O Concello de Alfoz (Lugo), en sesión que tivo lugar o día 16 de novembro de 2000, aprobou o proxecto de saneamento de Alfoz e Ferreira do Valadouro, e na mesma sesión acordou solicitar da Xunta de Galicia a declaración de urxente ocupación dos bens e dereitos afectados pola expropiación forzosa ó abeiro do disposto no artigo 52 da Lei de expropiación forzosa.
Por parte do Concello de Alfoz foi remitida a documentación complementaria para a correcta tramitación do expediente con data de entrada no rexistro xeral da Consellería de Xustiza, Interior e Relacións Laborais o día 12 de marzo de 2001.
Os bens nos que se concreta a declaración de urxente ocupación están determinados no expediente que se someteu a información pública.
A Dirección Xeral de Urbanismo da Consellería de Política Territorial, Obras Públicas e Vivenda emitiu informe favorable. O dito informe tivo entrada no rexistro xeral da Consellería de Xustiza, Interior e Relacións Laborais o día 13 de marzo de 2001.
Considérase necesaria a declaración de urxente ocupación dos bens e dereitos precisos para a realización das obras do proxecto técnico sinalado, porque, segundo sinala o concello, se trata de mellora-los graves problemas sanitarios e de insalubridade, derivados da carencia duns servicios de saneamento adecuados á normativa da Unión Europea, polo que o ente Augas de Galicia iniciou as obras para a construcción da EDAR e os colectores de saneamento. No ano 2000, por consideracións técnicas sobrevidas e estando as obras nun avanzado estado de construcción, o concello tivo que contar cos terreos máis adecuados para a realización das obras, facéndose necesario contar cos terreos de propiedade de Manuel López Souto, feito que provocou a necesidade de iniciar un expediente expropiatorio, pola vía de urxencia, para poder mellora-los servicios sanitarios e a calidade de vida dos veciños deste concello.
A competencia para a declaración da urxente ocupación correspóndelle ó Consello da Xunta de Galicia segundo o disposto nos artigos 27.2º e 28.2º do Estatuto de autonomía de Galicia.
Na súa virtude, por proposta do conselleiro de Xustiza, Interior e Relacións Laborais e logo de deliberación do Consello da Xunta de Galicia na súa reunión do día vintenove de marzo de dous mil un.
DISPOÑO:
Artigo único.-De conformidade co disposto no artigo 52 da Lei de expropiación forzosa, declárase a
urxente ocupación, polo Concello de Alfoz, para efectos de expropiación forzosa, dos bens e dereitos concretados no expediente administrativo instruído para o efecto e necesarios para a execución das obras do proxecto de saneamento de Alfoz e Ferreira do Valadouro.
Santiago de Compostela, vintenove de marzo de dou mil un.
Manuel Fraga Iribarne
Presidente
Antonio Pillado Montero
Conselleiro de Xustiza, Interior e Relacións Laborais