Mediante a orde desta consellería do 30 de maio de 2002, establecéronse as bases reguladoras do programa de leite escolar nesta Comunidade Autónoma, para a concesión das axudas para a subministración ós alumnos de centros escolares dos productos lácteos transformados.

Esta orde é consecuencia do establecido no Regulamento (CE) nº 1255/1999, do Consello, e no Regulamento (CE) nº 2707/2000, da Comisión, así como do Real decreto 194/2002, do 15 de febreiro, sobre as modalidades de aplicación no Estado español do establecido nesa normativa comunitaria.

No anexo II da devandita orde establecéronse os prezos máximos que deberán paga-los alumnos nos centros escolares, dispoñendo na disposición transitoria segunda que eses prezos rexerían durante o curso escolar 2001-2002. Por outra banda, no artigo 4.4º da mesma orde prevese que, para cada curso escolar, poderá variarse o prezo máximo que deberá paga-lo alumno para os diferentes productos subvencionables, de acordo co custo medio da materia prima e as modificacións que, se é o caso, se produzan na contía da axuda. Así pois, dándose neste momento as circunstancias de inicio recente do novo curso escolar 2002-2003 e de incremento do custo do leite e determinados productos lácteos, faise necesario axusta-lo prezo máximo dos diferentes productos subvencionables á situación actual.

Segundo a Lei 7/1994, do 29 de decembro, de creación do Instituto Lácteo e Gandeiro de Galicia (Ilgga), e o Decreto 128/1996, do 14 de marzo, que a desenvolve, así como o Decreto 50/2002, do 14

de febreiro, da súa estructura orgánica, correspóndelle a este, entre outras funcións, a concesión das axudas comunitarias para a subministración de determinados productos lácteos ós alumnos de centros escolares, dentro da organización común de mercados do leite e productos lácteos.

Polo tanto, de acordo co disposto no artigo 30.I.3 do Estatuto de autonomía de Galicia, e en uso das facultades que me confire a Lei 1/1983, do 22 de febreiro, reguladora da Xunta e de seu presidente, modificada pola Lei 11/1988, do 20 de outubro, e o Decreto 50/2002, do 14 de febreiro, polo que se establece a estructura orgánica da Consellería de Política Agroalimentaria e Desenvolvemento Rural e do Ilgga,

DISPOÑO:

Artigo único.-Para o curso escolar 2002-2003, o prezo máximo que deberá paga-lo alumno para os diferentes productos subvencionables será o indicado no anexo desta orde.

A táboa de categorías que figura no dito anexo correspóndese cos productos conceptuados no anexo I da orde desta consellería, do 30 de maio de 2002, pola que se establecen as bases reguladoras para a concesión das axudas ós alumnos de centros escolares para o consumo de leite e determinados productos lácteos.

Disposicións derradeiras

Primeira.-Facúltase o director do Instituto Lácteo e Gandeiro de Galicia para dicta-las instruccións necesarias para o desenvolvemento e a execución desta orde.

Segunda.-Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 9 de outubro de 2002.

Juan Miguel Diz Guedes

Conselleiro de Política Agroalimentaria

e Desenvolvemento Rural

ANEXO

Programa de leite escolar

Prezos máximos que deberán paga-los alumnos nos centros escolares

Os prezos expresaranse en euros/quilogramo, sumando o IVE vixente e descontada a axuda prevista no Regulamento (CE) 2707/2000.

No caso de que os productos subministrados se expresen en litros, o prezo deberase definir por quilogramo, para o que se empregarán as conversións regulamentarias.