Pola Orde do 11 de marzo de 2002 (DOG do 18 de marzo) establecéronse as bases reguladoras de axudas e subvencións en materia de industria, enerxía, minería, tecnoloxía e desenvolvemento sectorial, comercio e consumo.
Dentro dos requisitos que se esixen ás organizacións de consumidores para poder seren beneficiarias do programa específico de axudas, dentro da orde referida, encóntrase o horario de atención ó público das oficinas coas que contan.
Tendo en conta as peticións das organizacións relacionadas con este asunto, e en atención ó seu carácter, ó tratarse de organizacións sen ánimo de lucro, así como o difícil cumprimento do horario establecido no seu día no marco da orde de axudas,
DISPOÑO:
Artigo 1º
Modifica-lo anexo XIV da citada orde, onde di:
«Dispoñer de oficinas abertas ó público que teñan como único fin a defensa do consumidor e usuario; oficinas que deberán estar abertas ó público durante un mínimo de 25 horas semanais, polo menos 4 horas diarias de luns a sábado, durante todo o ano. Disporán dun cartel horario, en lugar visible, á entrada do local».
Substituílo polo seguinte texto:
«Dispoñer de oficinas abertas ó publico que teñan como único fin a defensa do consumidor e usuario; oficinas que deberán estar abertas ó público durante un mínimo de 20 horas semanais, polo menos 4 horas diarias de luns a venres. Disporán dun cartel horario en lugar visible, á entrada do local».
Artigo 2º
Modifica-lo anexo XV da citada orde, onde di: «Dispoñer de oficinas abertas ó público que teñan como único fin a defensa do consumidor e usuario, oficinas que deberán estar abertas ó público durante un mínimo de 25 horas semanais, polo menos 4 horas diarias de luns a sábado, durante todo o ano. Disporán dun cartel horario, en lugar visible, á entrada do local».
Substituílo polo seguinte texto:
«Dispoñer de oficinas abertas ó público que teñan como único fin a defensa do consumidor e usuario, oficinas que deberán estar abertas ó público durante un mínimo de 20 horas semanais, polo menos 4 horas diarias de luns a venres. Disporán dun cartel horario en lugar visible, á entrada do local».
Santiago de Compostela, 18 de novembro de 2002.
Juan Rodríguez Yuste
Conselleiro de Industria e Comercio