A fórmula da delegación competencial é utilizada polas administracións públicas, entre elas os organismos autónomos, co fin de conseguir unha maior axilización no trámite e resolución dos asuntos administrativos, en beneficio tanto do funcionamento da Administración como dos administrados.
Publicado o Decreto 45/2002, do 8 de febreiro, que estableceu a nova estructura orgánica do Servicio Galego de Saúde, procede adecuar á nova esrtuctura do organismo alí establecida as normas de delegación existentes.
Por razóns de técnica normativa reúnense nunha soa norma tódalas delegacións, tanto nos órganos centrais como periféricos, e nos complexos hospitalarios, dun xeito acorde coa norma de estructura que tamén agrupou a regulación dos órganos centrais e periféricos do Servicio Galego de Saúde.
Esta delegación faise de conformidade cos principios recollidos no artigo 13 da Lei 30/1992, do 26 de novembro (modificada por Lei 4/1999) sobre réxime xurídico das administracións públicas e do procedemento administrativo común; e nos artigos 43 e 44 da Lei 1/1983, do 22 de febreiro (modificada por Lei 11/1988, do 20 de outubro) reguladora da Xunta e do seu presidente.
Na súa virtude, facendo uso das facultades que me confiren o artigo 38 da Lei 1/1983, do 22 de febreiro (modificada por Lei 11/1988, do 20 de outubro) reguladora da Xunta e do seu presidente; o artigo 3.2º do Decreto 45/2002, do 8 de febreiro, polo que se establece a estructura orgánica do Servicio Galego de Saúde; os artigos 9 b) e 72.4º do Decreto lexislativo 1/1999 (modificada polas leis 5/2000, do 28 de decembro e 8/1999, do 30 de decembro) que aprobou o texto refundido da Lei de réxime financeiro e presupostario de Galicia; e tendo en conta o disposto no artigo 13 da Lei 30/1992, do 26 de novembro (modificada por Lei 4/1999) sobre réxime xurídico das administracións públicas e do procedemento administrativo común; e nos artigos 43 e 44 da Lei 1/1983 (modificada por Lei 11/1988, do 20 de outubro) reguladora da Xunta e do seu presidente,
DISPOÑO:
Primeiro.-Deléganse na Secretaría Xeral do Servicio Galego de Saúde as seguintes facultades:
a) A execución dos acordos de carácter xeral do Consello de Administración.
b) O despacho e resolución de cantos expedientes lle estean atribuídos ó presidente por disposición legal ou regulamentaria, sempre que non estean expresamente delegados pola presente orde noutra autoridade ou órgano administativo.
c) A resolución dos expedientes e asuntos de índole patrimonial e a formalización dos correspondentes negocios xurídicos, así como o exercicio daqueloutras competencias en materia patrimonial atribuídas ó presidente do organismo.
d) A resolución na vía administrativa dos recursos interpostos contra as resolucións das autoridades do organismo, agás as dictadas nos expedientes sancionadores non disciplinarios, sobre materias ou asuntos dos que a súa resolución non estea atribuída competencialmente ou por delegación a outros órganos do Sergas.
e) A resolución das reclamacións previas ás vías xudiciais civil e social, en materia de expedientes disciplinarios, de todo o persoal do organismo autónomo.
f) A concesión de permisos ou licencias que non teñan repercusión no capítulo I dos orzamentos, respecto do persoal dos servicios centrais, por proposta da correspondente división.
g) A autorización das comisións de servicio con dereito a indemnización, en relación ó persoal da Secretaría Xeral.
h) En relación ós directores provinciais e persoal directivo de institucións sanitarias, tanto no ámbito de atención primaria como de especializada, a autorización das comisións de servicios con dereito a indemnización que deban levarse a cabo fóra da Comunidade Autónoma, así como a concesión de permisos ou licencias que non teñan repercusión no capítulo I dos orzamentos de gastos.
i) En relación ó persoal das divisións e direccións provinciais e a proposta destas, a autorización de asistencia a cursos, xornadas e, en xeral, actos de capacitación ou perfeccionamento.
Respecto do persoal directivo das institucións sanitarias, unha vez concedida a autorización a que se refire o parágrafo anterior, a institución daralle conta ós directores provinciais da referida asistencia.
Para tal efecto, enténdese por «persoal directivo» os directores xerentes e demais directores e subdirectores de institucións sanitarias, tanto no ámbito da atención primaria como da especializada.
j) A autorización das vacacións anuais de todo o persoal de servicios centrais e direccións provinciais do Sergas, por proposta da correspondente división ou dirección provincial.
Segundo.-Deléganse na División de Asistencia Sanitaria as seguintes facultades:
a) A resolución, logo de información da respectiva dirección provincial, dos expedientes de reintegro de gastos ós beneficiarios de asistencia sanitaria da Seguridade Social, en contía superior a 30.000 A.
b) En relación ó persoal do seu centro directivo, a autorización das comisións de servicio con dereito a indemnización.
Terceiro.-Deléganse na División de Recursos Económicos, ademais do previsto no artigo 14.3º do Decreto 45/2002, do 8 de febreiro, as seguintes facultades:
a) Actuar como órgano de contratación do Sergas para os concertos de asistencia sanitaria, e para os concertos sociosanitarios, e outros contratos para a prestación de servicios sanitarios.
b) A autorización do uso temporal de centros e servicios que non teñan sido aínda concertados.
c) En relación co persoal do seu centro directivo, a autorización das comisións de servicio con dereito a indemnización.
d) Proposta e, se é o caso, aprobación das modificacións orzamentarias que lle correspondan ó Sergas.
e) Tramitación de expedientes e, se é o caso, actuar como órgano de contratación de gastos correspondentes a centros de diferentes provincias.
f) Xestión e resolución das actuacións e procedementos derivados de normas regulamentarias, contratos, acordos ou convenios, exclusivamente en materia de financiamento, que lle correspondan ó Sergas, agás nas competencias atribuídas á Secretaría Xeral.
Cuarto.-Deléganse na División de Recursos Humanos, ademais do previsto no artigo 18.2º do Decreto 45/2002, do 8 de febreiro, as seguintes facultades:
a) A resolución dos recursos interpostos contra actos das autoridades e órganos do Sergas dictadas en materia de recursos humanos, así como das reclamacións previas á vía xudicial laboral.
b) A convocatoria e resolución dos procesos selectivos para a cobertura de postos de traballo de persoal laboral, sen prexuízo do previsto no artigo 25.3º e) do Decreto 45/2002, en relación ós directores provinciais do Sergas.
c) A convocatoria de probas selectivas para o ingreso nos corpos ou escalas de carácter sanitario, o nomeamento de funcionarios pertencentes ós ditos corpos e escalas, e a expedición dos correspondentes títulos, así como dicta-las resolucións sobre xubilacións.
d) A convocatoria e resolución de concursos de traslados para a provisión de prazas das áreas de saúde, institucións e servicios sanitarios.
e) A aprobación das bases xerais para as convocatorias de acceso a prazas de área de saúde, institucións e servicios sanitarios.
f) A concesión de comisións de servicio ó persoal estatutario entre institucións dependentes de diferentes direccións provinciais do Sergas, así como a adscrición daquel persoal ós servicios centrais, e a autorización para que poida pasar a prestar servicios noutras entidades ou organismos das administracións públicas.
g) A concesión das comisións de servicio de duración inferior a 3 meses, consideradas no artigo 15.7º da Lei 4/1988, do 26 de maio, da función pública de Galicia.
h) A concesión das prestacións estatutarias refiridas á acción social.
i) En relación ó persoal do seu centro directivo, a autorización das comisións de servicio con dereito a indemnización.
j) En relación ó persoal de servicios centrais ou direccións provinciais, a concesión de permisos ou licencias que teñan repercusión no capítulo I dos orzamentos de gastos.
k) A autorización ó persoal estatutario dos permisos sen soldo regulamentarios ou as súas prórrogas, cando sexan superiores a un mes en cada ano natural.
l) A resolución dos expedientes de modificación do cadro de persoal do Sergas que correspondan a este organismo, de conformidade co establecido na normativa vixente.
m) En relación co persoal estatutario e co persoal funcionario e laboral dependente do organismo, non incluído nas relacións de postos de traballo, a resolución en materias de réxime retributivo que correspondan ó organismo de conformidade co previsto na normativa vixente.
n) Todos aqueles actos da administración e xestión ordinaria do persoal do organismo que non fosen delegados expresamente pola presente orde noutros órganos.
Quinto.-Delégase na División de Farmacia e Productos Sanitarios a seguinte facultade:
En relación co persoal do seu centro directivo, a autorización das comisións de servicio con dereito a indemnización.
Sexto.-Deléganse nos directores xerentes de institucións sanitarias ou nos seus equivalentes, tanto no ámbito da atención primaria como da especializada, e en relación cos seus respectivos centros de gasto, as seguintes facultades:
a) En relación co persoal non directivo dependente do centro, a autorización de comisións de servicio con dereito a indemnización, e a autorización para a asistencia a cursos, xornadas e, en xeral, actos de capacitación ou perfeccionamento.
b) En relación co persoal funcionario e laboral dependente do centro que ocupe postos de traballo incluídos nas relacións de postos de traballo, a concesión de permisos e licencias que non teñan repercusión na súa nómina.
c) En relación co persoal estatutario e co persoal funcionario e laboral dependente do centro non incluído nas relacións de postos de traballo, a concesión de permisos e licencias que non excedan dun mes de duración e as súas prórrogas.
d) A autorización das comisións de servicio con dereito a indemnización que se realicen dentro da Comunidade Autónoma por eles mesmos ou polo persoal directivo do centro.
e) A autorización, para o persoal estatutario, dos permisos sen soldo regulamentarios, ou as súas prórrogas, cando sexan iguais ou inferiores a un mes en cada ano natural.
f) A expedición das dilixencias de posesión, incorporación ou cesamento que, se é o caso, se produzan. Tales dilixencias notificaránselle á respectiva dirección provincial.
g) O nomeamento ou a contratación de persoal temporal das institucións ou servicios deles dependentes, logo da autorización da correspondente dirección provincial; así como a selección e nomeamento de persoal temporal na categoría de facultativo especialista.
Os acordos que se adopten neste ámbito notificaránselle á División de Recursos Humanos e á respectiva dirección provincial.
h) O control do horario e da asistencia e presencia física do persoal do seu centro.
i) A autorización dos gastos e as propostas de pagamento con cargo ós orzamentos dos seus respectivos centros.
j) A actuación como órgano de contratación nos contratos imputables ós seus respectivos orzamentos de gastos, que se refiran a:
-Contratos de obras ata un importe de 300.000 A, e sempre que a obra non requira informe da oficina de supervisión de proxectos por afecta-la estabilidade, seguridade ou estanqueidade.
-Contratos de consultoría e asistencia, e de servicios, ben que cando a contía exceda de 300.000 A requirirá autorización expresa da División de Recursos Económicos, e se a contía excede de 1.200.000 A requirirá autorización expresa do presidente do Sergas.
-Contratos de subministración nas mesmas condicións previstas no parágrafo anterior, agás os contratos de subministracións mediante a modalidade de arrendamento que requirirá autorización expresa da División de Recursos Económicos cando a súa contía exceda de 60.000 A e autorización expresa do presidente do Sergas cando a contía exceda de 1.200.000 A. Na modalidade de arrendamento con opción de compra, computarase a contía prevista da opción para os efectos de determina-los importes referidos neste parágrafo.
Os contratos de subministracións mediante a modalidade de arrendamento financeiro requirirán autorización expresa do presidente do Sergas en tódolos casos.
Esta delegación entenderase para a autorización de gastos, propostas de pagamento e celebración de contratacións consideradas, individual ou conxun
tamente, no mesmo expediente para os diferentes centros de gasto dependentes da xerencia.
k) A celebración dos contratos administrativos especiais, logo de autorización expresa da División de Recursos Económicos.
Sétimo.-Facúltanse os secretarios provinciais, xefes dos servicios de xestión económica e investimentos, e directores de xestión ou os seus equivalentes nos respectivos centros de gasto, para formula-las correspondentes propostas nos expedientes tramitados con cargo ós orzamentos dos seus respectivos centros de gasto, integrados no orzamento do organismo autónomo.
Oitavo.-Facúltanse os directores de xestión ou os seus aquivalentes nos respectivos centros de gasto da rede do Sergas, para levar a cabo as actuacións necesarias en materia de ingresos que se deriven de servicios prestados no ámbito do seu centro e que teñan a consideración de prezo público.
Isto sen prexuízo das competencias que lle correspondan á Consellería de Economía e Facenda.
Noveno.-As resolucións e actos administrativos emanados no uso destas delegacións respectarán os requisitos formais e limitacións establecidos no artigo 13 da Lei 30/1992, (modificada por Lei 4/1999), sobre réxime xurídico das administracións públicas e do procedemento administrativo común, e nos artigos 43 e 44 da Lei 1/1983, (modificada por Lei 11/1988), reguladora da Xunta e do seu presidente.
Disposición transitoria
De conformidade co establecido na disposición transitoria primeira do Decreto 45/2002, do 8 de febreiro, e mentres non se leve a cabo o nomeamento do secretario xeral do organismo, as delegacións efectuadas a prol deste na presente orde, entenderanse referidas á Secretaría Xeral da Consellería de Sanidade.
Disposicións derrogatorias
Primeira.-Quedan derrogadas as seguintes disposicións:
1. Orde do 21 de abril do 1998, e a Orde do 23 de marzo de 2000, sobre delegación de competencias en órganos centrais e periféricos do Servicio Galego de Saúde.
2. Orde do 23 de abril de 1999, sobre delegación de competencias en órganos centrais e periféricos do Servicio Galego de Saúde.
3. Orde do 18 de marzo de 1999, e Orde do 23 de marzo de 2000,sobre delegación de competencias nos xerentes xerais dos complexos hospitalarios de Ourense e Pontevedra.
4. Orde do 6 de febreiro do 1996, sobre delegación de competencias no director de Recursos Humanos e Relacións Laborais do Complexo Hospitalario de Santiago de Compostela.
Segunda.-Quedan tamén derrogadas cantas disposicións de igual ou inferior rango que se opoñan ó establecido na presente orde.
Disposición derradeira
A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 14 de marzo de 2002.
José Mª Hernández Cochón
Conselleiro de Sanidade