Para acadar unha maior axilización no trámite e resolución dos asuntos atribuídos ó titular da consellería, o que beneficia tanto á Administración coma ós administrados, e sen esquece-lo debido respecto ós principios informadores do procedemento administrativo e ás súas garantías xurídicas, os órganos da Administración veñen facendo uso da fórmula da delegación competencial.

Publicado o Decreto 44/2002, do 8 de febreiro, polo que se establece a estructura orgánica da Consellería de Sanidade, abranguendo os seus órganos centrais e periféricos, cómpre adecuar á nova estructura as normas de delegación existentes.

Por razóns de técnica normativa reúnense nunha norma tódalas delegacións, tanto nos órganos centrais coma nos periféricos, axustando aquelas á nova estructura da consellería.

Na súa virtude, facendo uso das facultades que me confiren o artigo 38 da Lei 1/1983, do 22 de febreiro (modificada por Lei 11/1988, do 20 de outubro), reguladora da Xunta e do seu presidente; o artigo 4.1º do Decreto 44/2002, do 8 de febreiro, polo que se establece a estructura orgánica da Consellería de Sanidade; os artigos 8 e 72.4º do Decreto lexislativo 1/1999 (modificado polas leis 5/2000, do 28 de decembro e 8/1999, do 30 de decembro), que aprobou o texto refundido la Lei de réxime financeiro e orzamentario de Galicia; e tendo en conta o disposto no artigo 13 da Lei 30/1992, do 26 de novembro (modificada por Lei 4/1999), sobre réxime

xurídico das administracións públicas e do procedemento administrativo común; e nos artigos 42 e 43 da Lei 1/1983 (modificada por Lei 11/1988, do 20 de outubro), reguladora da Xunta e do seu presidente,

DISPOÑO:

Primeiro.-Deléganse no secretario xeral da consellería as seguintes facultades:

a) Dispoñer de canto atinxa ó réxime interno da consellería, cando non sexa competencia doutro centro directivo.

b) Despacho e resolución dos expedientes de índole administrativa que lle estean atribuídos ó titular da consellería.

c) Resolución na vía administrativa dos recursos interpostos contra os actos e resolucións das autoridades da consellería, agás as dictadas en expedientes sancionadores non disciplinarios.

d) Autorizar e dispoñe-los gastos xerais dos servicios da consellería ata o límite dos créditos autorizados; así como a facultade de solicitar do conselleiro de Economía e Facenda a ordenación dos pagamentos correspondentes.

e) As funcións que como órgano de contratación lle estean atribuídas ó titular da consellería, sen prexuízo das que lle coresponden de seu segundo o artigo 2.B.a) do Decreto 119/1982, do 5 de outubro.

f) O exercicio da xefatura do persoal do departamento e a súa inspección, segundo o previsto no artigo 2.D.e) do Decreto 119/1982, do 5 de outubro.

g) A incoación de expedientes disciplinarios a todo o persoal da consellería e do Sergas.

h) O exercicio das potestades disciplinarias, agás a separación do servicio, de conformidade coas disposicións vixentes.

i) A autorización para a asistencia a cursos, xornadas e, en xeral, actos de capacitación ou perfeccionamento, por proposta da correspondente dirección xeral ou delegación provincial.

j) En relación co persoal dos servicios centrais, e por proposta da correspondente dirección xeral, a concesión de permisos ou licencias que non teñan repercusión no capítulo I dos orzamentos.

k) A concesión de permisos ou licencias que teñan repercusión no capítulo I dos orzamentos.

l) En relación ás delegacións provinciais da consellería, a autorización das comisións de servicios con dereito a indemnización que deban levarse a cabo fóra da Comunidade Autónoma, así como a concesión de permisos ou licencias.

m) En relación co persoal da Secretaría Xeral, a autorización das comisións de servicio con dereito a indemnización.

n) A autorización das vacacións anuais de todo o persoal dos servicios centrais e delegacións provinciais da consellería, por proposta da correspondente dirección xeral ou delegación provincial.

ñ) As facultades que lle corresponden ó conselleiro en materia de persoal, nos termos establecidos no artigo 15 da Lei 4/1988, do 26 de maio, da función pública de Galicia, e demais disposicións vixentes, coa excepción das establecidas no punto 8 do mesmo artigo en relación co persoal ó que se fai referencia no artigo 7.2º d) da Lei 8/1991, do 23 de xullo, de reforma da Lei 1/1989, do 2 de xaneiro, do Servicio Galego de Saúde.

o) As funcións inherentes ó exercicio do protectorado que lle corresponden á consellería en relación coas fundacións de interese galego.

Segundo.-Deléganse nos delegados provinciais da Consellería de Sanidade, a seguinte facultade:

En relación co persoal da delegación, a autorización das comisións de servicio con dereito a indemnización, así como a concesión de permisos ou licencias que non teñan repercusión no capítulo I dos orzamentos de gastos.

Terceiro.-As resolucións e actos administrativos emanados no uso destas delegacións respectarán os requisitos formais e as limitacións establecidos no artigo 13 da Lei 30/1992, do 26 de novembro (modificada por Lei 4/1999), sobre réxime xurídico das administracións públicas e do procedemento administrativo común, e nos artigos 43 e 44 da Lei 1/1983 (modificada por Lei 11/1988, do 20 de outubro), reguladora da Xunta e do seu presidente.

Disposición transitoria

Sen prexuízo do disposto no artigo 1 desta orde, as facultades a que se refiren as alíneas d), e), k) e ñ), serán exercidas, nos seus respectivos ámbitos, polas divisións de recursos económicos e recursos humanos do Sergas, de conformidade co establecido na disposición transitoria segunda do Decreto 45/2002, do 8 de febrero, polo que se establece a estructura orgánica do Servicio Galego de Saúde.

Disposicións derrogatorias

Primeira.-Queda derrogada a Orde do 21 de abril do 1998, sobre delegación de competencias en órganos centrais e periféricos da Consellería de Sanidade.

Segunda.-Quedan derrogadas cantas disposicións de igual ou inferior rango se opoñan ó establecido na presente orde.

Disposición derradeira

A presente orde entrará en vigor o día seguinte ó da súa publicación no Diario Oficial de Galicia.

Santiago de Compostela, 14 de marzo de 2002.

José Mª Hernández Cochón

Conselleiro de Sanidade