O Instituto Galego da Vivenda e Solo acordou, mediante resolución do director xeral do 31 de xullo de 2001, a cesión a título gratuíto do uso por un prazo de dez anos de tres locais para fins de utilidade pública ou interese social da Consellería de Sanidade e Servicios Sociais.

Conforme os artigos 17.1º da Lei 3/1985, do 12 de abril, do patrimonio da Comunidade Autónoma de Galicia, e 34 do seu regulamento aprobado polo Decreto 50/1989, do 9 de marzo, a adquisición pura e simple de bens a título gratuíto ou lucrativo requirirá decreto do Consello da Xunta de Galicia, por proposta da Consellería de Economía e Facenda. Así mesmo, os artigos 23.1º da dita lei e 38.1º do regulamento establecen que non se poderán adquirir bens ou dereitos a título lucrativo cando o valor dos gravames, cargas ou afeccións impostos sobre eles exceda o seu valor intrínseco; se ben non se consideran carga, gravame ou afección os investimentos que teña que realiza-la Comunidade Autónoma para da-lo destino de uso xeral ou servicio público da súa competencia que fixe o cedente ou doador.

Na súa virtude, por proposta do conselleiro de Economía e Facenda, feita nos termos nos que o Instituto Galego da Vivenda e Solo acordou a cesión, a título gratuíto, e logo de deliberación do Consello da Xunta de Galicia na súa reunión do día vintecinco de outubro de dous mil un,

DISPOÑO:

Artigo 1º

Acéptase, nos termos fixados na resolución da Dirección Xeral do Instituto Galego da Vivenda e Solo do 31 de xullo de 2001, a cesión a título gratuíto, de uso feita a favor da Comunidade Autónoma de Galicia por un prazo de dez anos dos seguintes inmobles:

1. Local nº 88. Local comercial, situado na planta baixa, a cota de portal, do bloque número tres-zona II, na urbanización Rivera Atienza, na parroquia de Lavadores, municipio de Vigo, de superficie 147,68 m. Linda: dereita, visto de norte a sur, con portal e escaleiras e con vivenda de minusválido; fondo, fachada posterior, sobre resto do predio

matriz; esquerda, bloque catro; e, fronte, corredor por onde ten un dos seus accesos, e despois, resto do predio matriz.

Figura inscrito no Rexistro da Propiedade nº 2 de Vigo no tomo 1.676, libro 766, folio 67, predio nº 50.424, inscrición 1ª.

2. Local nº 115. Local comercial, pegado á esquerda, visto desde a rúa Portela, á cota desta, do bloque catorce, na urbanización Rivera Atienza, na parroquia de Lavadores, municipio de Vigo, de superficie 327,80 m. Ten o seu acceso directamente desde a rúa Portela. Linda: fronte, franxa ou zona de urbanización, en resto do predio matriz, que o separa da rúa Portela; dereita, rampla de acceso a garaxes e parede de separación destes; fondo, resto do predio matriz, en urbanización interior; e esquerda, parede e zona de intercomunicación.

Figura inscrito no Rexistro da Propiedade nº 2 de Vigo no tomo 1.677, libro 767, folio 75, predio nº 50.874, inscrición 1ª.

3. Local nº 116. Local comercial, pegado á dereita, visto desde a rúa Portela, á cota desta, do bloque catorce, na urbanización Rivera Atienza, na parroquia de Lavadores, municipio de Vigo, de superficie 475,22 m. Ten o seu acceso directamente desde a rúa Portela. Linda: fronte, terreo da urbanización, que separa da rúa Portela; dereita, entrando, zona da urbanización en resto do predio matriz, que separa de planta de soto do bloque quince; e esquerda, rampla de accesos a garaxes do bloque quince.

Figura inscrito no Rexistro da Propiedade nº 2 de Vigo no tomo 1.677, libro 767, folio 76, predio nº 50.876, inscrición 1ª.

Artigo 2º

Os locais que se ceden destinaranse ó desenvolvemento de actividades con distintos colectivos sociais (maiores, minusválidos, marxinados, etc.) no marco dos programas de intervención social da Consellería de Sanidade e Servicios Sociais destinados a mellora-lo nivel de benestar, integración e condicións de vida destes colectivos.

Artigo 3º

A Consellería de Economía e Facenda, a través da Secretaría Xeral e do Patrimonio, procederá á formalización da cesión de uso no correspondente documento público e á inscrición do ben no Rexistro da Propiedade a nome da Comunidade Autónoma.

Disposición derradeira

A Consellería de Economía e Facenda, a través da Secretaría Xeral e do Patrimonio, levará a cabo tódolos trámites necesarios para a efectividade deste decreto.

Santiago de Compostela, vintecinco de outubro de dous mil un.

Manuel Fraga Iribarne

Presidente

José Antonio Orza Fernández

Conselleiro de Economía e Facenda