubri-los distintos servicios serán feitos pola dirección da empresa concesionaria procedendo á súa publicación nos taboleiros de anuncios do centro de traballo afectado.
Artigo 3º
Os paros e alteracións no traballo por parte do persoal necesario para o mantemento dos servicios mínimos determinados no anexo serán considerados ilegais para os efectos do establecido no artigo 16.1º do Real decreto lei 17/1977, do 4 de marzo (BOE nº 58, do 9 de marzo).
Artigo 4º
O disposto nos artigos anteriores non significará ningún tipo de limitación dos dereitos que a normativa reguladora da folga lle recoñece ó persoal nesta situación, nin tampouco sobre a tramitación e efectos das peticións que a motiven.
Artigo 5º
Sen prexuízo do que establecen os artigos anteriores, deberanse observa-las normas legais e regulamentarias vixentes en materia de garantías dos usuarios dos establecementos sanitarios.
Disposicion derradeira
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 23 de xaneiro de 2003.
José Mª Hernández Cochón
Conselleiro de Sanidade