O artigo 49.4º da Lei orgánica 8/1985, do 3 de xullo (BOE do 4), reguladora do dereito á educación, establece que as cantidades correspondentes ós salarios do persoal docente dos centros privados concertados tenderán a facer posible gradualmente que

a remuneración destes sexa análoga á do profesorado estatal dos respectivos niveis. Así mesmo, o artigo 13.1º a) do Real decreto 2377/1985, do 18 de decembro (BOE do 27 de decembro), polo que se aproba o Regulamento de normas básicas sobre concertos educativos, incide nesta cuestión, dispoñendo: «As cantidades correspondentes a salarios do persoal docente dos centros privados concertados, incluídas as cotizacións por cota patronal á Seguridade Social correspondentes ós titulares dos centros, tenderán a facer posible gradualmente que a remuneración sexa análoga á do profesorado estatal dos respectivos niveis de ensino obxecto do concerto».

É vontade da Xunta de Galicia emprender unha serie de medidas tendentes a mellora-la situación dos centros privados concertados, que se concretan tanto no que a retribucións do profesorado se refire como ó incremento progresivo dos equipos docentes.

É intención da Xunta de Galicia que a analoxía retributiva se acade no ano 2005, exceptuando o complemento específico por formación permanente dos funcionarios de carreira docentes.

Tendo en conta as propostas presentadas polas organizacións patronais e sindicais o pasado mes de xuño de 1998, e co obxectivo de mellora-la calidade do ensino, considérase necesaria unha mellora dos equipos docentes, sendo intención da Xunta de Galicia aproximarse progresivamente ás propostas presentadas por estas organizacións, de tal xeito que se produciría a dita aproximación no ano 2007.

Por todo isto, a Xunta de Galicia, por proposta do conselleiro de Educación e Ordenación Universitaria na súa reunión do día 21 de xullo de 2000,

ACORDOU:

1. Aproba-lo acordo de incremento rebributivo do profesorado do ensino privado concertado e subvencionado para o ano 2000, co obxectivo de comeza-lo proceso de homologación co profesorado do ensino público.

2. Aproba-lo acordo de incremento de equipos docentes e xefaturas de estudios dos centros privados concertados da Comunidade Autónoma de Galicia para o curso 2000-2001, co obxectivo de comeza-lo proceso de aplicación dos equipos docentes dos centros privados concertados.

3. Autoriza-lo conselleiro de Educación e Ordenación Universitaria para a sinatura do acordo de aumento das retribucións do profesorado e máis do incremento dos equipos docentes dos centros privados concertados.

En execución do anterior acordo, esta consellería e as representacións patronais e sindicais do ensino privado concertado, subscribiron os acordos correspondentes conforme os anexos que a continuación, así mesmo, se publican.

Santiago de Compostela, 3 de agosto de 2000.

Celso Currás Fernández

Conselleiro de Educación e Ordenación Universitaria

ANEXO I

ACORDO DE INCREMENTO RETRIBUTIVO DO PROFESORADO DO ENSINO

PRIVADO CONCERTADO E SUBVENCIONADO PARA O ANO 2000, CO OBXECTIVO

DE COMEZA-LO PROCESO DE HOMOLOGACIÓN CO PROFESORADO DO ENSINO

PÚBLICO DESTA COMUNIDADE

En concordancia co mandato legal contido no artigo 49.4º da Lei orgánica 8/1985, do 3 de xullo (BOE do 4), reguladora do dereito á educación, que sinala que as cantidades correspondentes ós salarios do persoal docente dos centros privados concertados tenderán a facer posible gradualmente que a remuneración destes sexa análoga á do profesorado estatal dos respectivos niveis.

Tendo en conta que o artigo 13.1º a) do Real decreto 2377/1985, do 18 de decembro (BOE do 27 de decembro), polo que se aproba o Regulamento de normas básicas sobre concertos educativos, incide nesta mesma cuestión co seguinte texto: «As cantidades correspondentes a salarios do persoal docente dos centros privados concertados, incluídas as cotizacións por cota patronal á Seguridade Social correspondentes ós titulares dos centros, tenderán a facer posible gradualmente que a remuneración do persoal docente sexa análoga á do profesorado estatal dos respectivos niveis de ensinanzas obxecto do concerto».

Este incremento retributivo do profesorado do ensino privado concertado e subvencionado foille presentado polas organizacións sindicais e patronais á Administración educativa nas últimas mesas de negociación. As tres partes consideran este aumento como unha mellora da calidade do sistema educativo da Comunidade Autónoma de Galicia.

En consecuencia e de conformidade con todo o exposto, a Consellería de Educación e Ordenación Universitaria e as organizacións abaixo asinantes como membros da mesa de negociación do ensino privado concertado/subvencionado adoptan o seguinte

ACORDO:

Primeiro.-O presente acordo terá efectos económicos a partir do 1 de xaneiro de 2000.

Segundo.-O profesorado en pagamento delegado ou subvencionado dos centros privados concertados e subvencionados que pertencen ó ámbito de xestión da Comunidade Autónoma de Galicia experimentará un incremento retributivo con respecto do profesorado do ensino público basado nas seguintes premisas:

1. O incremento realizarase en función de categorías profesionais equivalente a cada corpo docente do ensino público.

2. Para o incremento tomaranse como referente os conceptos retributivos seguintes dos corpos docentes:

-Soldo.

-Complemento de destino.

-Complemento específico xeral docente (agás o complemento específico por formación permanente).

3. A cantidade que se engadirá no ano 2000 para o profesorado do 2º ciclo de infantil, primaria e 1º ciclo de ESO é de 94.261 ptas./ano profesor, incluídas as cargas sociais.

4. Así mesmo, a cantidade que se engadirá tamén no ano 2000 para o profesorado do 2º ciclo de ESO, programas de garantía social, ciclos formativos de grao medio e grao superior e FP-2, é de 64.345 ptas./ano profesor, incluídas as cargas sociais.

5. Estes incrementos retributivos ós que se refire o presente acordo afectan ó profesorado incluído ou que se inclúa a partir deste momento na nómina de pagamento delegado, e máis ó profesorado que está nas unidades subvencionadas de educación infantil.

Terceiro.-Este incremento, que se denomina «complemento retributivo da Comunidade Autónoma de Galicia», aboarase en 14 pagas e cada 12 meses, que terá carácter consolidable no salario do profesorado, sendo actualizables coa porcentaxe de incremento xeral anual de retribucións dos empregado públicos docentes desta comunidade.

No caso de que nos módulos económicos para o sostemento de centros concertados ós que se refire o artigo 49.2º da LODE, que con carácter mínimo fixe o Estado, se inclúan incrementos retributivos para o profesorado, en concepto de analoxía retributiva, estes serán absorbidos polos complementos retributivos fixados neste acordo sen que se produzan novos incrementos adicionais, agás que aqueles foran superiores ós aquí previstos.

Cuarto.-A Administración educativa engadirá ós módulos económicos mínimos de distribución de fondos públicos para o sostemento de centros concertados, que se fixan nos orzamentos xerais do Estado, os incrementos sinalados no punto segundo do presente acordo, todo iso en cumprimento do artigo 49 da LODE.

Quinto.-O aboamento do complemento retributivo para cada categoría profesional que figura no seguinte punto atense ó previsto na disposición adicional sexta do III convenio colectivo de empresas de ensino privado sostidas, total ou parcialmente, con fondos públicos e no artigo 7 do IX convenio colectivo de centros de asistencia, atención, diagnóstico e rehabilitación e promoción de minusválidos e o VI convenio de ámbito estatal de centros de asistencia e educación infantil, sendo necesaria así mesmo a aportuna aprobación polo Consello da Xunta da Comunidade Autónoma de Galicia.

Sexto.-A determinación do complemento salarial da Comunidade Autónoma de Galicia do profesorado da ensino concertado e subvencionado correspondente ó ano 2000 en función do establecido no apartado segundo do acordo de equiparación retributiva do profesorado do ensino concertado/subvencionado co profesorado do ensino público, será o seguinte:

a) O importe do complemento retributivo mensual e anual correspondente ás 14 pagas comprendidas

entre o 1 de xaneiro e o 31 de decembro de 2000 é o seguinte, segundo a categoría profesional do profesorado.

Categoría profesional	Importe mensual	Importe ano 2000 sen S.S.	Importe ano 2000 con S.S.

Profesor de 2º ciclo de educación infantil (4 e 5 anos), de educación primaria, de 1º ciclo de ESO e de educación especial	5.109	71.524	94.261
Profesor de 2º ciclo ESO, de formación profesional de 2º grao, de programas de garantía social e de ciclos formativos de grao medio e grao superior	3.487	48.824	64.345

Estes importes refírense a un profesor con xornada completa.

b) O pagamento deste complemento será proporcional ó número de horas contratadas no caso de profesores con xornadas parciais.

ANEXO II

ACORDO DE INCREMENTO DE EQUIPOS DOCENTES E XEFATURA

DE ESTUDIOS DOS CENTROS PRIVADOS CONCERTADOS DA COMUNIDADE

AUTÓNOMA DE GALICIA PARA O CURSO 2000-2001, CO OBXECTIVO

DE COMEZA-LO PROCESO DE APLICACIÓN DOS EQUIPOS DOCENTES

DOS CENTROS PRIVADOS CONCERTADOS

En concordancia co protocolo de acordo previo para acada-los equipos docentes dos centros privados concertados da Comunidade Autónoma de Galicia e a proposta elaborada e consensuada polas organizacións patronais e sindicais que lle foi entregada á Administración educativa o pasado 9 de xuño de 1998.

Tendo en conta os cadros de persoal de profesorado dos colexios públicos e institutos de educación secundaria, co obxectivo de lograr que nos centros privados concertados exista un paralelismo con elas, que se corrixirá gradualmente para a dignificación da profesión docente.

Presentado este incremento dos equipos docentes dos centros privados concertados polas organizacións patronais e sindicais á Administración educativa nas últimas mesas de negociación entre as tres partes como unha mellora da calidade do sistema educativo da Comunidade Autónoma de Galicia, reto fundamental da educación dos próximos anos.

En consecuencia e de conformidade con todo o exposto, a Consellería de Educación e Ordenación Universitaria e as organizacións abaixo asinantes como membros da mesa de negociación do ensino privado concertado adoptan o seguinte

ACORDO:

Primeiro.-O presente acordo terá efectos a partir do 1 de setembro de 2000.

Segundo.-Os centros privados concertados que pertencen ó ámbito de xestión da Comunidade Autónoma de Galicia experimentará un incremento de dúas horas semanais por unidade concertada de educación secundaria obrigatoria, o que supón a consolidación dos equipos docentes na proporción que se engade.

Terceiro.-No caso de que nos módulos económicos para o sostemento de centros concertados ós que se refire o artigo 49.2º da LODE, que con carácter mínimo fixe o Estado, se inclúan incrementos para profesorado, en concepto de aumento de equipos docentes, estes serán absorbidos polos incrementos fixados neste acordo sen que se produzan novos incrementos adicionais, agás que aqueles foran superiores ós aquí previstos.

Cuarto.-A Administración educativa engadirá ós módulos económicos mínimos de distribución de fondos públicos para o sostemento de centros concertados, que se fixan nos orzamentos xerais do Estado, os incrementos sinalados no punto segundo do presente acordo, todo iso en cumprimento do artigo 49 da LODE.

Quinto.-O incremento de dúas horas de profesor por unidade de educación secundaria obrigatoria atense ó previsto na disposición adicional sexta do III convenio colectivo de empresas de ensino privado sostidas, total ou parcialmente, con fondos públicos, sendo necesaria a oportuna aprobación polo Consello da Xunta da Comunidade Autónoma de Galicia.

Sexto.-Así mesmo, ó comezo do curso 2000-2001 farase efectivo o complemento de xefatura de estudios, segundo a contía económica establecida na revisión salarial en aplicación do convenio colectivo vixente de empresas da ensino privado sostidas, total ou parcialmente, con fondos públicos. A Administración educativa engadirá ós módulos económicos mínimos de distribución de fondos públicos para o sostemento de centros concertados, que se fixan nos orzamentos xerais do Estado, os incrementos derivados deste complemento.