O artigo 20 da Lei orgánica 15/1999, do 13 de decembro, de protección de datos de carácter persoal (BOE nº 298, do 14 de decembro), especifica que a creación, modificación ou supresión de ficheiros das administracións públicas só poderán facerse mediante a disposición xeral correspondente.
O Decreto 171/2001, do 5 de xullo, regula o Rexistro de Centros e Institucións de Investigación e Investigadores de Galicia, creado pola Lei 12/1993, do 6 de agosto, de fomento de investigación e de desenvolvemento tecnolóxico de Galicia.
Para os efectos do disposto no artigo 3 do mencionado decreto, faise preciso que a Universidade
da Coruña cree o ficheiro de Investigadores da Universidade da Coruña.
Polo que antecede, este rectorado,
DISPÓN:
Primeiro.-Mediante esta orde, a Universidade da Coruña crea o ficheiro especificado no anexo, que contén a información esixida no artigo 20.2º da Lei orgánica 15/1999, do 13 de decembro, de protección de datos de carácter persoal para as disposicións de creación dos ficheiros.
Segundo.-O Vicerrectorado de Investigación responsable deste ficheiro adoptará as medidas de xestión e organización que sexan necesarias, asegurando a confidencialidade, dereitos e obrigas recoñecidos na Lei orgánica 15/1999, do 13 de decembro.
Terceiro.-Os datos de carácter persoal, rexistrados no ficheiro da Universidade da Coruña, ós que se refire o anexo só serán utilizados para os fins expresamente previstos e por persoal debidamente autorizado.
Cuarto.-Para a cesión de datos ás administracións públicas haberá que aterse ó disposto na normativa vixente na materia.
A Coruña, 15 de maio de 2002.
José Luis Meilán Gil
Rector da Universidade da Coruña
ANEXO
Ficheiro de nova creación da Universidade da Coruña.
RIGA-UDC, Rexistro de Centros e Institucións de Investigación e Investigadores de Galicia na Universidade da Coruña.
a) Finalidade do ficheiro e uso previsto: xestión automatizada dos currículum vitae profesionais dos investigadores da Universidade da Coruña que desenvolvan funcións de investigación ou que perciban algún dos beneficios que a Comunidade Autónoma de Galicia estableza para os fins da Lei 12/1993, do 6 de agosto.
b) Medidas de seguridade: nivel básico. As medidas de seguridade polas que se rexerá este ficheiro están especificadas no documento de seguridade dos Servicios Informáticos de Apoio á Investigación do Vicerrectorado de Investigación da Universidade da Coruña.
c) Datos de carácter persoal recollidos:
-Datos de carácter identificativo: NIF, nome e apelidos, enderezo (postal e electrónico), teléfono, fax.
-Datos de características persoais: data de nacemento, sexo.
-Datos académicos e profesionais: formación, titulacións, experiencia profesional, datos relativos á producción científica.
-Datos relativos ó emprego: postos de traballo, categoría/grao, situación administrativa, dedicación.
-Datos económico-financeiros: importe dos contratos ou proxectos de investigación e desenvolvemento.
d) Órgano responsable do ficheiro:
-Vicerrectorado de Investigación.
e) Os dereitos de acceso, rectificación, cancelación e oposición de datos existentes no ficheiro poderán exercerse, se é o caso, ante a unidade ou dependencia responsable do ficheiro, sita na rúa da Mestranza, 15001 A Coruña.
f) A responsabilidade de seguridade correspóndelle ós Servicios Informáticos de Apoio á Investigación do Vicerrectorado de Investigación da Universidade da Coruña.
g) Procedemento de recollida de datos: transmisión electrónica de datos/Internet.
h) Cesión de datos:
-Secretaría Xeral de Investigación e Desenvolvemento (Consellería da Presidencia, Relacións Institucionais e Administración Pública da Xunta de Galicia).
-Organismos públicos estatais responsables de ciencia e tecnoloxía.