O Pleno da Corporación municipal do Concello de Nogueira de Ramuín, reunido en sesión do día 6 de setembro de 2002, acordou cederlle á Comunidade Autónoma de Galicia o dereito real de uso dun terreo no termo municipal de Nogueira de Ramuín, destinado á construccción dun aparcadoiro no contorno do mosteiro de Santo Estevo de Ribas de Sil.
A Secretaría Xeral e do Patrimonio tramitou o correspondente expediente de aceptación de cesión, de conformidade co disposto nos artigos 16, 17 e 23 da Lei 3/1985, do 12 de abril, do patrimonio da Comunidade Autónoma de Galicia e 33, 34 e 38 do Decreto 50/1989, do 9 de marzo, polo que se aproba o regulamento para a execución da dita lei.
Na súa virtude, por proposta do conselleiro de Economía e Facenda, feita nos termos nos que o Concello de Nogueira de Ramuín acordou a cesión e logo
de deliberación do Consello da Xunta de Galicia na súa reunión do día dezanove de decembro de dous mil dous,
DISPOÑO:
Artigo 1º
Acéptase a cesión, feita polo Concello de Nogueira de Ramuín, a título gratuíto, do dereito real de uso da parcela coñecida como praza de Santo Estevo, situada na fachada principal do mosteiro de Santo Estevo de Ribas de Sil, termo de Santo Estevo de Ribas de Sil, concello de Nogueira de Ramuín, dunha superficie de mil setecentos sesenta metros e oitenta centímetros cadrados. Linda: ó norte, mosteiro de Santo Estevo; ó sur, estrada, M. Fernando González, Rosario Rodríguez Fernández; ó leste, ceminterio, José L. de la Sotilla Varela; e ó oeste, estrada, Isaura Rodríguez Pérez.
A dita parcela figura inscrita a nome do Concello de Nogueira de Ramuín no Rexistro da Propiedade de Ourense, número dous, ó tomo 1552, libro 89, folio 51, nº 10108.
Artigo 2º
O dereito de uso cedido destinarase á construcción dun aparcadoiro subterráneo que dea servicio ó aloxamento turístico que se creará mediante rehabilitación do mosteiro de Santo Estevo de Ribas de Sil.
Artigo 3º
A Consellería de Economía e Facenda, a través da Secretaría Xeral e do Patrimonio, procederá á formalización da cesión no correspondente documento público e á inscrición do ben no Rexistro da Propiedade a nome da Comunidade Autónoma de Galicia.
Disposición derradeira
A Consellería de Economía e Facenda, a través da Secretaría Xeral e do Patrimonio, levará a cabo tódolos trámites necesarios para a efectividade do presente decreto.
Santiago de Compostela, dezanove de decembro de dous mil dous.
Manuel Fraga Iribarne
Presidente
José Antonio Orza Fernández
Conselleiro de Economía e Facenda
