Visto o expediente instruído para efectos de outorgamento do permiso de actividade e concesión para a explotación dunha estación depuradora e centro de expedición, apreciáronse os seguintes

A) Feitos.

Primeiro: mediante escrito do 25 de agosto de 1999, Carlos Pimenta Domínguez (DNI/CIF: 35408925-B), en representación de Mariscos Veiro, S.L. (CIF: B-36169316), solicitou permiso de actividade e concesión para a explotación dunha estación depuradora e centro de expedición, no lugar de Tragove, concello de Cambados provincia de Pontevedra.

Segundo: o interesado achegou a documentación requirida para a tramitación deste tipo de establecementos.

Terceiro: no expediente obra a seguinte documentación, referida ó resultado da información pública e oficial:

-Anuncio de información pública, inserido no BOP de Pontevedra.

-Informe técnico biolóxico.

-Informe do Concello de Cambados.

-Informe da Consellería de Sanidade e Servicios Sociais.

-Informe xurídico do Servicio Técnico-Xurídico.

Cuarto: con data 16-11-2000, Portos de Galicia (Consellería de Política Territorial, Obras Públicas e Vivenda) outorgou a Mariscos Veiro a concesión para a ocupación do dominio público con destino á instalación do establecemento.

B) Fundamentos de dereito.

Este órgano é competente para resolve-lo expediente de conformidade coa Lei 6/1993, do 11 de maio, de pesca de Galicia (DOG nº 101), co Decreto 193/1997, do 5 de xuño, polo que se determinan as condicións para o outorgamento do permiso de actividade para os establecementos de cultivos mariños e auxiliares situados na zona terrestre (DOG nº 142) e coa Orde do 27 de marzo de 2000, pola que se regula o procedemento para o outorgamento do permiso de actividade para establecementos de cultivos mariños e auxiliares na zona terrestre (DOG nº 67).

Vistas as disposicións citadas, por proposta de resolución da Dirección Xeral de Recursos Mariños, o artigo 89 da Lei 30/1992, do 26 de novembro, de réxime xurídico das administracións públicas e do procedemento administrativo común, e demais normas de xeral e pertinente aplicación, esta consellería

RESOLVE:

Outorgar a Mariscos Veiro, S.L. con DNI/CIF: B-36169316, permiso de actividade e concesión para a posta en funcionamento e explotación do establecemento auxiliar de cultivos mariños, que se indica a continuación:

Tipo: estación depuradora/centro de expedición.

Nome: Mariscos Veiro, S.L.

Actividade: eliminación de xermes patóxenos/envasamento.

Especies: moluscos.

Localización no lugar: Tragove.

Concello: Cambados.

Provincia: Pontevedra.

Superficies:

Dominio privado: non ocupa.

Dominio público: 3.768 m.

Características das instalacións:

Naves nº: 1.

Superficie: 3.400 m.

Toma de auga e desaugadoiros: 368 m.

Piscinas nº: 4.

Superficie total: 1.891 m.

Baixo as seguintes condicións:

Primeira.-O permiso de actividade e concesión outórganse por un prazo de dez (10) anos, que se contarán a partir do día seguinte ó da publicación da resolución no DOG. Poderá prorrogarse por períodos máximos de outros dez anos, logo de petición do interesado presentada dentro dos 60 días anteriores ó vencemento da súa vixencia.

Segunda.-As obras e instalacións que poderán dar comezo no momento no que o titular dispoña das autorizacións preceptivas dos distintos organismos competentes na materia, levaranse a cabo de acordo co proxecto estación depuradora e centro de expedición, redactado en xuño de 1999, polo enxeñeiro de camiños, canles e portos Eloy Ferrnández-Valdés Martínez-Estéllez, visado polo colexio profesional correspondente o día 23 de xuño de 1999, e deberán quedar totalmente rematadas no prazo de dezaoito (18) meses, contados desde o día seguinte ó da publicación da presente resolución.

Terceira.-A execucións das obras e instalacións e o inicio da actividade realizaranse de acordo co disposto nos artigos 5 e 6 da Orde do 27 de marzo de 2000 citada.

Cuarta.-O establecemento, nin o dominio público ocupado, nin as obras nel executadas, poderán destinarse a usos distintos dos autorizados. Baixo ningún concepto se poderán modifica-las instalacións sen permiso expreso desta consellería.

Quinta.-Sen prexuízo da caducidade da concesión de ocupación, ó abeiro do disposto na resolución de outorgamento do dominio público, que será vinculante para esta consellería, o permiso de actividade e concesión ós que se refire esta resolución, extinguiranse polo incumprimento dalgunha das condicións dela e nos casos previstos no artigo 72, da Lei 6/1993, de pesca de Galicia, e no Decreto 193/1997, do 5 de xuño.

Sexta.-O outorgamento deste permiso de actividade e concesión non exime ó seu titular da obtención das licencias, permisos e autorizacións legalmente procedentes.

Sétima.-O titular xustificará o pagamento á Facenda pública do imposto que grava as concesións e autorizacións (transmisións patrimoniais e actos xurídicos documentados) ou acreditará a declaración de non estar suxeito ó acto do dito imposto, feita pola Delegación de Facenda ou oficina liquidadora correspondente.

Contra esta resolución que pon fin á vía administrativa, poderase interpoñer recurso potestativo de reposición, no prazo dun mes, ante o conselleiro de Pesca, Marisqueo e Acuicultura, ou recurso contencioso-administrativo, ante a xurisdicción conteciosa-administrativa, que se interporá no prazo de dous meses, contados en ámbolos dous casos desde o día seguinte ó da súa publicación, de conformidade co disposto no artigo 116 da Lei 30/1992, do 26 de novembro, modificada por Lei 4/1999, de réxime xurídico das administracións públicas e do procedemento administrativo común e o artigo 46.1º da Lei 29/1998, do 13 de xullo, da xurisdicción contencioso-administrativa.

Santiago de Compostela, 27 de xullo de 2001.

Amancio Landín Jaráiz

Conselleiro de Pesca, Marisqueo e Acuicultura