O Estatuto de autonomía, no seu artigo 4, determina que lles corresponde ós poderes públicos de Galicia promove-las condicións para que a liberdade e a igualdade do individuo e dos grupos nos que se integra sexan reais e efectivas, remove-los obstáculos que impidan ou dificulten a súa plenitude e facilita-la participación de tódolos galegos na vida política, económica, cultural e social.
Así mesmo, o artigo 27.23º do Estatuto de autonomía asígnalle á Comunidade Autónoma competencia exclusiva en materia de asistencia social, e no seu artigo 33.2º establécese que lle corresponde o desenvolvemento lexislativo e a execución da lexislación básica do Estado en materia de Seguridade Social.
A Lei 3/1991, do 14 de xaneiro, de creación do Servicio Galego de Promoción da Igualdade do Home e da Muller, establece no seu artigo 3 como funcións do servicio promover, coordinar e avaliar plans e programas de acción e o desenvolvemento de actividades que, para a consecución dos obxectivos previstos na dita lei, realicen deputacións e concellos; así como incentiva-la participación das mulleres na vida política, económica, cultural, educativa e social.
O Decreto 488/1997, do 26 de decembro, modificado polo Decreto 117/1999, do 23 de abril, e 202/2000, do 21 de xullo, polo que se establece a estructura orgánica da Consellería de Familia e Promoción do Emprego, Muller e Xuventude, no seu artigo 1, atribúelle á dita consellería as competencias en materia de muller, de acordo co establecido no Estatuto de autonomía de Galicia e nos termos sinalados pola Constitución española.
No Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia e no proxecto de Lei de orzamentos xerais da Comunidade Autónoma de Galicia para o ano 2001, establécense os requisitos xerais aplicables ás subvencións concedidas pola Administración autonómica, normativa á que, en consecuencia, se adaptará a presente resolución, tendo en conta en todo caso os principios de publicidade, obxectividade e concorrencia.
A tramitación desta resolución acóllese ó disposto na orde da Consellería de Economía e Facenda do 11 de febreiro de 1998 pola que se regula a tramitación anticipada de expedientes de gasto, modificada pola Orde do 27 de novembro de 2000, toda vez que o Consello da Xunta de Galicia, na súa sesión do día 13 de outubro de 2000, aprobou o
proxecto de orzamentos xerais para a Comunidade Autónoma para o ano 2001.
Estas axudas financiaranse con cargo ás partidas orzamentarias 14.50.212A.460.0, (dentro da que se atopan os Centros de Información á Muller, que son cofinanciados cos fondos reflectidos no Marco Comunitario de Apoio da Unión Europea, a través do Fondo Social Europeo), 14.50.212A.480.0 e 14.50.212A.483.0 dos orzamentos xerais da Comunidade Autónoma galega para o ano 2001 e o importe global destinado a estas ascenderá a 345.000.000 de pesetas.
Na súa virtude, en uso das facultades que teño atribuidas, e para a súa debida aplicación nos créditos orzamentarios para o fin para o que foron establecidos,
DISPOÑO:
Artigo 1º.-Obxecto.
1. O obxecto da presente resolución é establece-las bases reguladoras das axudas e subvencións, e proceder á súa convocatoria pública en réxime de concorrencia competitiva, para sufraga-los gastos correntes xerados por programas e actividades destinados a facer posible a incorporación da muller na vida política, económica, cultural, social e laboral e o coñecemento do seu contorno, e a fomenta-la relación e colaboración entre as asociacións de mulleres, para acada-la igualdade real e efectiva e a non discriminación entre homes e mulleres; así como apoiar, a través das axudas económicas, as entidades que presten servicios de atención á muller e centros onde se presten os ditos servicios.
2. Para os efectos da presente resolución consideraranse centros e servicios para a muller:
a) Os servicios de información e asesoramento sobre temas xurídicos, laborais, de servicios sociais, e calquera outro que supoña a promoción da muller en tódolos ámbitos.
b) As casas de acollida e vivendas tuteladas para mulleres víctimas de malos tratos.
c) Servicios de atención a mulleres en situacións de especial dificultade.
Artigo 2º.-Destinatarias.
Poderán solicita-las subvencións as entidades de iniciativa social sen ánimo de lucro que, sendo titulares de centros, presten algún dos servicios establecidos no artigo anterior ou realicen calquera outra actividade de carácter social, sempre que se atopen inscritas, salvo para o caso de programas de atención especializada a mulleres, no último día de finalización do prazo da solicitude, no Rexistro de Entidades Prestadoras de Servicios Sociais da Consellería de Familia e Promoción do Emprego, Muller e Xuventude, na área da muller, previsto no artigo 32 da Lei 4/1993, do 14 de abril, de servicios sociais,
e desenvolvido polo Decreto 291/1995, do 3 de novembro e pola Orde do 18 de xaneiro de 1996.
Poderán solicitalas tamén as entidades locais e as universidades que presten algún dos servicios ou sexan titulares dalgúns dos centros ou executen os servicios ou programas ós que se refire o artigo anterior.
Artigo 3º.-Tipos de axuda.
Os tipos de axuda que se poderán solicitar son os seguintes:
a) Promoción de actividades básicas.
a.1) De carácter formativo.
a.2) De carácter asociativo ou comunitario.
a.3) De asistencia a congresos e convencións de mulleres.
a.4) De información e asesoramento.
a.5) De elaboración de estudios e estatísticas sobre a situación da muller galega.
As actividades incluídas nos puntos a.1 e a.2 deberán incluír obrigatoriamente un módulo de políticas de igualdade.
b) De realización de programas de atención especializada a mulleres.
Artigo 4º.-Normas xerais sobre as subvencións.
1. Tódalas axudas reguladas por esta resolución poderán estar suxeitas á formulación dun convenio de vixencia anual entre o destinatario e o Servicio Galego de Promoción da Igualdade do Home e da Muller. A formulación do devandito convenio non eximirá a entidade destinataria de presentar solicitude en exercicios posteriores.
2. Para os distintos tipos de axuda, a subvención poderá significa-lo financiamento total ou parcial do gasto, sen que en ningún caso implique duplicidade, de tal xeito que a suma das subvencións concedidas por todo tipo de organismos públicos, percibidas coa mesma finalidade, non supere o 100% do importe do gasto efectuado.
3. A Consellería de Familia e Promoción do Emprego, Muller e Xuventude e o Servicio Galego de Promoción da Igualdade do Home e da Muller poderán efectua-las comprobacións que consideren oportunas en canto ó cumprimento dos requisitos esixidos pola Lei de servicios sociais de Galicia e demais normativa de desenvolvemento ás entidades prestadoras de servicios sociais.
Artigo 5º.-Solicitudes e documentación.
1. As solicitudes formalizaranse mediante instancia segundo o modelo oficial que se xunta como anexo I e II á presente resolución, debidamente cuberto, dirixidas á directora xeral do Servicio Galego de Promoción da Igualdade do Home e da Muller.
2. Documentación que se xuntará á solicitude:
2.1. Documentos comúns para tódalas axudas:
a) Fotocopia do DNI da persoa física que asina a solicitude e documentación acreditativa da súa representación.
b) Fotocopia da tarxeta de identificación fiscal.
c) Se a entidade peticionaria é unha federación ou confederación, certificación asinada polo representante acreditativa das asociacións ou federacións integradas, especificando o nome, CIF e o número asignado no Rexistro de Entidades Prestadoras de Servicios Sociais, na área específica da muller, a cada unha delas.
d) Orzamento desagregado dos gastos previstos para cada actividade, programa ou servicio, así como os recursos humanos e materiais cos que conta para o seu funcionamento.
e) Certificación bancaria de existencia de conta.
f) Compromiso de cubri-la diferencia que resulte entre o importe da actividade ou do programa e a subvención concedida.
g) Declaración subscrita polo representante da entidade de tódalas solicitudes de axudas efectuadas ou concedidas polas distintas administracións públicas ou por calquera dos seus organismos, entes ou sociedades, para o financiamento das actividades ou programas de atención especializada solicitados ó abeiro desta resolución.
Cando a solicitante sexa unha entidade local, ademais da documentación prevista nas letras b), d), e), f) e g) deste número, deberá xunta-lo seguinte:
a) Certificación da contía establecida nos orzamentos da entidade local destinada ó mantemento e desenvolvemento dos servicios obxecto da solicitude.
b) Certificado do acordo da entidade local de solicita-la subvención e, no caso de prórroga, de que continúa na prestación dos servicios nas mesmas condicións do ano anterior.
2.2. Documentos específicos para cada tipo de axuda.
2.2.1. Para subvencións de promoción de actividades básicas:
-Proxecto no que figura a actividade ou actividades que se realizarán (incluíndo, se se-lo caso, a descrición específica do módulo de políticas de igualdade), descrición dos obxectivos, metodoloxía, calendario, poboación e ámbito xeográfico do desenvolvemento da actividade.
-Número asignado no Rexistro de Entidades Prestadoras de Servicios Sociais, na área de actuación específica da muller.
2.2.2. Para subvencións de programas de atención especializada a mulleres:
-Denominación do programa, breve resumo do seu contido, colectivo de atención, número de usuarios/as directos/as, obxectivos, localización territorial e área de influencia, descrición pormenorizada das actuacións incluídas na programación, así como da metodoloxía empregada.
Artigo 6º.-Prazo e lugar de presentación de solicitudes.
O prazo de presentación das solicitudes será dun mes contado a partir do día seguinte ó da data de publicación da presente resolución no Diario Oficial de Galicia.
As solicitudes presentaranse no Servicio Galego de Promoción da Igualdade do Home e da Muller ou nas delegacións provinciais da Consellería de Familia e Promoción do Emprego, Muller e Xuventude que correspondan ó domicilio da solicitante ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común, modificado pola Lei 4/1999. Se as solicitudes fosen presentadas nas delegacións provinciais, estas remitiranas coa maior brevidade posible ó Servicio Galego de Promoción da Igualdade do Home e da Muller.
Artigo 7º.-Tramitación dos expedientes.
1. O Servicio Galego de Promoción da Igualdade do Home e da Muller comprobará que os expedientes reúnen tódolos requisitos recollidos na presente resolución e procederá a reclamarlles por escrito ós interesados os datos, documentos e aclaracións que consideren necesarios para completa-lo expediente, de conformidade co previsto no artigo 71 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro.
2. Revisados os expedientes e completados, se é o caso, remitiránselle á comisión para propoñe-la aprobación ou a denegación de axudas, seguindo os criterios recollidos na presente resolución.
Artigo 8º.-Comisión de valoración.
Para o disposto no parágrafo anterior, a comisión de valoración estará composta pola secretaria do Servicio Galego de Promoción da Igualdade do Home e da Muller, que a presidirá, e serán vocais o xefe do Servicio de Cooperación, Estudios e Programas e o xefe do Servicio de Administración Xeral, que actuará como secretario.
Artigo 9º.-Criterios de valoración das axudas.
1. Axudas para promoción de actividades básicas:
1.1. Adecuación das actividades á finalidade e obxecto da presente resolución.
1.2. Fomento e tecnificación do asociacionismo.
1.3. Intercambio e coordinación entre distintas asociacións de mulleres para a realización de actividades conxuntas.
1.4. O número de persoas ás que se dirixen as actividades, especialmente aquelas dirixidas a mulleres beneficiarias da RISGA (Renda de Integración Social de Galicia).
1.5. A realización de programas, publicacións, conferencias e encontros que sexan de interese para as mulleres.
1.6. O ámbito territorial de desenvolvemento da actividade.
1.7. O alcance social da actividade e, en especial, a súa contribución ó desenvolvemento persoal e á integración social do colectivo ó que se dirixe.
1.8. Os elementos innovadores das actividades.
1.9. A non percepción doutras subvencións para a mesma finalidade.
1.10. O maior número de socios/as ou afiliados/as.
2. Axudas para a realización de programas de atención especializada.
2.1. A súa adecuación ós obxectivos incluídos no vixente Plan de Igualdade de Oportunidades das Mulleres Galegas.
2.2. O maior grao de participación económica na execución dos programas, por parte da entidade solicitante.
2.3. A continuidade no funcionamento dos centros e servicios que recibiron subvención no ano anterior, sempre que os resultados acadados fosen positivos.
2.4. O maior ámbito territorial de desenvolvemento do programa.
3. Cando se trate de entidades locais terase en conta ademais como criterio de valoración, a existencia de partida orzamentaria destinada a actuacións a prol das mulleres.
Artigo 10º.-Resolución.
1. A resolución das axudas, unha vez emitido o informe-proposta pola comisión de valoración e fiscalizado pola Intervención, correspóndelle á directora xeral do Servicio Galego de Promoción da Igualdade do Home e da Muller. Esta resolución poñerá fin á vía administrativa e contra ela poderá interpoñerse potestativamente recurso de reposición perante o mesmo órgano, no prazo dun mes contado a partir do día seguinte ó da súa notificación, ou recurso contencioso-administrativo perante o Tribunal Superior de Xustiza de Galicia, no prazo de dous meses contados a partir do día seguinte ó da súa notificación.
2. A notificación das resolucións deberase producir no prazo de 6 meses, contados a partir do día seguinte á publicación da presente resolución no Diario Oficial de Galicia. Transcorrido o devandito prazo sen
que recaese resolución expresa, esta entenderase desestimada.
Artigo 11º.-Pagamento e xustificación das subvencións.
1. Unha vez dictada a resolución pola que se concede a subvención, procederase ó pagamento e xustificación, na forma que a continuación se indica, agás nos casos nos que se establezan convenios, nos que se aplicará o que neles se sinale.
2. As subvencións poderanse facer efectivas de conformidade co establecido no proxecto de Lei de orzamentos xerais da Comunidade Autónoma para o ano 2001:
2.1. Subvencións que non superan o 1.000.000 de pesetas.
No suposto de subvencións correntes a institucións ou concellos en materia de muller que non superen o 1.000.000 de pesetas, o/a beneficiario/a poderá solicita-lo pagamento parcial con carácter de anticipo do 80% do importe da subvención.
O 20% restante da contía da subvención farase efectiva unha vez presentada, antes do 30 de novembro do ano 2001, perante o Servicio Galego de Promoción da Igualdade do Home e da Muller, a seguinte documentación:
A) Axudas a entidades de iniciativa social:
a.1) Documentos comúns:
-Certificación expedida polo/a representante da entidade que acredite que os gastos realizados foron aplicados para o fin para o que a subvención foi concedida, xunto cos orixinais ou copias compulsadas das facturas ou xustificantes documentais do gasto efectuado.
-Declaración subscrita polo representante da entidade de tódalas axudas solicitadas, tanto as aprobadas ou concedidas como as pendentes de resolución, das distintas administracións públicas, ou de calquera dos seus organismos, entes ou sociedades para a realización dos programas de atención especializada subvencionados ó abeiro desta resolución.
a.2) Documentos específicos:
*Para axudas destinadas a programas de atención especializada:
-Balance de ingresos e gastos que abranga todo o ano natural conforme o anexo IV.
*Para axudas destinadas á promoción de actividades básicas:
-Certificación descritiva das actividades realizadas cos seus importes conforme o anexo V.
B) Axudas a concellos para programas de atención especializada e promoción de actividades básicas:
-Certificación expedida polo representante do concello que acredite que se realizou o gasto e que
este foi destinado para o fin para o que a subvención foi concedida.
-Declaración subscrita polo órgano municipal competente de tódalas axudas solicitadas, tanto as aprobadas ou concedidas como as pendentes de resolución, das distintas administracións públicas, ou de calquera dos seus organismos, entes ou sociedades para a realización das actividades e dos programas de atención especializada subvencionados ó abeiro desta resolución.
2.2. Subvencións que superan o 1.000.000 de pesetas.
No caso de supera-lo importe de 1.000.000 de pesetas, poderán acordarse pagamentos parciais ata o máximo do 80%, á conta da liquidación e xustificación final, a medida que o beneficiario xustifique ter realizado un gasto equivalente, mediante certificación expedida polo representante da entidade, xunto cos orixinais ou copias compulsadas das facturas ou xustificantes documentais do gasto efectuado.
O 20% restante da contía da subvención farase efectiva unha vez presentada, antes do 30 de novembro do ano 2001, perante o Servicio Galego de Promoción da Igualdade do Home e da Muller, a seguinte documentación:
A) Axudas a entidades de iniciativa social:
a.1) Documentos comúns:
-Certificación expedida polo/a representante da entidade que acredite que os gastos realizados foron aplicados para o fin para o que a subvención foi concedida, xunto cos orixinais ou copias compulsadas das facturas ou xustificantes documentais do gasto efectuado.
-Declaración subscrita polo representante da entidade de tódalas axudas solicitadas, tanto as aprobadas ou concedidas como as pendentes de resolución, das distintas administracións públicas, ou de calquera dos seus organismos, entes ou sociedades para a realización dos programas de atención especializada subvencionados ó abeiro desta resolución.
a.2) Documentos específicos:
*Para axudas destinadas a programas de atención especializada:
-Balance de ingresos e gastos que abranga todo o ano natural conforme o anexo IV.
*Para axudas destinadas á promoción de actividades básicas:
-Certificación descritiva das actividades realizadas cos seus importes conforme o anexo V.
B) Axudas a concellos para programas de atención especializada e promoción de actividades básicas:
-Certificación expedida polo representante do concello que acredite que se realizou o gasto e que
este foi destinado para o fin para o que a subvención foi concedida.
-Declaración subscrita polo órgano municipal competente de tódalas axudas solicitadas, tanto as aprobadas ou concedidas como as pendentes de resolución, das distintas administracións públicas, ou de calquera dos seus organismos, entes ou sociedades para a realización das actividades e dos programas de atención especializada subvencionados ó abeiro desta resolución.
En tódalas axudas concedidas ó abeiro desta resolución, a entidade deberá presentar perante o Servicio Galego de Promoción da Igualdade do Home e da Muller unha memoria dos programas e actividades desenvolvidos (anexo III). O cumprimento deste trámite será requisito previo para a concesión de subvencións nos exercicios seguintes.
Artigo 12º.-Obrigas dos/as adxudicatarios/as das subvencións.
a) Facer constar en todo tipo de publicidade e información a condición de que a actividade está subvencionada polo Servicio Galego de Promoción da Igualdade do Home e da Muller.
b) Someterse ás actuacións de supervisión e control dos órganos da Administración do Estado e da Comunidade Autónoma, o Fondo Social Europeo, a Unidade Administradora do Fondo Social Europeo do Ministerio de Traballo e Asuntos Sociais, o Servicio Galego de Promoción da Igualdade do Home e da Muller para realiza-las comprobacións e verificacións que considere precisas para a constatación do cumprimento do disposto nesta resolución e demais normas vixentes que resulten de aplicación.
c) Facilitar toda a información que lle sexa requirida polos órganos competentes do Servicio Galego de Promoción da Igualdade do Home e da Muller, á Intervención Xeral da Comunidade Autónoma, ó Tribunal de Contas e ó Consello de Contas, no exercicio das súas funcións de fiscalización e control do destino das axudas.
d) Remitir unha memoria final das actividades desenvolvidas, que deberá conter como mínimo os datos sinalados no anexo III desta resolución.
e) Cando se trate de programas de atención especializada a mulleres, deberase remitir trimestralmente memoria descritiva do estado de execución do programa, indicando o número de mulleres beneficiadas e unha memoria final que deberá recolle-los contidos que sinale o Servicio Galego de Promoción da Igualdade do Home e da Muller que, alomenos, serán os sinalados no anexo III desta convocatoria.
Artigo 13º.-Publicidade.
Nas accións que se leven a cabo nos Centros de Información á Muller deberá figurar, no lugar onde se realicen e de forma visible, un cartel informativo
no que se indique que a acción está financiada pola Xunta de Galicia, Consellería de Familia e Promoción do Emprego, Muller e Xuventude, Servicio Galego de Promoción da Igualdade do Home e da Muller e Fondo Social Europeo, cos seus respectivos anagramas.
Artigo 14º.-Modificación da resolución.
Toda alteración das condicións tidas en conta para a concesión da axuda, e en todo caso a obtención concorrente de subvencións e axudas outorgadas por outras administracións ou entes públicos ou privados, nacionais ou internacionais, poderá dar lugar á modificación da resolución da concesión.
Artigo 15º.-Reintegro.
Procederá o reintegro total ou parcial da axuda percibida e os xuros de demora desde o momento do seu pagamento, de acordo co establecido no artigo 78.9º do Decreto lexislativo 1/1999, modificado pola Lei 8/1999, do 30 de decembro, nos seguintes casos:
a) Incumprimento da obriga de xustificación.
b) Obtención da axuda sen reuni-los requisitos esixidos para a súa concesión.
c) Incumprimento da finalidade para a que foi concedida a axuda.
Disposicións adicionais
Primeira.-A concesión de axudas reguladas nesta resolución terá como límite global o crédito asignado nos orzamentos para este fin, detraídas, se é o caso, as cantidades destinadas a sufraga-los importes dos convenios subscritos durante a súa vixencia.
Segunda.-Se por calquera causa, no momento no que a comisión de valoración teña que examina-las solicitudes, algún dos seus compoñentes non puidese asistir, será substituído polo/a funcionario/a que para o efecto designe a directora xeral do Servicio Galego de Promoción da Igualdade do Home e da Muller e, sempre que sexa posible, o nomeamento deberá recaer noutro/a funcionario/a do mesmo servicio có/á substituído/a.
Terceira.-En todo o non recollido nesta resolución, aplicarase o disposto para esta materia no Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia e, en particular, o réxime sancionador previsto nel.
Disposicións derradeiras
Única.-A presente resolución entrará en vigor o día seguinte ó da súa publicación no Diario Oficial de Galicia.
Santiago de Compostela, 29 de decembro de 2000.
Aurora Montes Santa-Olalla
Directora xeral do Servicio Galego de Promoción
da Igualdade do Home e da Muller
