A Orde do 19 de xaneiro de 1996 aproba a reordenación dos polígonos de bateas denominados C, D, E, F e G do distrito marítimo de Cangas na provincia de Pontevedra.

Mediante a Orde do 7 de febreiro de 1996 decláranse de reserva exclusiva determinadas cuadrículas do polígono de viveiros Cangas D.

No tempo transcorrido desde a entrada en vigor da anterior orde obsérvase que é necesario amplia-lo número de cuadrículas declaradas de reserva exclusiva.

Esta necesidade vén dada pola evolución dos episodios de fitoplancton tóxico, os resultados das experiencias realizadas na zona inicialmente declarada de reserva e as peticións do sector no senso de amplia-la zona de reparqueo de moluscos para autodepuración.

Visto o informe emitido polo Centro de Control do Medio Mariño,

DISPOÑO:

Artigo 1º

Modifícase o artigo 1 da Orde do 7 de febreiro de 1996 (DOG nº 38) pola que se declaran de reserva exclusiva determinadas cuadrículas do polígono de viveiros Cangas D, que terá a seguinte redacción:

Decláranse de reserva exclusiva vintedúas (22) cuadrículas do polígono Cangas D do distrito marítimo de Cangas; estas cuadrículas están asignadas no acordo de reordenación cos números comprendidos entre o 69 e o 90, ambos inclusive.

Disposición derradeira

A presente orde entrará en vigor o día seguinte ó da súa publicación no Diario Oficial de Galicia.

Santiago de Compostela, 29 de maio de 2002.

Enrique César López Veiga

Conselleiro de Pesca e Asuntos Marítimos