Con data do 12 de xuño de 2001, a Consellería de Medio Ambiente publicou no Diario Oficial de Galicia a Orde do 28 de maio de 2001 de fomento da forestación de terras agrícolas.
O prazo de admisión de solicitudes presentadas ó abeiro da dita orde rematou o día 12 de xullo de 2001.
No punto 2º do artigo 12 da mencionada orde establécese o seguinte:
O conselleiro de Medio Ambiente resolverá sobre a concesión da axuda, nun prazo máximo de seis meses contados desde o día seguinte ó da publicación no DOG desta orde, por proposta da Dirección Xeral de Montes e MAN, logo de proposta dos servicios de Montes e Industrias Forestais, en función das dispoñibilidades orzamentarias e tendo en conta os criterios indicados no artigo 8 desta orde. De acordo co artigo 44.1º da Lei 30/1992, modificada pola Lei 4/1999, o vencemento do prazo máximo establecido sen que se dictase e notificase resolución expresa, non exime a Administración da obriga de resolver, aínda que os interesados que comparezan poderán entender desestimadas as súas pretensións por silencio administrativo. Na resolución indicarase o prazo do que disporá o solicitante para a realización dos traballos, que con carácter xeral será dun mínimo de seis meses. A concesión das axudas efectuarase segundo o principio de concorrencia competitiva, obxectividade, publicidade e
transparencia das actuacións administrativas.
Este prazo remata o día 12 de decembro de 2001.
O elevado número das solicitudes presentadas e a complexidade da documentación que hai que revisar en cada unha delas imposibilita a realización, antes do día 12 de decembro de 2001, dos trámites administrativos anteriores á aprobación.
En consecuencia, e ó abeiro do disposto no artigo 42.6º da Lei 30/1992, modificada pola Lei 4/1999, de réxime xurídico das administracións públicas e do procedemento administrativo común,
DISPOÑO:
Artigo único.-Amplíase o prazo para a comunicación da aprobación e contía das axudas que se concedan ás solicitudes presentadas ó abeiro da Orde do 28 de maio de 2001 de fomento da forestación de terras agrícolas, en seis meses, é dicir, ata o día 12 de xuño de 2002.
Santiago de Compostela, 19 de novembro de 2001.
Carlos del Álamo Jiménez
Conselleiro de Medio Ambiente